|
|
|
| عمرو خالد |
قبل ما أدخل في قصة النهاردة.. أنا عندي سؤال..
تفتكروا يا جماعة! رمضان السنة دي ها ينعكس على الأمة؟
دي بحاجة في حياتنا تتصلح في حياتنا.. تفتكروا؟ تفتكروا الصيام، والعبادة ها يبقى لها أثار في المجتمع؟ وفي الحياة؟ تفتكروا؟
كام واحد ها يطلع من رمضان عايز يعمل زيادة؟
كام واحد هياكل الكتب أكل، ويعشق العلم؛ لأنه فهم القرآن، وفهم الإسلام، وعرف أن نهضة الأمة دي مرتبطة بالعلم؟
قصة النهاردة حكاية من أغرب الحكايات.. قصة رجل غامض.. غريب.. في القصة لغز.. القصة جت في القرآن في 22 آية مع أن سورة الفاتحة 7 آيات، ومع أن في أحكام في القرآن الأحكام كلها 3 آيات.. لكن القصة دي 22 آية في رسالة فوقوا لا في رسالة جامدة، ومحدش واخد باله منها.. طبعا هي مهمة.. طبعا بس محدش حاسس بيها، وبيعشقها، وعايش عليها اللقاء..
لقاء تاريخي.. يعني إيه لقاء تاريخي؟ لقاء في منتهى الغرابة بين نبي من أعظم الأنبياء، وعالم غير عادي.. بس هذا العالم غامض.. غريب، والعجيب أن النبي هو اللي سعى للقائه.. حد عرف القصة؟
موسى والخضر.
وإحنا النهاردة مش ها نحكي قصة سيدنا موسى.. إحنا النهادرة بنحكي قصة الخضر.. إحنا بنتكلم على الخضر.. لقاء نبي، وعالم الخضر شخص غريب.. غامض.. اسمه الحقيقي إيه؟
معرفش.. سنه أد إيه؟ معرفش.. جه امتى؟ واختفى امتى؟ معرفش، وها يختفي مع نهاية القصة.. الخضر بيمثل إيه؟
إحنا هناخد الحلقة.. الموضوع ده صعب أوي على فكرة.. من أصعب الحلقات اللي حضرتها، ولا أخفيكم.. أسابيع، وأعيد التحضير من أول وجديد، ومقرأتش كمية كتب، وأنا بحضر أد في الحلقة دي ها نأخذها على مرتين.. النهاردة لغاية ما يوصل له.. بكرة لما يأخذ العلم بتاعه، ونأخذ إحنا العلم بتاعه.. ها نأخذ بكرة إن شاء الله العلم بتاعه.. بس النهاردة إيه الموضوع، وأزاي وصل له؟
لا نعرف سنه.. لا نعرف متجوز ولا لا.. معرفش معنديش إجابة، ومحدش عنده إجابة.. عنده أولاد؟ معرفش..
في علماء قالوا: أن هو نبي من الأنبياء، وجابوا أدلة على كدة.
وفي علماء تاني قالوا: لا.. ده ولي من أولياء الله الصالحين، وله كرامات، وجابوا أدلة على كدة.
وواحد من العلماء قالوا: لا.. ده لا نبي، ولا ولي.. ده ملك من الملائكة؛ لأن أفعاله لا يفعلها البشر.. الراجل ده إيه سره؟
سره أن عنده علم..
القصة النهاردة بتتكلم على العلم.. عشان كدة أنا ابتديت يا ترى رمضان السنة دي ها يجيب أثار؟ أصل موضوع النهاردة كله.. العلم.. موضوع محدش مهتم به.. 22 آية ها تتعلموا ولا لا؟ ها تعشقوا العلم ولا لا؟ وريهم يا موسى. روح يا موسى.. سافر مئات الكليوا مترات عشان تتعلم من راجل 3 مواضيع، وارجع تاني.. العلم اللي الأمة ضيعته.. العلم اللي معدش موجود.. اللي محدش مهتم به.. اللي العالم العربي بينظر له على أنه كماليات..
العلم اللي أمة اقرأ.. اللي أول آ ية في قرآنها اقرا.. 40 % من العالم العربي أمي لا يقرأ، ولا يكتب.. أمة اقرأ لا تقرأ، واللي متعلمين مبيقروش.. الكتاب ليس له قيمة في العالم العربي.
كام واحد بيقرأ في العالم العربي؟
ربنا أول حاجة خلق عليها آدم { وَعَلَّمَ آدَمَ الأَسْمَاء كُلَّهَا} العلم ربنا أول حاجة خلقها إن أول ما خلق الله القلم فقال: اكتب علمي في خلقي إلى يوم القيامة.. العلم اللي النبي -صلى الله عليه وسلم- يوم غزوة بدر، والصحابة رابطين على بطونهم حجر من شدة الجوع، ومحتاجين أكل، ومحتاجين نعيش، وعايزين لقمة العيش، ويتاخد أسرى سبعين واحد من أغنياء قريش.. هنأخذ فلوس كتير عشان نؤكل الناس.. عايزين تفدوا نفسكم يا أغنياء قريش؟ لو كل واحد فيكم علم عشرة من الصحابة اللي مبيعرفوش يقرءوا، ولا يكتبوا ده فدائه.
إحنا مش عايزين فلوس.. إحنا عايزين علم.. ده فكرك يا رسول الله؟ دي رؤيتك يا رسول الله؟
ادوني علم.. ما تدونيش فلوس.. ابنوا لي جيل، ويعمل لهم اختبار للعشرة، وتقعد قريش تقول: يا سلام مدفعش فلوس.. أعلمهم.. يقعد يعلمه.. يعمل اختبار للعشرة النبي -صلى الله عليه وسلم- ها اتعلموا؟ مع السلامة.. فك أسرك.. ده بدايتنا.. دي أمتنا، و40 % مبيعرفوش يقرءوا ولا يكتبوا، والباقي كل القضية بالنسبة له أن هو يأخذ شهادة عشان يعلقها.. عشان يتجوز بيها، وبعد كدة عاطل.. لكن الدماغ دي مبتبنيش؛ لأن مفيش علم.. مفيش علم.. نظام التعلم تلقيني قائم على مخزن بتعبي في الدماغ.. مخزن دماغ الطلبة.. دي مخزن يجي يوم الامتحان يفتح المخزن يقوم منزل المعلومات، ويفضل المخزن فاضي.. دي أمة اقرأ.. 22 آية عشان تقول لهم: لا اتعبوا على العلم.. أنا حاسس إن أنا بسخر على حاجة الناس مش واخدة بالها، وعارف أن في ناس قاعدة قدامي دلوقتي سامعاني.. إيه يعني؟ يمكن لما نمشي في القصة شوية الحرقة اللي أنا حاسس بيها، وأنا بحضر الحلقة دي توصل لكم.
أنا عايز بس أقول لك حاجة: أن مفيش أمل للأمة دي إن هي تقوم على رجليها إلا بالعلم.. انسى مفيش أمل لا يمكن تحي الأمة هتفضل من قاع لقاع، وها نفضل ننزل طول ما العلم مش مهم عندنا.. مهاتير محمد رئيس ماليزيا كانت دولة ضائعة زينا.. نقلها في عشرين سنة.. عارفين بقى خلى ميزانية التعليم 20% من ميزانية الدولة، وخلى التعليم أهم حاجة في البلد.. نقلت البلد بقت ماليزيا.. بس بدي بس بكدة، وسألوا قالوا له: أنت عملت إيه عشان تعمل النهضة دي؟
قال لهم: أنا معملتش حاجة.. أنا اهتميت بالتعليم بس هو الموضوع كدة.. كولومبيا، والبرازيل اللي هي بلاد فقيرة.. أفقر مننا نسبة الأمة 2 % يا مسلمين ملكوش عذر.. يا ناس يا اللي عايشين في سوهاج.. يا اللي أولادكم سايبين التعليم عشان يشتغلوا وهو عنده سبع سنين، وساب المدرسة.. يا ناس يا اللي في اليمن يا اللي أولادكم سابوا التعليم.. يا ناس يا اللي في الشام.. يا ناس يا اللي في العالم العربي.. عارفين أقل نسبة أمة في العالم العربي فين؟ مش ها تصدقوا في فلسطين غزة، والضفة 0.9% عشان محدش له عذر.
أظن محدش يعيش مأساة أكثر من إخوانا الفلسطينيين، وتعليمهم أحسن من تعلمينا.. أنا محروق، وموجوع، وحاسس إن أنا عايز أمسك الشباب أقول له: أرجوك اقرأ كتير.. امسك الكتب اقرأ كل يوم.. كفاية تدخل على النت تلعب، وتعمل شات، وتشوف مواقع إباحية.. خش اتعلم.. اتفرج على حاجات فيها تعلم.. لازم تتعلم.
أنا جاي النهاردة من خلال قصة موسى أقول 3 صفات للي عايز يتعلم..
لازم تكون موجودة فيه.. ها نقولهم بعد شوية، وعايز أقول.. عايز تنجح، وأضمن لك، وأوعدك بمستقبل ناجح.. أنا ها أقول لك: 16 حاجة اختار منهم عشرة.. لو حافظت عليهم 6 أشهر.. أنا بقول لك مستقبل رهيب لك، ولأمتك.. ها نيجي في القصة، ونخش في القصة.. إيه القصة؟ إيه موسى والخضر؟
عايز توصل لإيه؟
القصة كلها زي ما بقول لك بتدور حول قيمة العلم..
الجزء الأول اللي هو النهاردة.
بكرة حاجة تانية.
القصة بدأت في مصر.. إيه الموضوع؟
سيدنا موسى عايش في مصر (بني إسرائيل) يعانوا معاناة شديدة جدا جدا من ظلم، وقهر، واضطهاد فرعون.. فرعون مقسم الناس مجموعات.. وجه على مجموعة منهم اللي هما بني إسرائيل يستضعف الرجال، ويذبح الأطفال، ويستحي النساء.. ظلم واضطهاد بني إسرائيل مش لاقيين يأكلوا فبيجروا على لقمة العيش.. عادة اللي بيجري على لقمة العيش إيه آخر حاجة يفكر فيها؟
التعلم.. طب، والعيال يطلعوا من المدارس.. تعليم إيه يا عم؟ أنا عايز آكل، وأنا عارف إن في ناس بتسمعني دلوقتي بتقول: تعليم إيه؟ أنا عايز آكل..
سيدنا موسى بيعاني من المشكلة دي.. مصر فيها علماء في ذلك الوقت.. أنتم عارفين وقت الفراعنة.. وقت العلوم فيها علوم، وموسى عارف لا يمكن (بني إسرائيل) ها يقفوا على رجليهم طول ما هم مش متعلمين، والتانين متعلمين.
بني إسرائيل بيتعدبوا؟ آه، وبيصلوا؟ آه، ومؤمنين؟ آه.. لكن مينفعش لوحده من غير علم.. مفيش فائدة.. دي كأن قصتنا دي القصة قصتنا.. ده نفس حالهم.. موسى عمال يدي كلام لبني إسرائيل، ومحاضرات، ومواعظ لازم تتعلموا قيمة العلم.. أهمية العلم.. ثواب العلم.. رضا ربنا على اللي ها يتعلم، ولا هما هنا.. يا عم أكلني.
طب أولادكم يتعلموا.. يا عم أنا عايزهم يشتغلوا.. ده زي اللي بيحصل في التسرب في التعليم في بلادنا.. انزلوا المحافظات.. لا مش المحافظات وبس.. مش القرى بس.. العواصم كمان.. القاهرة.. شوفوا كمية المش متعلمين، وأنا بدأت طول ما أنا ماشي في القاهرة أسأل عيال صغيرة اللي بيشتغل ميكانيكي، واللي بيشتغل كذا، واللي بيشتغل كذا، واللي بيعتل وهو طفل عنده 6 سنين، والبنات أكتر من البنات المتسربين.
أقول له: أنت بتروح المدرسة حبيبي؟ يقول لي: كنت بروح وأبويا طلعني عشان أصرف عليه.
موسى بيحاول ها أروح أكلم أبوه ها يقول إيه؟ ها يقول لي: طبعا لا.. أن ها أكل.. موسى عمال يزعأ في بني إسرائيل.. محدش سامع..
يا عم عايز لقمة العيش.. فكان ربنا -سبحانه وتعالى- يريد لهذه الأمة أن تنهض.. مش الآية بتقول: { إِنَّ فِرْعَوْنَ عَلَا فِي الْأَرْضِ وَجَعَلَ أَهْلَهَا شِيَعاً يَسْتَضْعِفُ طَائِفَةً مِّنْهُمْ يُذَبِّحُ أَبْنَاءهُمْ وَيَسْتَحْيِي نِسَاءهُمْ إِنَّهُ كَانَ مِنَ الْمُفْسِدِينَ{4} وَنُرِيدُ أَن نَّمُنَّ عَلَى الَّذِينَ اسْتُضْعِفُوا} بقى تبدأ الموضوع بالقصة دي.
ها تمن ازاي يا رب على الذين استضعفوا؟
العلم أول حاجة.. إيه اللي حصل؟
بيحكي النبي القصة.. يعني خلي بالكم القصة دي من أهميتها موجودة في القرآن، والنبي حاكيها.. خلي بالك لما تلاقي حاجة موجودة 2 تعرف أن في تركيز عليها غير عادي.. زي قصة أصحاب الأخدود.. القصتين الوحيدتين اللي تلاقي قصة للنبي، وموجودة في القرآن بتفاصيل كثيرة.. يقول النبي -صلى الله عليه وسلم- أن موسى قام خطيبا في بني إسرائيل.. عمال يقول لهم: العلم اللي أنا بقول لكم، ولازم تتعلموا وا، وا في وسط ما هو بيقول كدة، وعمال ينصح.. فقام له رجل من بني إسرائيل تأثر فقال: يا نبي الله من أعلم أهل الأرض؟ من أكتر واحد عالم في الأرض؟ الكلام بس يا عم هو بيقول لهم لازم تتعلموا، والرجل بيسأل عارف الناس الفاضية تفرق معاك؟ آه مين أعلم الأرض؟ أهوا بيتسلى.. يعني كلام موسى مش واصل.. فقال: يا نبي الله من أعلم أهل الأرض؟ فنظر موسى حوله هو كليم الله، وبعدين بص هناك قصر فرعون .. فقال: أنا.. فعتب الله عليه أنه لم ينسب العلم إليه.. لم يقل: الله أعلم.. هم موجودين بني إسرائيل قاعدين..
إيه اللي ها يحصل؟ أنتم مش عايزين تتعلموا، ومش واخدين بالكم من قيمة العلم حا تحصل قصة مثيرة تخلي الناس كلها تتكلم، وتقول: يا.. هو العلم مهم كدة؟ ها تحصل زي ما ها نشوف.. حدث يفوق بني إسرائيل لقيمة العلم.
من أعلم أهل الأرض؟ أنا.. ففي اللحظة نزل جبريل فعتب الله عليه أنه لم ينسب العلم إليه.. فقال له الملك: إن لي عبد هو أعلم منك يا موسى.
بني إسرائيل قوم جدل.. تخلي موسى.. فبدأ الهمهمة.. أنت متخيل؟ بني إسرائيل موسى في حد أعلم منه؟ كليم الله، ولا ده مش كليم الله؟ وبس ده اللي تنزل عليه التوراة.. موسى في حد أعلم منه؟ مين اللي أعلم من موسى؟ لا.. ده اللي جاية ها تثير انتباههم أكثر.. العلم بالتشويق.. يعني أنتم مش عايزين تتعلموا الكلام النظري.. مش جايب نتيجة..
طيب أنا ها أوريكم حاجة ها تذهلكم، وأنتم ناس بتحبوا الجدل.. فهتخل لكم من الحتة دي عشان أفوقكم، وأخلي عيالكم يعملوا كدة.. ها اللي بعدها..
الأول في حد أعلم منك يا موسى؟ عبد.. طب اسمه إيه؟ طب مين؟ بص اللي بعده.. إن لي عبد يا موسى عند مجمع البحرين اذهب فتعلم منه.. إيه مجمع البحرين؟ موسى عايش في الجزيرة.. مش كدة.. المنطقة اللي كان عايش فيها.. فين مجمع البحرين؟ معندوش في الخريطة مجمع بحرين إلا اتنين.. رأس محمد في سينا فوق.. يا إما البحرين في اللغة العربية تحمل نهرين اجتماع النيل الأزرق مع النيل الأبيض في السودان.
فطب أنه فيهم؟ دور يا موسى.. العلم محتاج تعب.. سافر.. نص اللي قاعدين قدامي في الحلقة النهاردة أطباء، ومهندسين، وناس جايين من بلادهم عشان يتعلموا سنة، واثنين، وراجعين تاني.. اتعب يا موسى.. اتعب، وابذل.
بني إسرائيل طب فين؟
إيه القصة الغامضة دي؟ وبدأت الأحاديث الجانبية لبني إسرائيل، وبدأت العيال تسمع ما هوَّ موسى عايز جيل جديد، وبدأت العيال تسمع.. ده العلم مهم أوي.. ده موسى طلع في رحلة عشان يتعلم، واذهب إليه يا موسى.
فالثانية مثيرة تخلي أن هو احتمال يطلع الاثنين.. ما هوَّ ميعرفش أنهي مجمع بحرين؟ يعني ممكن يطلع الأول ميطلعش هو.. لِف، وارجع.. يا نهار أبيض.. ده ها يأخذ مصر من فوقها لتحتها.. ده ها ينزل تحت، ويطلع فوق.. العلم غالي.. ادفع ثمن العلم..
تخيلوا لما دينا في الكلام ده، والأمة جاهلة لا تقرأ.
لا.. الثالثة فقال: يا رب.. طبعا بني إسرائيل بيشوفوا هذا الحدث.. فقال موسى: يا رب دلني عليه.. لا في إنترنت يبعت لي صورته، ولا ها أدخل على جوجل أعمل (سرش) عليه.. يا رب دلني عليه.. أديني علامة عليه.
الثالثة مثيرة أكتر.. رحلة غامضة.. قال: يا موسى احمل حوت مملح.. هات حوت (سمكة) واشويها، وملحها.. إيه الغموض ده؟ وضعها في مكتل (قفة) كويس؟ واحملها، وسر بها إلى مجمع البحرين فحيثما فقدت الحوت ستجد الرجل ليه الغموض ده كله؟
ما سيدنا جبريل يأخذ سيدنا موسى على البراق معزز.. مكرم، ويروح يتعلم من الراجل، ويجيب ورقة وقلم، ويكتب الكلمتين، ويرجع.. ده العلم بتاعكم اللي مبينجحكوش.. عشان كدة أنتم مش واقفين على رجليكم.. اتعب يا موسى، ودور.. عشان تعرفوا أن العلم غالي.. هز الناس.. يا موسى هز الأمة.. يا موسى هز الناس اللي طلعوا أولادهم من التعليم.. يا رجالة، ويا ستات يا اللي بتسمعوني في القرى.
الآن يا اللي بتسمعوني في قنا، وسوهاج.. يا اللي بتسمعوني في إسكندرية.. يا اللي ابنك طلع من المدرسة.. أنا عارف ها تقول لي هتأكله ازاي؟ نفكر ازي نساعدك بعد رمضان.. بس على الأقل من فضلك ابنك لازم يرجع المدرسة، وأنتم يا شباب.. يا متعلمين نزلت على قرية من القرى تعلم واحد من الأطفال هناك، وأنتم يا شباب يا متعلمين.. بالله عليك أنت متعلم بجد، ولا بدور على الشهادة، والدرجات؟ وهل دي بتبني دماغ، وأنتم يا أباء، ويا أمهات فين التشويق؟
عشان تحببوا أولادكم في التعليم في قصة جميلة أوي بيقول لك: تستطيع أن تقود فرسك إلى النهر.. لكن لا تستطيع أن تجبره على الشرب.
سهل تودي ابنك المدرسة.. بس صعب تخليه يحب العلم، ويعشق العلم.
حلقة النهاردة بتقول لك: أنت بتعشق العلم.. عايز تكله أكل.. لو بتحب ربنا اعشق العلم.. احمل يا موسى.. طب ليه حوت؟ شيل حوت، واشويه، وخد المكتل، واطلع بني إسرائيل.. طبعا ها يتجننوا.. هما بيحبوا الحاجات دي.. هم أصلا السؤال، وربنا استخدم معاهم اتعلموا، وها نستخدم طريقة التشويق المفتقدة في العالم العربي.
الآن موجودة في القرآن.. فواخد بقي.. أنت متخيل؟ وبعيدين عايز أقول لك حاجة: بني إسرائيل عايزين يكله فشايفين حوت، ومشوي، ويمكن شمين الريحة.. طب صحيح ليه حوت؟ ليه العلامة حوت (سمكة مشوية) ليه؟ عشان حاجة خطيرة.. علشان يقول له: الحوت رمز (الأكل) يوم ما تفقد رزق البطن تلاقي رزق الرأس.. غزي رأسك على حساب بطنك..
افقد الحوت مش مهم.. مش مهم تفقد اللقمة.. بس المهم ده يتغذى.. شفت رمز الحوت خطير.. على فكرة القصة كلها رموز.. يعني القصة عايزة تشغيل مخ.. كلها مبهمات.. يطلع موسى -عليه السلام- ويقرر أن هو طالع؛ لتعلم العلم.. رحلة لمجمع البحرين.. طب ها يسيب بني إسرائيل في وسط ما هم بيواجهوا فرعون.. يسيب بني إسرائيل ليه؟ العلم العملي أقوي بكتير من الكلام النظري.. دول لازم يتعلموا، وإلا مش ها ينهضوا، والأمة دي لازم تتعلم، وإلا مش ممكن تنهض..
يالا يا موسى اطلع.. النبي -صلى الله عليه وسلم- بص الحديث الجميل ده بيقول: "رأيت وأنا نائم من أتاني من الملائكة بقدح فيه لبن [إناء فيه لبن] فشربت حتى ارتويت.. حتى خرج الري من أظافري.. ثم أعطيت فضلي [فضل الشرب] لعمر.. فقالوا: ما تأويل هذه الرؤيا يا رسول الله؟ قال: العلم" اللي أنا ارتويت به حتى ملأني ده العلم..
صلى الله على محمد -صلى الله عليه وسلم-
عايز يقول لك إيه؟ عايز يقول لك: هو كدة، وشفت عمر هو كدة ليه؟ لأن أنا اديته فضلي.. القصة بتهزنا.. الحقيقة القصة بتوجعنا.. مين يعاهدني من النهاردة أنا ها أبدأ أقرأ، وها أبدأ أتعلم، وأبذل؟
يطلع موسى، ويقول: أنا مسافر، وحسبكم يا بني إسرائيل.. أنا مش عارف الرحلة ها تطول أد إيه؟ لأن أنا طالع شمال، وبعدين نازل جنوب.. معرفش، ويمكن ها ألاقيه من أول مرة، ولا لا.. بس أنا مش طالع لوحدي.. أنا ها أأخذ معايا شاب من الشباب المتميزين { وَإِذْ قَالَ مُوسَى لِفَتَاهُ} ها يأخذه معاه.. ها تأخذه معاك ليه يا سيدنا موسى؟ عشان يتعلم.. هو مين؟ هو كمان الولد ده في نباهة، ومتوقع له مستقبل.. خليه يتدرب عملي.. مفيش كلام نظري.
واخد بالك؟ القصة كلها عملية، ولما يروح للخضر.. مفيش يلا هات يا موسى ورقة وقلم لما أعلم أكتب.. فانطلقا..
3 رحلات..
التعليم بالحركة، التعليم بالتشويق [تعليم عملي مش نظري]، التعليم بالمعايشة.
أظن ال 3 مفتقدين.. بالمعايشة ها يأخذ معاه الفتى يوشع بن نون.. خلي بالك يوشع بن نون طالع شغلته إيه في الرحلة؟ ها يحمل النكتل.. قال: لا أكلفك إلا أن تحمل النكتل.. فحيثما وجدت العلامة، وفقدنا الحوت فأخبرني.. قال: لقد كلفتني بيسير.. دي حاجة بسيطة أوي، ونسي.. لسة صغير.. بس ها يرجع من الرحلة دي الشاب ده لما ها يكبر هو ده اللي ها يقود بني إسرائيل لفتح بيت المقدس.. يوشع بن نون ده اللي شايل النكتل النهاردة هو إلى ها يبص للشمس، ويقول لها: أيتها الشمس إنك مأمورة، وأنا مأمور.. فلا تغربي حتى نفتح، ويفتح الله عليه.. يا مين يتبني الشباب دلوقتي؟ مين يأخذ شاب، ويربيه، ويطلع بيه.. أنا بحاول أعمل كدة لو كل عالم، وكل أستاذ جامعة، وكل ناجح، وكل خبير، وكل ميكانيكي سيارات، وكل صاحب حرفة خد ولد نابغ كدة، وقال له: أنت عليه.
إيه القصة دي؟ ده كل حاجة عن العلم.. واخد بالك؟ عايز قيمة العلم، والتشويق إليه؟ موجود كل حاجة.. يأخذ معاه يوشع بن نون، ويبدأ الرحلة.. يقول النبي: فانطلقا يمشيان على الأقدام.. عايز تقولنا إيه يا رسول الله؟ تعبوا، وبذلوا، وتسمع بقى ها أنا مش قلت لك 3 شروط للي عايز يتعلم.. 3 صفات فيك..
1 ـ إصرار، وعزيمة، وصبر شديد على التعلم.. حتموت على العلم.
2 ـ أدب، وتواضع، ونفسية سهلة مع اللي ها تتعلم منه.. تشيله الشنطة.. تشيله النكتل.. تشيله الجزمة.. عايز تتعلم تستحمل البهدلة.. نفسية متواضعة.
3_ عايز أتعلم علم مفيد مش صفصطائي.. أنا مش جدلي..
صفات لو عندك ال3 صفات النفسية دول أنت جاهز تتعلم.. فاضل تتعلم إيه؟ ها أقول لك بعد شوية.. بس دي صفات اللي عايز يتعلم.. صبر شديد، وال3 موجودين في القصة.. تيجي نشوف أول واحدة فيهم موجودة في القصة مع أول آية.
بداية العلم إصرار شديد.. ها أموت نفسي، وأتعلم { وَإِذْ قَالَ مُوسَى لِفَتَاهُ لَا أَبْرَحُ} مش هيهدى لي بال، ولا حا أستريح.. { لَا أَبْرَحُ حَتَّى أَبْلُغَ مَجْمَعَ الْبَحْرَيْنِ} يا سيدنا موسى.. يا رب أنا قاعد مع بني إسرائيل، ولسة ها نروح.. طب يقول له: الأول العلم اللي عنده.. بعدين أروح.. على فكرة موسى رايح مش عارف العلم إيه.. ربنا قال له: ده أعلم منك.. روح اتعلم.. ها يموت نفسه، ويروح يتعمل { وَإِذْ قَالَ مُوسَى} الآية دي بس لو كتبتها في أوضتك ها { وَإِذْ قَالَ مُوسَى لِفَتَاهُ لَا أَبْرَحُ حَتَّى أَبْلُغَ مَجْمَعَ الْبَحْرَيْنِ أَوْ أَمْضِيَ حُقُباً } أو أفضل ماشي على رجليا حقبا.. الحقبة 25 سنة.. مش حمشي حقبة.. حقبا.. ها أجيبه.. ها أجيبه.. شفت الآية دي؟ حاسسها؟ أنت عندك الإصرار ده؟ عايز تتعلم كدة؟
أنا عايز أقول لك حاجة: بيقول واحد حكمي جال له: شاب قال له: أريد أن أتعلم كل ما تعرفه.. بيقول للحكيم: أنا عايز أتعلم كل اللي أنت تعرفه.. قال: أصادق أنت؟ قال: نعم.. قال: فاتبعني إلى النهر.. فراح معاه للنهر.. قال: أنظر لصفحة الماء.. بص للمية.. قال له: مش شايف حاجة.. قال له: وطي دماغك.. قام الشاب موطي دماغه.. أم الحكيم أو العالم مسك دماغ الولد، وغطسها في الماء.. الواد مش عارف يتنفس.. ده عالم ولا مجنون؟ يجي يشد نفسه.. ينزله.. مش عارف يتنفس، وبعدين طلعه.. فالولد تعصب.. أنت بتعمل في إيه؟ قال له: كان إيه إحساسك، وأنت تحت الماء؟ أه أهم حاجة تسيب الدنيا كلها عشان تخدها.. قال له: الهواء.. أتنفس.. قال له: لو رغبتك للعلم أنك تتعلم أقل من رغبتك، وأنت عايز تأخذ نفس مفيش فائدة.. لما تكون رغبتك للعلم زي رغبتك للنفس تعالى عشان أعلمك كل اللي أنا أعرفه.
يقول الله تبارك وتعالى: { وَقُل رَّبِّ زِدْنِي عِلْماً } عمرك فكرت في الآية دي معناها إيه؟
كمان يا رب.. كمان يا رب.. أنا مبشبعش.. كمان يا رب زدني.. يا رب.. يا جماعة ده قرآنا هو إحنا مش حاسين بالقرآن.. أنا عايز أصرخ النهاردة.. عايز أمسك شاب شاب، وبنت بنت أقول لهم دليل قبول رمضان السنة دي.. دليل أن رمضان عمل أثر في حياتنا السنة دي.. أنك اتعلمت.. غير طريقة التعليم اللي هي بحفظ، وأراجع عشان أخش امتحان ببني دماغ.. بني آدم أن الناس بعد الحلقة دي تطلع أولادها اللي سايبين المدرسة { وَقُل رَّبِّ زِدْنِي عِلْماً }.
موسى يقول: { لَا أَبْرَحُ} مش ها يهدى، ولا ها يسترح لي بال لغاية أو أمشي عمري كله.. شوف النبي -صلى الله عليه وسلم- الآية تنزل على النبي { وَقُل رَّبِّ زِدْنِي عِلْماً } مع أن كان عمره فوق الخمسين.. يا ستات يا اللي فوق الخمسين.. لو بتحبي رسول الله، وعايزة تقلدي رسول الله { وَقُل رَّبِّ زِدْنِي عِلْماً } كمان يا رب.. كمان علمني.. كمان يا رب.
شوف النبي -صلى الله عليه وسلم- وأحاديث النبي..
"فضل العالم على العابد [اللي بيصلي كتير، وبيعيط، وبيحفظ قرآن] فضل العالم على العابد كفضلي على أدناكم" شوفوا حديث النبي -صلى الله عليه وسلم- "إن الله وملائكته وأهل السماوات ولاأرض حتى النملة في جحرها وحتى الحوت ليصلون يدعوا لمعلم الناس الخير" النملة عرفاها.. الحوت بيدعي له في الماء.. ده أنت معروف في أعماق البحار.. يا اللي عندك علم.. يا دكاترة.. يا مهندسين.. يا أستاذة جامعة.. يا شباب أي اللي عايزين تتعلموا في أكتر من كدة..
شوف حديث النبي -صلى الله عليه وسلم- "من سلك طريق يبتغي فيه علم سهل الله له طريق إلى الجنة" كل يوم علم.. يا دكتور يا اللي جيت تتعلم هنا عشان تزود علمك كل يوم بتتعلم فيه بيتفح لك باب للجنة زيادة.. شوفوا حديث النبي -صلى الله عليه وسلم- "وإن الملائكة لتضع أجنحتها لطالب العلم رضا بما يصنع" يا أخي مش طالب العلم بيذاكر، وبس.. اقرأ كل أسبوع كتاب.. كل أسبوعين كتاب.. شوف حديث النبي -صلى الله عليه وسلم- "إن العالم ليستغفر له من في السماوات ومن في الأرض حتى الحيتان في الماء".
شوفوا حديث النبي "فضل العالم على العابد كفضل القمر على سائر الكواكب" شوفوا حديث النبي "إن العلماء ورثة الأنبياء وإن الأنبياء لم يورثوا درهم ولا دينار ولكن ورثوا هذا العلم فمن أخذه أخذ بحظ وافر" طب بلاش.. شوف كلام الصحابة، والتابعين.
شوف سيدنا عليّ بن أبي طالب يقول: العلم خير من المال؛ لأن العلم يحرسك وأنت تحرس المال.
شوفوا الإمام الشافعي يقول لك إيه؟ يقول لك: طفت الأرض أتعلم العلم.. ذهبت إلى العراق فغربلتها.. ثم ذهبت إلى الشام فحويتها.. ثم ذهبت إلى مصر فأخذت ما فيها.
يا جماعة أُمَّال الأمة دي اتبنت ازاي؟ ما هوّ بالعقل كدة متبنتش بالصلاة، والصوم بس.. اتبنت بعلم مع صلاة، وعبادة، وإيمان.
شوفوا الإمام الشافعي يقول إيه؟ حفظت القرآن وأنا بن سبع سنين.. ثم حفظت الموطأ، وأنا بن عشر سنين.. ثم حفظت عشر آلاف بيت شعر.. مش علم ديني بس.. عشر آلاف بيت شعر، وأنا بن ثلاثة عشر عام.. عشر ألاف عشر.. ألاف ده 13 سنة بقى موسوعة.. قالوا له: فكيف حبك للعلم؟ يا شباب أنتم بتحبوا العلم كدة.. فكيف حبك للعلم؟ قال: عندما أسمع كلمة جديدة لم أتعلمها من قبل أتمنى لو أن كل أعضاء جسدي أذان؛ لتستمتع، وتنعم كما تنعم أذناي.
ده لو واحد قال لها في أوروبا يعملوا له تمثال.
قالوا له: فكيف حرصك على العلم؟ قال: كحرص أم فقدت ولدها تبحث عنه، وليس لها غيره.. عشان كدة اتبنت.
أحمد بن حنبل قالوا له: أنت تعبت.. أنت مشيت على رجليك من اليمن للعراق لمصر.. عشان تتعلم.. لغاية امتى؟ قال: مع المحبرة إلى المقبرة..
آه يا أمة محمد آه 40 % .
شوف واحد زي ابن رشد بيقول: لم أدع النظر في الكتب إلا يومين.. ليلة وفاة أبي، وليلة زواجي، وغير كدة معداش يوم.
النووي: عنده 40 سنة.. مات عنده 40 سنة مؤلف عشرات المجلدات.. ملحقش يتجوز.. بيقول: ألهاني بالعلم.
أقول لك إيه؟ يعني أنا مش عارف أقول إيه، ولا إيه؟ أنا كنت محضر حاجات كتير.. لكن تعالوا نكمل بعد الفاصل..
الأوجاع شديدة، والآلام شديدة.. تعالوا نكمل بعد الفاصل .
فاصل.
*************************************************
بسم الله الرحمن الرحيم.. الحمد لله رب العالمين.. انطلق موسى، ومعاه فتاه يوشع بن نون، وبيبتدوا رحلة يبحثوا عن الخضر.. قلنا 3 صفات اللي عايز يتعلم العلم..
1/ الصفة الأولى إصرار شديد على التعلم.
2/ ثاني صفة التواضع.
3/ ثالث صفة البحث عن علم مفيد.
الحقيقة ماشي يوشع، وماسك المكتل، وعمالين يدوروا على مجمع البحرين، والآيات توصف { وَإِذْ قَالَ مُوسَى لِفَتَاهُ لَا أَبْرَحُ حَتَّى أَبْلُغَ مَجْمَعَ الْبَحْرَيْنِ أَوْ أَمْضِيَ حُقُباً{60} فَلَمَّا بَلَغَا مَجْمَعَ بَيْنِهِمَا نَسِيَا حُوتَهُمَا} يا نهار أبيض يا يوشع.. ده أنت كل المطلوب تأخذ بالك.. من كتر السكة، والسفر هم معاهم المكتل.. أن القفة فيها الأكل بتاعهم، وفيها السمكة.. بس السمكة دي مش للأكل.. السمكة دي للعلامة.. إيه اللي حصل؟.
وصلوا عند مجمع البحرين.. وصلوا عند الصخرة اللي موجودة.. المفروض عندها الخضر.. نسي يوشع السمكة.. ربنا -سبحانه وتعالى- خلها يدب فيها الروح.. السمكة المشوية شوية ماء كدة في البحر طرطشوا على (القفة) جت الماء على السمكة -سبحانه وتعالى- وأنت مستغرب ليه؟ ما هوَّ كل يوم بيصحيك من النوم.. مستغرب عشان سمكة صحيت؟ ما النوم موت، وكل يوم حضرتك زي السمكة دي بتصحي من النوم.. يلا كل النفوس باللي مش النبي بيقول: لما بينام.. لما بيصحي من النوم "الحمد لله الذي أحياني بعد ما أماتني" وحضرتك نائم كل يوم.. الصبح يلا اصحى.. متستغربش أوي.. السمكة دبت فيها الروح.. فطت من (القفة) نزلت في الماء وهم ماشيين.. تعبوا، وسيدنا موسى بيقول إيه؟ الآية اللي بعدها { فَلَمَّا جَاوَزَا قَالَ لِفَتَاهُ} عدوا بقى الصخرة، ومجمع البحرين، وماشيين ماشيين { فَلَمَّا جَاوَزَا قَالَ لِفَتَاهُ آتِنَا غَدَاءنَا لَقَدْ لَقِينَا}.. أنا جعت أوي { لَقَدْ لَقِينَا مِن سَفَرِنَا هَذَا نَصَباً} بص مصر يكمل.. فيوشع فتح (القفة) يطلع الأكل.. ملقاش الإيه؟ كانوا مشيوا نص يوم، ولا حاجة.. مفيش السمكة.. { فَلَمَّا جَاوَزَا قَالَ لِفَتَاهُ آتِنَا غَدَاءنَا لَقَدْ لَقِينَا مِن سَفَرِنَا هَذَا نَصَباً} فيوشع مكسوف.. يقول له: إن هو.. {قَالَ أَرَأَيْتَ إِذْ أَوَيْنَا إِلَى الصَّخْرَةِ} متيجي نرجع تاني { فَإِنِّي نَسِيتُ الْحُوتَ} مقلوش الأول: أنا نسيت الحوت.. مكسوف؛ لأن أنا مكلفك به.. بس قال: { قَالَ أَرَأَيْتَ إِذْ أَوَيْنَا إِلَى الصَّخْرَةِ فَإِنِّي نَسِيتُ الْحُوتَ وَمَا أَنسَانِيهُ إِلَّا الشَّيْطَانُ أَنْ أَذْكُرَهُ} على فكرة الشيطان مش عايز الرحلة دي تتم أبدا.. ده لقاء عالم بنبي.. ده إحنا ها أتعلم منها علم رهيب.. في الحلقة اللي جاية.. علم رهيب..
أنتم بكرة ها تفاجئوا.. أيوة أنا عايز العلم ده بس إحنا مكناش فهمين القصة كويس.. هما ها يرجعوا تاني.. ها يقعدوا يدورا لغاية ما يوصلوا مجمع البحرين تاني.
ولذلك سيدنا موسى قال: { قَالَ ذَلِكَ مَا كُنَّا نَبْغ} بس على الأقل عرفنا { فَارْتَدَّا عَلَى آثَارِهِمَا قَصَصاً} وصلوا.. وصلوا فين؟ وصلوا عند مجمع البحرين.. يلا ننزل.. ها ها يلاقوا مين؟ أول مرة ها يلتقي موسى بالخضر.. وصلنا الآن الآية بتقول: { فَوَجَدَا عَبْداً مِّنْ عِبَادِنَا آتَيْنَاهُ رَحْمَةً مِنْ عِندِنَا وَعَلَّمْنَاهُ} شايف العلم ماشي معانا على طول، { وَعَلَّمْنَاهُ مِن لَّدُنَّا عِلْماً} في حاجتين.. { فَوَجَدَا عَبْداً مِّنْ عِبَادِنَا } أنا، وأنا بقرأ الحتة دي امبارح بالذات، وأنا بحضَّر الواحد قلبه.. يا بخته..
شوف لما ربنا يقول: ده بتاعنا.. { عَبْداً مِّنْ عِبَادِنَا} دول بتوعنا.. يا ترى أنا، وأنت.. يا ترى أنت يا ترى دلوقتي.. ربنا بيقول في الملأ الأعلى فلانة دي بتاعتي.. دي من عبادي.. دي دي هي فيها أخطاء، وفيها عيوب بس دي قلبها حلوا أوي بتاعتي.. { فَوَجَدَا عَبْداً مِّنْ عِبَادِنَا} الله.. يا بختك.. يا ريت إحنا.. يا ربت في رمضان السنة دي.. { فَوَجَدَا عَبْداً مِّنْ عِبَادِنَا آتَيْنَاهُ رَحْمَةً مِنْ عِندِنَا وَعَلَّمْنَاهُ مِن لَّدُنَّا عِلْماً} واخد بالك؟
ربط الرحمة بالعلم.. إيه؟ مش بقول لك 3 صفات..
1/ أول حاجة إصرار، وعزيمة قلناها.
2/ تاني واحدة علم مفيد..
إيه العلاقة؟ علم من غير رحمة يبقى مأساة.. دائما القرآن تيجي كلمة { رَبَّنَا وَسِعْتَ كُلَّ شَيْءٍ رَّحْمَةً وَعِلْماً} وهنا { آتَيْنَاهُ رَحْمَةً مِنْ عِندِنَا وَعَلَّمْنَاهُ مِن لَّدُنَّا عِلْماً} ليه؟ علم من غير رحمة يعمل قنابل ذرية.. يعلم جميز أفلام عنف للأطفال.. تبوظ مخيلة الأطفال.. علم من غير نهضة كارثة، وده بيعاني منه الأرض.
الآن فهو ربنا بيقول له: العلم اللي أنت رايح تأخذ علم فيه رحمة.. علم مفيد للبشرية.
الصفة التانية ها ها ينزل بقى موسى اللقاء أنا عايزك تتخيل النبي بيحكي.. فوجد رجل مسجي غطي وجه بعباءة خضراء.. طلع على الشط لقى مفيش حد خالص.. الدنيا فاضية.. ما عدا واحد نائم هو ده الخضر؟ ده اللي ربنا باعتني أتعلم منه؟ ها يعلمني إيه ده؟
ها تبدأ تبان الصفة الثالثة.. التواضع الشديد للتعلم..
طب ده نائم.. طب نصحيه؟ يوشع مثلا.. أنا بتخيل معاكم.. لا لا.. يا موسى أنت كليم الله هو يقوم لك: لا لأ.. أنا اللي جاي أتعلم منه.. هو سيدنا موسى متكسفش أن هو واخد يوشع معاه؟
خلي بالكم نفسية سيدنا موسى نفسية عظيمة.. لا لا لا دي نادة موسى قائد موسى طول عمره قائد أمة موسى طول عمره زعيم.. ها يقبل الزعيم ينزل في 24 متعلم.. إيه النفسية دي؟
أنت بقى مستعد تتعلم.. مش بقولك 3 صفات إصرار شديد، وتوضع شديد.. أنا في شباب بيرافقوني وولاد ناس أوي، ومع ذلك موافق يمسك شنطة، وموافق يساعدني في ترتيب هدومي.. هو عايز يأخذ حاجة في الآخر.. عايز يتعلم، وعلى فكرة كل اللي اتعلموا كدة، واسألوا اللي اتعلموا.. فموسى طب، ويوشع بيتفرج على.. يا سيدنا موسى الأستاذ يتحول إلى تلميذ، والأستاذ الموافق.. أنه تلميذه يشوف كدة.. إيه النفسية الجميلة دي؟
شفتم العلم.. يا جماعة دي قصة العلم.. قصة العلم.. فداخل بقى.. طب نصحيه؟ لا منصحيهوش.. طب ننام شوية لغاية ما يصحى؟ لا عيب.. يصحي يلاقينا نائمين.. نستناه لغاية ما يصحى..
يصحي الخضر ينزل الغطا من على وشه.. هو صحيح ليه سُمى الخضر؟
يا ترى عشان العباءة الخضراء التي لا تفارقه، ولا عشان وشه منور مشقر زي ما بتشوف حديقة خضراء فتنبسط وشه كدة، ولا عشان النبي حكي في حديث تاني أن أي حاجة صفرا في يده تتحول إلى خضراء؟
ده منتج.. ده بيزرع، ويعمر.. معرفش.. ممكن الثلاثة.
يقف سيدنا موسى.. السلام عليكم.. فيرد عليه.. أول رد يدلك على شخصية الرجل غريب قال: وعليك السلام، ولكن أنا بأرضك السلام.. إيه ده؟ أرضي.. الخضر عارف أرض موسى.. ده عارف مين اللي جايله.. أرضك طول ما فيها فرعون ظالم مش ها يكون فيها سلام.. يا موسى، وأنى بأرضك السلام؟
طول ما في ظلم مفيش سلام.. طول ما في اغتصاب للحقوق في فلسطين مفيش سلام، وأنى بأرضك السلام.
أظن البداية سيدنا موسى تخيل! وأني بأرضك السلام، وسكت.. على فكرة هو قليل الكلام.. فسيدنا موسى قام رادد قال: أنا موسى.. قال: موسى بني إسرائيل عارفه.. ما الذي جاء بك؟
بص التواضع قال: جئت لأتعلم منك.. بتحبوا العلم كدة يا شباب.. فقال الخضر: كأنه يختبره أو ما يكفيك أن عندك التوراة، ويأتيك الوحي؟ فقال موسى: اللي كان من شوية بيقول أنا أعلم أهل الأرض.. فقال موسى: أخبرني ربي أن عندك علم لا أعلمه فجئت لأتعلم منك.. أنت إحساسك إيه؟ ها ترجع تقرأ من النهاردة.. ها تبدأ تقرأ كل أسبوع كتاب؟
على فكرة عملوا إحصائية على أكتر شخصية ناجحة في أمريكا.. إيه اللي يجمعهم كلهم؟ وارثين؟ لا مش كلهم وارثين.. كلهم طوال؟ لا مش كلهم طوال.. كلهم عصاميين؟ لا مش كلهم عصاميين.. طب إيه الصفة اللي بتجمع أكتر خمسين ناجع في أمريكا؟ كلهم بيقرءوا خمسين كتاب في السنة.. يعني كتاب كل أسبوع.. عايز تنجح من غير قراءة.. انسى، والله يا شباب اللي ما بيقرأ ها يفضل محلك سر.. اتعلم بقى في مدرستك زي ما أنت عايز، وفي كليتك.. لازم تقرأ.
أول آية { اقْرَأْ} أول آية: { اقْرَأْ} وأني بأرضك السلام؟
جئت لتعلمني، وتبدأ الآيات اسمع بقى معايا الآيات، وشوف موسى -عليه السلام- وهو بيقول له: اسمع الآية الجميلة.. { قَالَ لَهُ مُوسَى هَلْ أَتَّبِعُكَ عَلَى أَن تُعَلِّمَنِ مِمَّا عُلِّمْتَ رُشْداً} تعرف تتواضع كدة؟ إيه شخصية سيدنا موسى السهلة المرنة دي؟ تأذن لي؟ هل تقبل؟ يعني ممكن الإجابة تكون إيه؟ لا.
وبعدين أتبعك غير أرافقك.. أنا موسى أصحبك.. أتبعك التبعية فيها أساعدك اللي تأمرين.. أعمله اتبعك أنا متبع على أن تعلمني.. ممكن تقبل تعلمني؟ أنا علمي أقل من علمك.. في حتت.. مما علمت رشد.. متدينيش كل علمك.. بس تديني جزء من علمك.. تتفضل عليّا، وتديني جزء من علمك.
العلم يا شباب.. العلم يا آباء، ويا أمهات.. أنا عندي نصيحة عايز أختم بيها للشباب، وأنا مسئول عن اللي أنا بقوله.. ده أختار هات ورقة وقلم دلوقتي، واكتب معايا.. أختار عشرة من 16 واحدة ها أقولهم بسرعة، ولو ملحقتش تكتبهم بسرعة موجودين على عمرو خالد . نت .
ال16 حاجة اللي ها يعمل ال16 حاجة دول ها يختار 10 منهم يعملهم.. أنا بوعده، وبضمن له.. مستعد أحلف له أن هو ها يصنع مستقبل لنفسه غير عادي.. ها يصنع حياة لأمته غير عادية.. سيصنع حياة غير عادية، وهو حياته ها تتغير دماغه.. ها تبقى حاجة ثانية.. ها ينضج.. ها ينجح نجاح غير عادي.
1 ـ اقرأ كل أسبوع أو أسبوعين كتاب.. دي واحد، ودي مفيش فيها منافشة، ودي برة أنك أنت متختارهاش.. يعني الباقي باختيارات بس دي من غير اختيارات.
2 ـ اقرأ جريدة هادفة كل يوم.
3 ـ اشترك في مجلة ثقافية.
4 ـ سافر لمشاهدة العالم.
5 ـ تعلم حرفة على يد صنيعي شاطر مهما كنت غني.
6 ـ زور آثار، ومعالم بلدك، ومتاحف مع خبير.
7 ـ رافق إنسان ناجح أو صاحب تجربة في الحياة، ولو تحمل له الشنطة.
8 ـ شاهد قناة دسكفري.
9 ـ استمع لنشرة الأخبار يوميا.
10 ـ ابحث عن تاريخ عائلتك.
11 ـ حاول تكتب قصة أو شعر أو أغنية أو أي فكرة أو مذكرات.
12 ـ ناقش، واسأل في الكلية أو الفصل الفائز بجائزة نوبل قال: أصل أمي، وأنا صغير كانت بتقول لي عايزاك في المدرسة.. كل يوم تسأل سؤال مفيد للأستاذ.
13 ـ العب شطرنج.
14 ـ أدخل على النت لزيارة مواقع ثقافية.
15 ـ أذهب لزيارة مكتبة عامة.
16 اشتغل في الصيف.
17 اتعلم كل 3 أشهر مهارة جديدة.. أو رياضة جديدة، ودول موجودين على النت.. اللي عايز يدخل، ويطبعهم، ويديهم للشباب، ويوزعهم في الكليات يقدر يعمل اعمل جدول من عشرة.. اختار عشرة من ال16 اللي أنا قلتهم لك.
يا أمة محمد بالله عليكم يا شباب أنتم الأمل.. عشان خاطري سيدنا موسى تعب كل ده عشان تحب العلم.. النبي -صلى الله عليه وسلم- 22 آية { وَقُل رَّبِّ زِدْنِي عِلْماً } النبي علم الصحابة في بدر بدل الفلوس.. عشان نفهم الكلام ده..
أسأل الله تبارك وتعالى أن حلقة بكرة تفيدنا إن شاء الله.. إني داع فأمنوا..
يا رب يا ذا الجلال والإكرام.. يا حنان.. يا منان.. يا أكرم الأكرمين.. يا أرحم الراحمين.. يا من قلت في كتابك { وَقُل رَّبِّ زِدْنِي عِلْماً } يا رب زدنا علما.. علما.. يا رب الأمة هذه الأمة اجعلها تعشق العلم.. يا رب شبابنا، وبناتنا يا رب نستغيث بك أميين في بلادنا لا يقرءون، ولا يكتبون.. يا رب اجعل رمضان هذا العام.. اجعل رمضان العام القادم فاتحة خير لإنقاذ أطفال من التسرب.. لعودة شباب للقراءة.. يا رب اجعل أمة اقرأ تقرأ.. اجعل أمة اقرأ تقرأ.. يا رب نعوذ بك أن نأتي يوم القيامة، وقد تعلم العالم، وجئنا نحن جهلاء.. علمنا ما ينفعنا.. علمنا ما يرحم به العالم يا أرحم الراحمين.. يا أكرم الأكرمين.. نبيك كان يقول: "اللهم إني أعوذ بك من علم لا ينفع" علمنا ما ينفعنا.. نبيك علمنا أن "الملائكة تضع أجنحتها لطالب العلم رضا بما يصنع" حببنا في العلم.. حبب شبابنا في العلم.. نبيك علمنا أن "من سلك طريقا يبتغي فيه علم سهلت له طريق إلى الجنة" حببنا في القراءة، وافتح لنا أبوب الجنة.. في رمضان اجعلنا نحب العلم.. اجعل شبابنا يعشقون العلم.. يا رب إن الأمر أمرك يا ذا الجلال والإكرام.. الأمر أمرك يا من شوقت بني إسرائيل لتعلم العلم، وجعلتهم بقصة الخضر يتعلمون العلم.. يا ذا الجلال والإكرام اقذف في قلوب الشباب في رمضان حب العلم.. أعن الآباء، والأمهات على تشويق الشباب للعلم يا ذا الجلال والإكرام.. اجعل أمة حبيبك محمد تقرأ.
أمة حبيبك محمد لا تقرأ.. يا رب اللهم إنا نخجل، ونستحي أن نلقاك يوم القيامة، وأمة اقرأ لا تقرأ.. نستحي منك يوم القيامة.. نخجل.. اللهم اعذرنا بأن نساعد في هذا الأمر.. نعوذ بك أن نحاسب على هذا الجهل يوم القيامة.. يا رب أعنا لنأخذ بيد الناس للتعليم.. يا رب أعنا.. اجعل رمضان، والعام القادم فاتحة خير على علم الأمة.. لننهض؛ لتحي هذه الأمة.
أحي بنا الأمة.. اجعل نهضة هذه الأمة على أيدينا.. اجعل نهضة هذه الأمة على أيدينا يا رب آمين.. آمين.
وصلِّ، وسلم، وبارك على سيدنا محمد.
والسلام عليكم ورحمة الله وبركاته.
المصدر: http://alresalah.ws/programs2/index.jsp?inc=36&id=1436&lang=ar&cat=74&type=1