|
|
|
| عمرو خالد |
الآية الربانية اللي ربنا جعلها لينا.. الحقيقة بس قبل ما نبدأ، ونوصل، ونروح الكهف أنا عايز أفكركم.. ست.. سبع شباب حملوا رسالة.. عايشين بحلم عايزين نصلح البلد.. عايزن الناس تقول: لا إله إلا الله.. عرف الملك اضطهدوا الملك أمر بالقبض عليهم؛ ليقتلوا.. قرروا أن هم يأخذوا اختيار أن هم لا نروح الكهف نخطط، ونفكر هناك، وبعدين نرجع الشباب كانوا بدءوا يأخذوا بأيد أهل البلد، ويحببوا أهل البلد فيهم، وعملوا خير، وعملوا مشروعات، وكانوا خلاص فاضل أن هم يعلموا الناس لا إله إلا الله.. خلاص الناس حبتهم، وسمعت ليهم، وعملوا خير كتير، وجاهزين يقولوا في اللحظة دي.. اكتشف أمرهم..
يا خسارة..
كنا خلاص عايزين نوصل الرسالة.. ووقفنا على الحتة دي أمبارح، وإحنا بنقول أكيد كانوا بيسألوا نفسهم يا رب ده إحنا كنا بنشتغل عشانك.. يا رب إحنا كنا عايزين نحبب الناس فيك.. نتعرف دلوقتي، ونهرب، وخلاص، وتنتهي الرسالة على كدة.
طب، وبعدين ليه يا رب؟ آه الحكمة.. فقلنا أن ربنا -سبحانه وتعالى- من أسمائه الحسنى الوكيل.. يحب يشوفك تتوكل عليه.. يحب يقول لك: اعمل اللي عليك، والنصر من عند الله -سبحانه وتعالى- وشوف ربنا -سبحانه وتعالى- ها يغير الدنيا ازاي؟
خليني أقولها لكم بطريقة تانية.. لو أنت عندك حلم كبير نفسك تحققه..
الأول: أنتم عندكم حلم يا شباب ؟ حد عنده حلم كبير ؟
متقصرش الحلم على نفسك.. بلاش الأحلام المحدودة جدا.. أنا كل حلمي يبقى معايا فلوس، أن كل حلمي يبقي شكلي كويس، أنا كل حلمي أتجوز، أنا كل حلمي.. وهي حاجات مهمة، وكلنا عندنا الأحلام دي، وأحلام عظيمة.. بس كبر يا أخي.. كبر حلمك.. كبر، وأحلم، وشوف الحلم 3D شوف الحلم بكل الأبعاد، وتشوفه بالألوان، وكبره، وعيشه.
أنا عايز أبدء إن أهل الكهف كان عندهم حلم.. الأولاد دول عندهم حلم ، حلم آه، حا نصلح البلد، ونحبب البلد في ربنا.. أنت حلمك إيه بقى؟
طب قريتك مين يقول حلمي قريتي؟
القرية دي ها أخليها تأكل، وتشرب، وتعيش أحسن عيشة، وأعلم أولادهم ، أنا ها أرجع لقريتي، وأساعدها.. أنا الميديا.. أنا الانترنت.. كل واحد يشوف له حلم يا جماعة احلموا، يا جماعة الحاجة الأساسية اللي تميز الإنسان على الكائنات الأخرى القدرة على الحلم، الأسد ما يعرفش يحلم.. الأسد ها يفضل أسد.. لو بعد 100 سنة ها يفضل أسد؛ لأن ربنا شال الدسك ده.. طلع من دماغه.. مفيش حاجة اسمها حلم.. ما يعرفش يتخيل نفسه بعد عشرين سنة.
المخلوق الوحيد اللي يتخيل نفسه بعد عشرين سنة هو الإنسان.. القدرة على استشراف المستقبل ازاي تحرم نفسك من أهم خصائص الإنسانية؟
القدرة على الحلم اللي مبيحلموش دول يا عيني مش عايشين.. ما ينفعش.. عندك حلم أنا كدة بحللك أهل الكهف.. ست.. سبع شباب 15، 16 سنة بس عندهم حلم مين من شبابنا عندهم حلم كبير لبلده؟ لربنا.. يرضي ربنا يدخل به الجنة..
أول حاجة: عندهم حلم.
تاني حاجة: عندهم أمل.. ما هو اللي معندوش حلم ليه يبقيى عنده أمل؟ وفي ناس عندهم حلم، وتيأس. حلم وأمل ده أنت تغير الدنيا.. وجه يتغير يصلح الدنيا.. حلم وأمل اديني الاثنين دول حلم وأمل، واشتغل.
أصل أنا عايز أفهمك حاجة.. أنت دائما لما يبقى نفسك تعمل حاجة.. لكن شايف أن إمكانياتك متوصلكش.. أنت عندك حلم.. أنت واقف في نقطة (أ) حلمك فين نقطة (ي) البلد تتصلح.. الناس تحب ربنا.. أي كان الحلم أنت في نقطة (أ) الحلم فين؟ في (ي) يا نهار أبيض.. يعني كل الحروف الأبجدية من (أ، ل، ي) لا أنا مش ها أعرف أوصل.. طب أنت قدرتك لغاية فين ؟
بس يعني من (أ) لـ (ب) ومن (ب) لـ (ي) معندكش؟ لا معنديش، والله طب اتحرك من (أ) لـ (ب) وشوف ربنا ها يكملك أزاي من (ب) لـ (ي)..
دي قصة أهل الكهف.. هما في الحلقة بتاعت امبارح ممكن يتحركوا.. اتحركوا ما قعدوش.. ما قالوش مفيش فائدة زي ما الشباب عندنا بيقول يا عم قريتي إيه؟ يا عم أنت بتحلم.. أعمل مشروع خيري إيه؟ كلام.. أنا عندي كام سنة عشان أعمل الكلام ده؟
قصة أهل الكهف سبع شباب غيروا.. ممكن تتحرك من (أ) لـ (ب) بس لـ (ب) مش تيجي قبل (ب) بشوية، وتقولي كفاية.. كفاية كدة.. لا.. لغاية آخر (ب) جبت أخرك؟ آه جبت أخري.. عندك حاجة ثانية؟ معدش في حاجة.. ما هو أصل أهل الكهف كدة ، عملتم اللي عليكم.. آه وصلتم لـ (ب) ، آه ، كلمتم كل الناس آه ، بص بقى ربك العظيم الوكيل ثاني اسم الوكيل ازاي ها يوصلك من (ب) لـ (ي ) هي دي الدنيا، والله هي دي الدنيا، والله اللي مش فاهم الدنيا كدة مش فاهم حاجة، واللي بيعملوا إنجازات غير عادية، اوعى تفتكر أن كان عنده كل الإمكانيات.. اشتغل لغاية قدراته، وربه كمله الباقي.. ممكن تشتغلوا.. ممكن يا آباء تعلموا ولادكم الفكرة دي؟ حكاية (أ) و (ب).
وعلى فكرة القرآن قال الحكاية دي في سورة الأنفال.. الصحابة طالعين يوم بدر 313 بيواجهوا 1000 ما ينفعش بالورقة والقلم.. ما ينفعش.. فربنا يقول لهم إيه؟ { وَأَعِدُّواْ لَهُم مَّا اسْتَطَعْتُم}.. اوصلوا بس لـ (ب) ما استطعتم، على قد آخركم.. لغاية ما عملوا.. بص يقول لهم إيه في نفس السورة؟ ْ{ وَمَا رَمَيْتَ إِذْ رَمَيْتَ وَلَـكِنَّ اللّهَ رَمَى } مش الآيتين وراء بعض في نفس السورة.. عملت اللي عليك؟ بص ها أكمل لك ازاي؟ الوكيل.. ممكن تعرف من قصة الكهف النهاردة اسم الله الوكيل، ممكن تحب الوكيل؟ من أسماء الله الحسنى الوكيل اللي لما تعمل اللي عليك وتقول له: توكلت يا رب ، يكمل لك مسيرتك وحلمك.
شفت الأمل جه منين؟ آه جه الأمل فكأن الفكرة إيه أنت عارف الوكيل زي إيه؟ حد راح الشهر العقاري أو كاتب عقد في سوريا، ولبنان، وكدة رحت لكاتب عقد يقول لك: توكل مين؟ تقول له: أوكل فلان.. يعني إيه؟ يعني هو مسئول عن كل تصرفاتي، وأعمالي.. يقول لك: امضي تمضي أنك وكلته.. خلي بالك الإمضاء دي تعني أنك أنت وكلته ها يتصرف في كل حياتك تمضي مضيت.. أنا واثق فيه.. أنا متأكد منه.. أنا بقى بقول لك تمضي لربنا مش اسمه الوكيل تمضي تعمل اللي عليك، وتقوله وكلتك، وتفوت في الحديد، ومتخفش تتوكل على الله.. وكلتك.. طب أمضي ازاي؟ تقول: حسبي الله ونعم الوكيل.. بس تقولها مش كلام بس.. إحساس.. قصة أهل الكهف بالضبط اللي أنا بقوله لك دلوقتي الوكيل.. شوف الوكيل ازاي ها يدبر لهم حياتهم؟
أصل دي 300 سنة يا جماعة في 90 متر الكهف مساحته 90 متر 300 سنة في 90 متر.. حاول تتخيل بقى شوف بقي تركيبات الوكيل أول حاجة، ونفتح مع بعض سورة الكهف علشان هي سورة الكهف اللي ها تحكي لنا، وها توضح لنا والآيات بتقول لنا ازاي الوكيل لو أنت توكلت عليه، واشتغلت لرسالة، واشتغلت عليها ازاي الوكيل -سبحانه وتعالى- يدبر لك، ويحفظك، وييسر أمرك.
ها أول حاجة تصميم الكهف.. يا جماعة الكهف متصمم تصميم رباني عجيب.. لو قلت لك: والله شقة مكيفة مش ها تصدق.. شقة مكيفة.. يعني أنا مش مصدق أن دي حاجة حصلت جوة الجبل.. يا رب ازاي ده متصمم كدة كأني داخل شقة.. تدخل كأن حجرة استقبال، وبعدين الحجرة اللي ناموا فيها، وبعدين مكان بيخش منه الهواء.. بس بفتحة الفتحة؛ لأن دول ها يقعدوا 300 سنة.. فممكن الأجساد تتعفن.. دول نائمين مش موتى.. ممكن الأجسام تتعفن، وممكن الأجساد يحصلها حاجة.
الفتحة يدخل منها هواء، وشمس.. الفتحة دي ما يخشش منها الهواء مباشرة.. دي في فتحة بعيدة كأن سرداب عشان يدخل الهواء بعد ما يكون مر لو برودة أوي يمر في السرداب يوصل كويس، ولو الدنيا حر أوي يمر الهواء في السرداب يمر كويس، وتوصل شوية أشعة شمس محدودة عليهم في الكهف.. عشان ربنا يحافظ عليهم 300 سنة.. بيخش لهم هواء، ويخش لهم شمس.. بس ما بيخشش بكميات كبيرة.. مفيش حاجة اسمها الشمس ضربت { وَتَرَى الشَّمْسَ إِذَا طَلَعَت تَّزَاوَرُ عَن كَهْفِهِمْ ذَاتَ الْيَمِينِ} وهي طالعة تضرب لا ما تخشش على الكهف.. الكهف متصمم بطريقة متجيش في وشه الشرق، الكهف جنوب شرق.. فتحة الكهف. فالشمس وهي طالعة أشعة الشمس متضربش في الكهف.. لكن وهي بتغرب يا دوب تخش الشمس حاجة بسيطة عشان تبقى أشعة بسيطة تدخل.. إيه التركيب الرباني ده؟ لو قلت لكم: أن لو واحد عايز يصمم قصر ناس ها تقعد جواه 300 سنة استحالة يعرف يصممه كدة.. لو ناس واحد قالوا له: صمم قصر ناس ها تقعد جواه ما يخرجوش، ويتقفل عليهم.. ازاي ده اتصمم؟ 90 متر تصميم رباني.. الوكيل مش هم قالوا: { رَبَّنَا آتِنَا مِن لَّدُنكَ رَحْمَةً} أدي أول رحمة.. خشوا في المكان العجيب لا، وبص بقى الرحمة الثانية، وبص الوكيل..
النقطة الثانية: كل الأشياء مأمور حولهم.. الشمس، والقمر، والهواء، والحرارة، والبرودة مأمورة أن هي تحافظ عليهم جوة الكهف بنسب معينة، وتدخل بكميات معينة.. لا ومش كدة وبس..
الآية تقول لك إيه؟ { وَتَرَى الشَّمْسَ إِذَا طَلَعَت تَّزَاوَرُ عَن كَهْفِهِمْ} الشمس مأمورة.. يا شمس لو سمحت 300 سنة لا تؤذيهم بشمسك، ولا بحرك مين اللي يستطيع أن يأمر الشمس يقول لها؟
يا جماعة روح لربنا.. توكل على ربنا ده جنوده الشمس، والقمر، والهوا، والبرد، والحر.. يا عقارب.. وحيات اطلعوا برة الكهف.. ممنوع تخشوا يا عقارب، ويا حيات تخشوا الكهف ده لمدة 40 سنة برة الكهف.. ده رحمة من ربنا يحميهم لمدة 300 سنة لغاية ما ربنا يأذن.
أصل هم إيه؟ أصل أنت مش واخد بالك.. أصل الوكيل عمل إيه؟ مش أنتم تحركتم من (أ) لـ (ب) مش بذلتم اللي عندكم.. روحوا بقى استريحوا، وناموا علشان ربنا ها يكمل المسيرة.. أنتم حا تصحوا الناس بمنامكم أكتر ما كنتم مصحينهم بصحيانكم؛ لأن اختفاؤكم، واللي عملوا فيكم الملك ها يخلي البلد كلها تفوق.. آه الناس العظام دول.. فتبدأ البلد تتعلق بيكم.. فتبدأ البلد تقول: إحنا عايزن نمشي على مسيرة الناس دول.. فكان نومهم أفيد للرسالة من صحيانهم، والوكيل ، والثواب شغال 300 سنة.. واخدين ثوابهم وهم نائمين.. الوكيل يكمل لك.. فشوف أول حاجة تصمم الهدف.
ثاني حاجة: جنود ربنا مأمورة.. شمس، وهواء { وَتَرَى الشَّمْسَ إِذَا طَلَعَت تَّزَاوَرُ عَن كَهْفِهِمْ ذَاتَ الْيَمِينِ وَإِذَا غَرَبَت تَّقْرِضُهُمْ ذَاتَ الشِّمَالِ وَهُمْ فِي فَجْوَةٍ مِّنْهُ } جوة الكهف في فتحة كأن المنطقة دي لمزيد من حفظ الحرارة، والبرودة بدرجات مناسبة.. مختلفة عن باقي الكهف.. حتة نازلة في الكهف فترتيب رباني عجيب.. ازاي الكهف متصمم كدة؟
{ وَهُمْ فِي فَجْوَةٍ مِّنْهُ ذَلِكَ مِنْ آيَاتِ اللَّهِ} وبعدين النقطة الثالثة أنت مش واخد بالك أن الناس دي نامت 309 سنة؟
يعني ربنا -سبحانه وتعالى- يغير خواص الأشياء.. أنا أعرف واحد ينام يومين لكن 309 سنة نائمين، ولذلك الآية تقول: { فَضَرَبْنَا عَلَى آذَانِهِمْ } دول نائمين {وَنُقَلِّبُهُمْ ذَاتَ الْيَمِينِ وَذَاتَ الشِّمَالِ} دول مش موتى.. دول نائمين { ذَلِكَ مِنْ آيَاتِ اللَّهِ } نومهم 309 سنة.. آية من آيات ربنا عشان الرسالة ها تكمل.. ربنا ها يورينا أنت عملت اللي عليك.. شوف ربنا ها يكمل ازاي وها يصحيهم يوريهم.. شوفت أنا كملت لكم ازاي بقى؟ عندكم أمل ولا لا؟ ها تتفقوا في الوكيل ولا لا؟ كأنها رسالة لكل واحد موجود اعمل اللي عليك، وملكش دعوة أنا ها أكمل لك، وها أوريك آيات سبع شباب 16 سنة.. ربنا يعمل لهم كهف كدة، والشمس تسمع الكلام الشمس.. يغير نواميس الكون عشان 16 سنة.. أنت مش واثقة في ربنا ليه؟ لا وبعدين بص اللي جاية دي جميلة جدا جدا ها يناموا ممكن يحصل إزعاج حول الجهل.. فيصحوا دقيانوس (الملك) اللي اضطهدهم، وعايز يقتلهم.. الجواسيس بتوعه قالوا له: غالبا الأولاد دول دخلوا الكهف.. ما يعرفش ماتوا، ولا صاحيين فعمل إيه؟
قال لهم: عشان الناس تنساهم أو عشان يتخنقوا جوة، ويموتوا روحوا سدوا باب الكهف بحجارة أتاري ربنا ها يعمل كدة عشان يناموا براحتهم 309 سنة { وَمَا يَعْلَمُ جُنُودَ رَبِّكَ إِلَّا هُوَ}، { وَيَمْكُرُونَ وَيَمْكُرُ اللّهُ} الوكيل يا إخواننا انتم بتتكلم في إيه؟
يروح يحط حجارة عشان يقفلوا باب الكهف 309 سنة، ومش واخدين بالهم أن في فتحة في أعلي الكهف بس الباب اللي بيخش منها الهواء، والشمس.. أتاري الكهف في من فوق فتحة غير باب الكهف بيدخل، وأنتم ها تشوفوا دلوقتي لما نروح نشوف، وأنا ها أقعد جوة الفتحة ازاي؟
طفينا النور جوة الكهف زي ما كانوا عايشين، ودخلت أنا في الفتحة، وفجأة الكاميرا جابتني رغم أن الدنيا مظلمة تماما، وشيء منور الكهف.. بيدخل من السرداب ده.. الشمس كل يوم قبل المغرب تتعامد تنزل شوية أشعة عشان تتحفظ الأجساد، ويدخلها هو الوكيل.. اقفل يا دقيانوس الباب.. اقفل الوكيل موجود , وأنت في حياتك محتاجة تعرفي الوكيل ، وفي حياة كل واحد قاعد هنا معجزات وآيات من الوكيل..
يا أخي توكل بقى.. شيل رسالة بقى.. خائف من إيه؟ احمل رسالة، واشتغل، وعيش لربنا.. عيش لربنا الوكيل -سبحانه وتعالى- يا ستات يا اللي عندكم مشاكل في حياتكم ثقي في الوكيل.. توكلي على الله.. امضي.. امضي له توكلت على الله حسبي الله ونعم الوكيل، واشتغل، وصلح.
سورة الكهف عرفتم ليه ربنا بيقول لنا اقرءوا سورة الكهف كل يوم جمعة، وليه يقول لنا: اللي يقرأ سورة الكهف يوم الجمعة ربنا يضيء له نور ما بين السماء والأرض؟
عشان ها تعملك الحاجات دي.. توكل على ربنا.. اشتغل لرسالة متستصغرش نفسك ما هي دي سورة الكهف، واقرءوها كل يوم جمعة عشان تفضلوا فاكرين المعاني دي.. دقيانوس طب ما هتقولي أتفل عليهم باب الكهف.. ها يخرجوا ازاي؟ صعبة دي سهلة على الوكيل -سبحانه وتعالى- بعد 309 سنة بعد ما تتصلح الأرض عشان ربنا يخليهم يشوفوها، ويصحيهم هيجي واحد صاحب مزرعة.. جنب الكهف عايز يبني سورة للمزرعة بتاعته.. ها يقول للعمال بتوعه خدوا لي شوية الحجارة اللي عند باب الكهف عشان تبنوا لي السور بتاع المزرعة عشان يتفتح باب الكهف.. سهلة أوي على ربنا مش قفلت عليهم يا دقيانوس عشان يناموا من غير مشاكل 309 سنة بس الآية تقول لك إيه؟ { وَكَلْبُهُم بَاسِطٌ ذِرَاعَيْهِ بِالْوَصِيدِ} أنتم ها تشوفا الوصيد دي سلمة في الكهف، { وَكَلْبُهُم بَاسِطٌ ذِرَاعَيْهِ بِالْوَصِيدِ} وإيه قيمتها دي في اسم الله الوكيل؟ إيه علاقتها بيهم؟ ما هم ممكن برضوا تحد يعدي من أمام الكهف.. فالكلب ده محدش يعدي عارفين يافطة ممنوع الاقتراب أي عيال معدية الحق كلب كأن ربنا -سبحانه وتعالى- كل شيء معد ليناموا في هدوء 309 سنة.. لا لسة الوكيل في حاجة ثانية..
آية جميلة أوي أوي { وَنُقَلِّبُهُمْ ذَاتَ الْيَمِينِ وَذَاتَ الشِّمَالِ} بنقلبهم وهم نائمين 309 سنة ذات اليمين، إيه قيمتها دي؟ لا دي حلوة أوي أوي.. ازاي يا جماعة؟ الإنسان اللي نائم حد يعرف علميا الإنسان وهو نائم بيتقلب كام مرة في اليوم؟ ياللي وأنت نائم بتقلب كام مرة على الأقل 30 مرة 30 مرة في الليلة لا إراديا.. ليه بتقلب؟ لأن الهيكل العظمي بيضغط على العضلات.. العضلات بتضغط على الأوردة.. فبتحس بألم مش ساعات تصحى حاسس بألم فتقوم متقلب.. فأنت بتتقلب لا إراديا 30 مرة في الليلة عشان عملية الضغط.
طب لو فضل الضغط مدة طويلة نام كل الليلة على جنب واحد يحصل له إيه؟ يحصل بعد شوية حاجة اسمها قرحة السرير.. إيه قرحة السرير دي؟
يبدأ يحصل تمزق في العضلات، واللحم يتمزق.. اسمها قرحة السرير.. مرض شديد.
طب لو واحد سؤال لو واحد فاقد الوعي أو غير قادر على الحركة بيعملوا إيه في المستشفيات؟ يدخلوا كل شوية يقلبوه..
الآية تقول لك: { وَنُقَلِّبُهُمْ ذَاتَ الْيَمِينِ وَذَاتَ الشِّمَالِ} شفت حنان ربنا.. شفت الحنان.. شفت الحب..
طب أسألك سؤال 30 مرة في الليلة يبقى كام مرة في السنة؟ يبقى في ال 309 سنة؟ قلبهم كام مرة؟ يبقي الوكيل عامل معاهم إيه؟ يبقي يعمل معاك إيه؟
يا.. أهي نقلبهم دي كلها حنان.. كلها حب، { وَنُقَلِّبُهُمْ ذَاتَ الْيَمِينِ وَذَاتَ الشِّمَالِ وَكَلْبُهُم بَاسِطٌ ذِرَاعَيْهِ بِالْوَصِيدِ} كل دول جنود ربنا كل ده يا رب دول سبعة.. دول مش أنبياء يا رب، ولا صحابة دول شباب.. با شباب روح لربنا، وتوكل عليه.. يا بنات يا جماعة اللي يعيش لربنا يسعده دنيا، وآخرة اللي يعيش لرسالة إللى يعيش للناس.. الأولاد دول كانوا عايشين للناس اللي يعيش يحبب الناس في ربهم، ويساعدهم، ويأكلهم، ويعمل لهم مشروعات، ويشوف بلده، ويشوف قريته اللي يعش لنفسه يعيش لنفسه مش ها يشوف الوكيل كتير { وَنُقَلِّبُهُمْ ذَاتَ الْيَمِينِ وَذَاتَ الشِّمَالِ وَكَلْبُهُم بَاسِطٌ ذِرَاعَيْهِ بِالْوَصِيدِ} بص اللي جاية برضوا من الوكيل {لَوِ اطَّلَعْتَ عَلَيْهِمْ لَوَلَّيْتَ مِنْهُمْ فِرَاراً وَلَمُلِئْتَ مِنْهُمْ رُعْباً} هم كانوا راحوا الكهف خائفين، وهم نائمين اللي يشوفهم يخاف.. كأن ربنا بيقول: اللي يبقي معايا مش هو اللي يخاف.. هو اللي يتخاف منه.. لو حد ظالمه { لَوِ اطَّلَعْتَ عَلَيْهِمْ لَوَلَّيْتَ مِنْهُمْ فِرَاراً}.
ها فين الملك بإمكانياته؟ شايف جنود ربنا.. شمس، وقمر، وهواء، ونور، وكهف متصمم، وفتحة من فوق { وَمَا يَعْلَمُ جُنُودَ رَبِّكَ إِلَّا هُوَ} متخيل بقى الملك، والجنود بتوعه تحت في القرية.. قُلبت الدنيا عليهم وهم في سابع نومة مع الوكيل.. نائمين، ومسترحين.. البلد مقلوبة تحت، والملك الحراس، والملك ها يتجنن غضبان غضب، وهم بينهم عشرة كيلوا، وفي منتهى الأمان مع الله -سبحانه وتعالى- مع الوكيل نائمين ملئ الأجفان.
خليك مع ربنا، ومتخافش.. ده اللي حصل جوة الكهف.. ده اللي حصل.. عرفت ليه الأية بتقول لك: { أَمْ حَسِبْتَ أَنَّ أَصْحَابَ الْكَهْفِ وَالرَّقِيمِ كَانُوا مِنْ آيَاتِنَا عَجَباً} شايف ترتيبات ربنا -سبحانه وتعالى- ده اللي حصل جوة الكهف، ودي آيات ربنا جوة الكهف.. لكن إيه اللي حصل برة الكهف؟ وإيه اللي حصل مع أهلهم، ومع الملك؟
تعالوا نطلع فاصل، وبعد الفاصل نشوف إيه اللي حصل برة الكهف؟ بعدين نروح للكهف نفسه، ونتفرج عليه، وأروح معكم الكهف، ونكمل بقيت حلقة النهاردة.. نشوفكم بعد الفاصل إن شاء الله .
فاصل.
*************************************************
بسم الله الرحمن الرحيم.. الحمد لله رب العالمين.. بنكمل مع أهل الكهف.. شباب ستة، سبعة عندهم 15، 16 سنة، وجه يتغير.. ربنا يغير به الدنيا.
طب إيه اللي حصل برة الكهف؟ إيه؟ أهلهم حصل إيه؟ دوروا عليهم.. اختفاء شاكين أن الملك عمل فيهم حاجة، والبلد كلها شكة الملك خلص عليهم.. الأولاد اختفوا.. طب أهلهم بكوا كتير طبعا، وبعدين كملوا الحياة.. هكذا طبيعة الحياة. طب، والملك عمل إيه؟
الملك من اليوم ده بقى عنده نقطة ضعف.. اهتز؛ لأن البلد كلها بصَّالُه قتلت شباب عندهم 15 سنة؛ لأن هو خلي بالملك عرف الناس بدعوتهم.. لما صاح، وقال: دول آمنوا.. الناس كانت عارفة أن هم عملوا خير.. بس مش عارفين أن هم عملة خير مع الناس.. الشباب السبعة.. لكن مكنوش لحقوا يقولوا للناس: لا إله إلا الله.. الملك قال: دول مؤمنين، وقلب الدنيا، والحراس في كل مكان.. الملك هو اللي عرف الناس بالرسالة.
الوكيل -سبحانه وتعالى- الملك ساعة ما غضب، ونشر الحراس.. هاتوا لي العيال دول.. أصل دول بيقولوا لا لا إله إلا الله.. أهل البلد قالوا: هم اللي كانوا بيعملوا معانا الخير دول كانوا عايزين يعرفونا بلا إله إلا الله؟
طب وهو عايز يعمل فيهم إيه؟
دول كانوا بيخدمونا.. دول كانوا بيساعدونا.. الملك عرف الناس بلا إله إلا الله .. الوكيل.. امشي من (أ) لـ ( ب) وربك ها يكمل من (ب) لـ (ي)..
طب الناس نسيتهم؟
أبدا.. ده الناس افتكرتهم زيادة.. بجد ده الناس افتكرتهم أكثر، وأكثر ازاي؟
بص الآية بتقول لك إيه؟
في آية خطيرة محدش واخد باله منها.. { أَمْ حَسِبْتَ أَنَّ أَصْحَابَ الْكَهْفِ وَالرَّقِيمِ} إيه الرقيم؟ واشمعني جت كلمة الرقيم جنب كلمة الكهف؟
أصل ده بنفس الأهمية.. آه هو.. إيه الرقيم أصلا؟ إيه؟ خطيرة دي.
الرقيم: اللوح الخشبي أو اللوح النحاسي اللي بتتحفر عليه الأسماء.
إيه اللي حصل؟
أهل البلد حفروا أسامي السبعة على لوح خشبي عشان تفضل ذكراهم حية للأجيال.. كأن المعنى إيه؟
منسيهمش { أَمْ حَسِبْتَ أَنَّ} ..الرقيم مبيرحش.. خلدت ذكراهم، والرقيم في حياتك مش ها يروح.. لما تعمل خير مش ها يروح..
عشان كدة السورة ختمت بإيه؟
خلي بالكم السورة دي بعد قصة أهل الكهف.. إيه؟ { إِنَّا لَا نُضِيعُ أَجْرَ مَنْ أَحْسَنَ عَمَلاً } الآية الشهيرة دي جت فين؟ بعد قصة أهل الكهف.. الآية دي في سورة الكهف { إِنَّا لَا نُضِيعُ أَجْرَ مَنْ أَحْسَنَ عَمَلاً }.
الناس جابت رقيم، وكتبت عليها أسامي الأولاد، وحفظوهم ومنسيهمش.. الاختفاء المثير.. طريقة اختفاء الأولاد خلت البلد كلها متعلقة بيهم.. حبتهم.. بدأت الهمهمة، وبدأت ذكراهم.. دول عرفونا بربنا.. دول غير الملك.. دول.. يلا نخلد أسمائهم.. بدأت الآباء تقول: لأولاده عشان الأجيال اللي جاية ال 300 ها يفضل في عيد سري بين الناس، وبعضها الأولاد دول وقفوا معانا.. الوالد دول أكلونا يا بني الفلوس دول بسبب الأولاد اللي ساعدونا.. بس دول كانا بيقولوا لا إله إلا الله، وملحقوش يقولونا، واختفوا، والله أعلم الملك عمل فيهم إيه؟
والملك اللي عرفنا أن لا إله إلا الله، والناس تتداول الرقيم.. يا جماعة الرقيم.. يا جماعة ربنا مبيضيعش أجر من أحسن عملا.. يا جماعة أي واحد ها يشتغل لربنا.. ها يعمل خير.. الرقيم موجود.. عايز تخلد اسمك في الرقيم.. عايز تخلد اسمك عند ربنا؟
اشتغل.. اعمل حاجة مفيدة.. اوع تمشي من الدنيا.. من غير ما تسيب بصمة.. في ناس بتمشي من الدنيا بلا بصمات.. عاش لنفسه، وعياله، وبس، وفي ناس بتمشي وسايبة بصمة رمل شوية رملة تطيرها، وفي ناس بتحفر بصمتها في الصخر.
أنا جيت الدنيا، وعملت كدة.. الرقيم.. الرقيم دي حلوة أوي.. مش ها تتنسوا، واللي عملتوه مش ها يروح هدر، وكل واحد هنا يا جماعة تخيل حلاوة أن بعد ما تموت بعشرين سنة يجي حفيدك، ويقول: جدي عمل كذا.. الله يرحمك يا جدي، ويرضى عنك، وأنت مت من عشرين سنة.. حلوة أد إيه؟
يا جماعة أنا، وأنا صغير جدي كان بيجبني، وأنا عندي سبع سنين.. جدي مات دلوقتي من سنين طويلة من كذا، وثلاثين سنة.. جدي كان بيجبني يأخذني أحياء فقيرة، ويدي الفقراء، وكنت بشوف الحاجات دي، وكان يجبني يعلمني قصص الصحابة، وزي ما حكاها لي طلعت أنا أحكيها في خطى الحبيب، وأحيانا وأنا بدي في خطى الحبيب كنت بشوف جدي..
الخير ما بيروحش، ولغاية النهاردة بقول: الله يرحمه، وساعات بـ أفتكره وأنا ماشي لوحدي.. اعمل خير.. خلدوا أسمائكم.. مش تحب بعد ما تموت تفضل حي كأن الرقيم موجود؟
إن الله لا يضيع.. حط اسمك في الرقيم.. خلد اسمك.. اوع تمشي من الدنيا وأنت صفر.. أنا عايزك تتخيل معايا مثل هو متعب في الأول بس دمه خفيف..
أنا عايزك تتخيل يوم جنازتك.. ها تقول لي: يا عم إحنا قاعدين في رمضان حلوين ليه حا تعكنن علينا؟
يا سيدي ولا تزعل.. جنازتي أنا.. أنا في النعش تخيل، وفي أربعة شايلني، وماشيين بيا.. معلش ها أرجع عليك ها أقول لك ليه دلوقتي، وفي ناس شايلاك، وفي أربعة ماشيين وراك.. أربعة من أصحابك، وأنت جوة النعش وهم أصحابك دول، وبيتكلموا عليك، وأنت سامعهم بس مش قادر تنزل.. طبعا.. تخيل بس.. تخيل معايا، وأنت سامعهم بيتكلموا عليك.. عارف بيقولوا إيه؟ بيقولوا الله يرحمه زي ما جه زي ما مشي.. الله يرحمه جه، ومعملش حاجة.. عاش لنفسه وعياله وبس يآه...
أنا ضحكت بس تصدق مؤلمة أوي أوي.. ساعتها ها تبقي عايز تصرخ أو تخيل أنت في نعشك وماشي وراك مئات الأيتام الله يرحمها دي اللي صرفت علينا.. دي اللي أعطيتنا.. واحدة زي الحجة ياسمين الحصري الله يكرمها، ويرضى عنها تخيل دي ال.. ربنا يطول في عمرها الأول لحسن تزعل مني.. دي اللي أعطت.. دي اللي بَنَت.. دي اللي عملت المعهد الأزهري.. دي اللي بنت مسجد كذا الحصري.. تخيل أنت ماشي، وماشي وراك ناس بتبكي، وناس بتقول يآه..
مش ده اللي ساعد المساكين.. مش ده اللي عمل المشروعات الصغيرة.. مش ده اللي أكل القرية الفلانية.. مش ده اللي خد بيد الناس.. مش ده اللي صلح.. تحب تكون إيه؟
دي قصة أهل الكهف.. عايز تتكتب في الرقيم؟ عايز تخلد ولا لا؟ ولا مش فارقة معاك؟ ولا عايز تعيش لنفسك وخلاص؟
عيشوا للناس.. صلحوا في الأرض.. حبوا الناس.. استشعر أنك خلقت تصلح.. حبب الناس في ربنا عن طريق أنك تساعدهم، وتأكلهم، وتعمل لهم مشروعات في قراهم لأسرهم.. لأطفالهم.. علم العيال الصغيرة.. اصنع حياتهم..
دي قصة أهل الكهف عشان كدة بيقول لنا اقروا القصة دي كل يوم جمعة.. عشان ننور لكم.. ليه ننور لكم؟ علشان الكهف ضلمة.. لكن لو قرأت سورة الكهف، واخترت الكهف ربنا ينور لك حياتك.. مش ظلمة اختيار الكهف مش ظلمة أنك ها تصلح حتى لو اتعرضت لمتاعب، وبقيت في ضيقة.. أبدا.. نور.. أضاء الله لهم نور بين السماء والأرض كل يوم جمعة.
إيه اللي حصل في ال 300 سنة برة؟
عرفنا جوة الكهف.. طب إيه اللي برة الكهف.. اللي حصل برة الكهف؟
دقيانوس بدأت سلطته تضعف بسبب الأولاد السبعة.. اتهز قدام الناس.. قدام جنوده مهزوز، وبعد شوية مات دقيانوس، وجه ابنه حس أن الكبت معادش نافع.. بدأ ينشر العدل شوية.. بدأ العدل يزيد.. بدأ الناس تتنفس.. بدأ الرقيم يطلع.. الشباب السبعة بقوا الوقود اللي بيصحي الناس.. اختفائهم المثير، وتضحيتهم.. الناس بتحب اللي يضحي عشانها أكتر ما تحب اللي يعيش عشانها.. بدأت الناس تقول لأولادها عايزينكم زي دول..
يا سلام اللي هم بدءوا ناموا ربنا قال لهم: خلاص عملتم اللي عليكم.. طب ليه ناموا؟ ما كانوا يحضروا كل التغير ده..
أصل التغير ها يأخذ وقت.. يا جماعة لا للاستعجال.. اللي عايز يصلح بلادنا يعرف أن الموضع ها يذأخذ وقت.. 300 عندهم.. ممكن تأخذ عندنا 100 سنة.. ممكن تأخذ 20 سنة.. حسب الجهد.. فربنا بيقول لنا: أن ها أعمل معجزة فيهم.. لكن البلد لا.. التغير يأخذ وقت.. الناس المستعجلة متنفعش.. 300 سنة تغير.
طب وهم ها يحصل إيه؟ هم خلال المدة دي ثوابهم شغال، وحب الناس شغال، وتموت أجيال، وتيجي أجيال لغاية بعد 300سنة يجي ملك جديد يؤمن بالمسيحية، ويؤمن، ويخلي البلد كلها توافق على الإيمان، والبلد تفرح، ويطلع الرقيم، ويبقي ده عيد، ورمز البلاد بتحفتظ ده من 200 سنة كان في فلان الفلاني عمل كذا، ويبقى الرقيم ده رمز للعيلة.. للبلد كلها.
في الوقت ده ربنا صلح الدنيا.. اصحوا يا أهل الكهف.. طب ليه صحيوا ما كانوا خلاص ماتوا؟
اصحوا عشان الناس تشوف ربنا ازاي بيكمل.. أنتم بس اللي حا تصحوا عشان الناس تعرف أن لو مت، وأنت عملت خير إن الله لا يضيع أجر من أحسن عملا.. اصحوا يا أهل الكهف ثاني عشان تعرفوا الناس، وتعرفوا في القرآن ربنا ما بيضيعش أجر من أحسن عملا.
ياللا قوموا.. تعال يا صاحب المزرعة اللي جنب الكهف خد حجر من إلى قدام الكهف عشان تبني مزرعتك.. يتفتح الباب.. تبدأ الضوضاء تبدأ الدنيا تصحى.. الكلب يصحي.. اصحوا يا أهل الكهف.. خلاص ها شفت الوكيل -سبحانه وتعالى-
اصحوا عشان تشوفوا المعجزة.. تشوفوا ازاي كملنا شغلكم، وأن أنتم لما سألتم يا رب ليه وقفت المعجزة؟ ليه وقفت الرسالة؟
موقفتش دي اشتغلت وأنتم نائمين أكثر ما كانت ها تشتغل، وأنتم صاحيين.. الناس فاقت أكتر باختفائكم، وبنومكم..
صحيوا أهل الكهف..
شوف الآية تبدأ تحكي { وَكَذَلِكَ بَعَثْنَاهُمْ لِيَتَسَاءلُوا بَيْنَهُمْ قَالَ قَائِلٌ مِّنْهُمْ كَمْ لَبِثْتُمْ} شكلنا نمنا كتير.. { قَالُوا لَبِثْنَا يَوْماً أَوْ بَعْضَ يَوْمٍ } يعني يا يوم.. يا نص يوم.. يعني بمقاييس البشر.. بس شكلنا نمنا كتير.. { قَالُوا رَبُّكُمْ أَعْلَمُ بِمَا لَبِثْتُمْ} شكلها كتير.. بس منعرفش.. فبعثوا جعانين.. هما لسة فاكرين دقيانوس أمبارح، وجعانين أوي، وطلعوا فجأة فمجابوش أكل معاهم.. فأحيانا الاحتياجات البيولوجية لبني آدم تحرك الرسالات.. { فَابْعَثُوا أَحَدَكُم بِوَرِقِكُمْ هَذِهِ إِلَى الْمَدِينَةِ} العملة اللي باقية معاكم.. معهمش فلوس { فَابْعَثُوا أَحَدَكُم} شفتم بقي ها نبدأ نفهم القرآن ازاي؟ مش قلت لكم: أن قصص القرآن ها تحببكم، وتفهمكم القرآن { فَابْعَثُوا أَحَدَكُم بِوَرِقِكُمْ هَذِهِ إِلَى الْمَدِينَةِ فَلْيَنظُرْ أَيُّهَا أَزْكَى طَعَاماً} يجيب لكم أكل حلو كدة.. أصحاب رسالة بس أولاد زوات.
عايزين يأكلوا حلوا.. { فَلْيَنظُرْ أَيُّهَا أَزْكَى طَعَاماً} يعني مش متدين فيقول لك: آه أصحاب رسالة.. راحوا الكهف.. فيقول لك بقى: إحنا لازم نتقشف.. يا عم متدين، وعايش عيشة حلوة، ومبسوط، وبيلبس حلو، وبيتفسح، ومهتمة أن هي تبقى لابسة حلو { فَابْعَثُوا أَحَدَكُم بِوَرِقِكُمْ هَذِهِ إِلَى الْمَدِينَةِ فَلْيَنظُرْ أَيُّهَا أَزْكَى طَعَاماً فَلْيَأْتِكُم بِرِزْقٍ مِّنْهُ وَلْيَتَلَطَّفْ} اوع العنف.. العنف مش سكتنا..
شوفوا حلاوة الإسلام.. يخلوا كدة معتدل.. تخلي الكلمة دي إحنا في الجزء ال 15 الكلمة دي هي وسط القرآن بالضبط.. عد حروف القرآن من الأول للآخر في وسط القرآن.. يا سلام على جمال هذا الدين { وَلْيَتَلَطَّفْ وَلَا يُشْعِرَنَّ بِكُمْ أَحَداً } اوع حد يحس بيكم.. فنزل واحد منهم..
أنا عايزك تتخيل مشهد رهيب.. هو نازل الدنيا شكلها متغير.. إحنا مجيناش من الحتة دي أمبارح.. هو في إيه؟ البيوت دي ما كانتش موجودة.. أنا تهت ولا إيه؟ وال نومة امبارح، ولا عشان اللي حصلنا بس هو فاكر {وَلَا يُشْعِرَنَّ بِكُمْ أَحَداً } فساكت ماسك نفسه، وداخل مخبئ نفسه.. أصل هم بيدورا علينا.. ده تلاقي جنود دقيانوس مليين البلد.. ها يدروا علينا.. فوصل عند واحد فمطلع العملة، وقال له: اديني أكل.. فالراجل بص في العملة دي جاية من 300 سنة.. دقيانوس.. فافتكر أنه واقع على كنز.. افتكر ان الراجل ده وقع على كنز.. فقال له: يا تقول لي مكان الكنز فين عشان آخد معاك.. قال له: كنز إيه؟ قال له: العملة دي جاية من 300 سنة.. قال له: 300 إيه؟ ده أنا لسة هربان امبارح من دقيانوس.. دقيانوس.. كله بيضحك.. بدأت الناس تتجمع.. مجنون.. يقول لهم: أرجوكم متلموش الناس عليا لحسن جنود دقيانوس..
أنا بتخيل معاك الموقف ماهو الموقف عامل كدة.. دقيانوس.. أنت بتقول إيه؟ في وسط ما الناس بتضحك، وبتتريق، وهو خائف الجنود تمسكه.. دقيانوس إيه يا عم؟ ده أصل إحنا مسيحيين.. مؤمنين.. موحدين بربنا.. يا عم ما كلنا مؤمنين بربنا، والملك مؤمن.
الشاب مش مصدق.. يعني إيه مؤمنين بربنا؟ في واحد من العلماء موجود.. فقال له: استنى أنت اسمك إيه؟ فقال له: اسمي كذا.. قال لهم: هاتوا الرقيم.. لا محدش يهزر.. قول لي أسماء أصحابك إيه؟ فبدأ يقول أسماء أصحابه.. { أَمْ حَسِبْتَ أَنَّ أَصْحَابَ الْكَهْفِ وَالرَّقِيمِ كَانُوا مِنْ آيَاتِنَا عَجَباً } عجبا يا رب.. الوكيل.. الناس آمنت.. أنتم نمتم 300 سنة.. أنتم اللي اختفيتم.. أنتم اللي بنحتفل بيكم كل سنة.. الراجل مش مصدق.. نروح للملك نقول له: نروح الكهف معاك.. عايزين نشوف الناس دي.. تخيل لو البلد كلها رايحة، وتخيل أهل الكهف اللي قالوا له: { وَلَا يُشْعِرَنَّ بِكُمْ أَحَداً} ها لقوا البلد كلها جاية، والخوف، والقلق.. ليه يا رب حصل لنا كدة؟
وتخيل كلنا مؤمنين.. أنتم اللي هديتونا للإيمان، ويقولوا لربنا: يا كريم.. يا وكيل.. تخيل لحظة معرفتهم بالحقيقة.. حبهم لربنا شكله إيه؟
شعور.. أنت عظيم أوي يا رب.. يا رب كملتنا من (ب) لـ (ي) الأمل.. الحلم تحقق يا رب حققت حلما.
يا شباب اتعلموا من اللي أنا بقوله ده.. دي سورة الكهف اللي بتقرءوها كل يوم جمعة الآية الأخيرة أو المعنى الكبير { وَكَذَلِكَ أَعْثَرْنَا عَلَيْهِمْ} خليناهم يوصوا لهم.. خلينا هم يوصوا لهم، والناس تعرف مكانهم.. ليه يا رب { وَكَذَلِكَ أَعْثَرْنَا عَلَيْهِمْ لِيَعْلَمُوا} عشان حاجتين { لِيَعْلَمُوا أَنَّ وَعْدَ اللَّهِ حَقٌّ} الوكيل بينفذ كلامه.. الوكيل ما بيسبش عباده.. اللي عاش لربنا ربنا ها يقف معاه.. حا يكمل لك حلمك {لِيَعْلَمُوا أَنَّ وَعْدَ اللَّهِ حَقٌّ} ازاي متسقوش في ربنا؟ ازاي معندكوش أمل في ربنا؟
{ لِيَعْلَمُوا أَنَّ وَعْدَ اللَّهِ حَقٌّ} ده السبب الأول.
والسبب الثاني: { وَأَنَّ السَّاعَةَ لَا رَيْبَ فِيهَا} يعني إيه؟ اللي أحياهم بعد 300 سنة ها يصحيكم يوم القيامة.. دي العبرة الثانية.. كأن المعنى الأولاني اعرفوا أن ربنا ها ينجحكم في الدنيا، وكأن المعني الثاني من القصة اعلموا أن أنتم حا تروحوا تقابلوا ربكم يوم القيامة.. يوم القيامة جاي سبحان الله! يا جماعة القصة دي يا جماعة اللي أنا بحكيها النهاردة موجودة في كل ثقافات العالم.. موجودة في الثقافة الألمانية.. قصة أهل الكهف يعرفها الألمان.. يعرفها اليوغسلاف.. يعرفها الصينيين.. يعرفها اليابانيين.. السفن سليبر.. كلهم.. موجودة.. ادخل على جوجل ها تلاقيها موجودة في كل ثقافات العالم، ومعروفة في كل الأديان.. يعرفها اليهود، ويعرفها المسيحيين.. يعرفها المسلمين.. يعرفها البوذيين.. كأن ربنا بيقول على اختلاف ثقافتكم، وعلى اختلاف أديانكم القصة بيتقول أن ربنا بيبعث الموتي عشان الماديين اللي مش مصدقين أن في يوم قيامة القصة دي موجودة في كل الثقافات، واتدرست لكل الأطفال، ويعرفها كل الأديان.
ربنا جعل قصة تجتمع عليها كل ثقافات، وأديان العالم العظيم -سبحانه وتعالى- عشان أي حد يجي يوم القيامة يقول: أنا مكنتش أعرف.. عندك قصة أهل الكهف في ثقافتك، وفي دينك.
ولذلك كل قصة أهل الكهف كل سورة الكهف بتتكلم عن يوم القيامة، وآيات يوم القيامة؛ لأن سورة الكهف مهدت ناموا 300 سنة، وصحيوا، وأنت كمان ها تصحى، وتقابل ربنا.. اشتغلت زيهم.. صلحت زيهم.
شوف بقيت الآيات { وَيَوْمَ نُسَيِّرُ الْجِبَالَ وَتَرَى الْأَرْضَ بَارِزَةً}. ده الآيات اللي بعد الكهف { وَحَشَرْنَاهُمْ فَلَمْ نُغَادِرْ مِنْهُمْ أَحَداً{47} وَعُرِضُوا عَلَى رَبِّكَ صَفّاً لَّقَدْ جِئْتُمُونَا كَمَا خَلَقْنَاكُمْ أَوَّلَ مَرَّةٍ} شوف الآيات { وَوُضِعَ الْكِتَابُ فَتَرَى الْمُجْرِمِينَ مُشْفِقِينَ مِمَّا فِيهِ وَيَقُولُونَ يَا وَيْلَتَنَا مَالِ هَذَا الْكِتَابِ لَا يُغَادِرُ صَغِيرَةً وَلَا كَبِيرَةً إِلَّا أَحْصَاهَا وَوَجَدُوا مَا عَمِلُوا حَاضِراً وَلَا يَظْلِمُ رَبُّكَ أَحَداً} كل دي آيات جت في سورة الكهف.
هدف القصة حاجتين..
1. ليعملوا أن وعد الله حق.. خلي عندك أمل في ربنا ها ينصرك، ويعزك.. الوكيل.. توكلي على الله.. لو حياتك صعبة روحي للوكيل قولي له: توكلت عليك، وارمي حمولك، ونامي مستريحة الوكيل.
2. الحاجة التانية أنت راجع يوم القيامة افتكر يوم القيامة، واستعد.. صلِّ بالليل.. استعد ليوم القيامة.
آخر حاجة أهل الكهف رجعوا في الكهف تاني وهم في الكهف بعد ما الناس عرفتهم ماتوا.. ماتوا في الكهف.. ماتوا ليه؟ أصل ده ابن القرن الأول ميقدرش يعيش في القرن الرابع.. هم دلوقتي بقو ذكريات ها يتعبوا أوي وهم يوم ما دخلوا الكهف من 300 سنة قالوا: { رَبَّنَا آتِنَا مِن لَّدُنكَ رَحْمَةً} من الرحمة أن هم يموتوا.. ده هم بس ربنا صحاهم عشان إحنا نشوف الآية يوم القيامة حق، ونقول ها نشتغل يا رب، وأنت ها تكمل لنا.. حلمنا أن إحنا نصلح بلادنا.. ماتوا أهل الكهف، وقبورهم موجودة إلى الآن في الكهف.. إحنا ها نطلع فاصل، ونطلع بعدها على طول على الكهف.. تيجوا نروح الكهف، وندخله من جوة، وننام مكانهم في الفجوة، ونشوف قبورهم، ونشوف ازاي رحمة في 90 متر، وندعي هناك، ونقرا آيات سورة الكهف هناك.. نسمع الآيات عشان نعيش النهاردة مع القرآن.. ادخلوا على عمر خالد . نت.. النهاردة، وعيشوا مع قصة أهل الكهف، واقرءوها كل يوم جمعة بالإحساس الجديد ده.. نشوفكم على خير إن شاء الله.. يا رب رسالة النهاردة تكون وصلت.
يا شباب.. يا بنات.. يا رب يا رب يا رب نفوق بالرسالة دي.. يا رب نحب ربنا، ونحب القرآن بقصة الكهف دي.. تعالوا نروح الكهف مع بعض نشوفكم على خير بكرة إن شاء الله .
ده مكان يعلمك اسم الله الوكيل.. إذا تولى عباده لا يمكن يضيعهم.. أرجوك، وأنت داخل متخافش.. مش متخافش من الكهف.. متخفش على مستقبلك.. ربنا أوى الناس دول هنا.. { فَأْوُوا إِلَى الْكَهْفِ يَنشُرْ لَكُمْ رَبُّكُم مِّن رَّحمته} يا جماعة توكلوا على الله.. متخافوش من الدنيا.. لو ربنا معاك قول: حسبي الله ونعم الوكيل. امضي، وقل له: وكلتك يا رب.. حسبي الله ونعم الوكيل، وأنت بتتفرج على معجزة من معجزات ربنا ازاي ربنا يأوي عباده، ويتولى أمر عباده.. تعالوا ندخل معه بعض إلى الكهف .
بسم الله.. سبحان الله! إحنا يا إخونا دلوقتي جوة الكهف، وهذا هو المكان الذي ذكره الله في القرآن.. الآن لا زلت في مدخل الكهف، وما زلت في مدخلتش على الحجرة اللي كانوا نائمين فيها.. أنا في المدخل.
لو سألتني مساحة الكهف تطلع أد إيه؟ مساحة الكهف حوالي 90 متر تقريبا.. يعني شقة صغيرة أوي، وها أبدأ أحط رجلي على أول خطوة في المكان اللي ناموا فيه 300 سنة.. المنطقة العالية دي هي بداية المنطقة اللي ناموا فيها أهل الكهف 300 سنة.. في المكان ده.. لا إله إلا الله.. رضيت بالله ربنا، وبالإسلام دينا، وبمحمد -صلى الله عليه وسلم- نبيا ورسولا.
وأنا الحقيقة وأنا بخطوا الآن في المكان ده هم كانوا نائمين هنا.. يعني المكان اللي أنا جالس فيه الآن ده مكان كان نائم فيه واحد من أهل الكهف.. هنا كان نائم، وهنا كان نائم أخوه، وهنا كان نائم أخوه.. ده المكان اللي ربنا كان يرعاهم فيه.. ده المكان اللي 309 سنة ربنا منزل رحمته.. يا عم روح لربنا يحيطك برحمته.. أنت مش مكفيك أنت خائف من إيه؟ أنت مبتصلحش في الأرض ليه؟ أنت مش عايز تشتغل لربنا ليه؟ أنت حاسس بهيبة المكان اللي أنا فيه؟ أنت حاسس بجلال المكان اللي أنا فيه؟
معجزة من ربنا حصلت في المكان ده 300 سنة رحمة.. ممكن نعمل تجربة مع بعض.. يا إخوانا ممكن نقفل باب الكهف.. نقفل علينا باب الكهف زي ما كان مقفول عليهم، وحا أطلب من إخوانا المصورين يلغوا الأضواء بتاعت الكاميرات اللي موجودة، ونشوف الضوء اللي جاء من الشمس من فوق.. بيعمل إيه؟ تحت ممكن نقفل الباب، ونطفي الأضواء.. حد شايف حاجة.. مفيش حاجة خالص.. لا ده في ضوء هنا أنا دخلت في الفجوة دلوقتي أنا دلوقتي جوة الفجوة شايف آيات ربنا مين اللي أوجد ده؟
مين اللي خلق ده؟ مين اللي عمل الفتحة دي؟ مين اللي عملها علشان كل ده عشان سبع شباب؟
شايفين أنا قاعد فين؟
أنا خابط في عينيا دلوقتي ضوء الشمس، وشايف يا سبحان الله! بس شمس متؤذيش شمس سبحانك.. يا رب رضيت بالله ربا.. أنتم عارفين أنا نفسي في إيه؟ يا إخونا ها أعمل كدة فعلا.. أنا نفس أحط نفسي مكانهم.. يعني أنا نفسي أنزل على الأرض نوسخ هدومنا منوسخ هدومنا.. مش دي المشكلة.. تخيل هم كانوا نائمين كدة.. تخيل حلاوة أنك تبقى طلعت عشان خاطر ربنا 309 سنة، وأنت بتأخذ ثواب، وأنت نائم؛ لأن البلد اللي عمالة تتصلح بسبب أن هم أول ناس وفقوا الناس، واختفائهم أثار الناس أكثر، وخلى الناس تعلقت بيهم أكثر.. الناس حبتهم فمشيت على خطاهم، والناس عرفت أن هم ضحوا عشانهم.. هم نائمين في الكهف، والأرض بتتصلح برة عشان ربنا يعلمنا إن الله لا يضيع أجر من أحسن عملا.
أنا حابب منمشيش من هنا إلا لما نسمع آيات سورة الكهف اللي بتتكلم عن أهل الكهف هنا في هذا المكان.. تعال يا معتصم اجلس أنا عارف أن صوتك جميل.. بس أنا حابب أسمع آيات سورة الكهف في مكان الكهف.. فاقرأ علينا آيات الكهف، ونعيش إحنا، والناس اللي بتسمع أيات الكهف {أعوذ بالله من الشيطان الرجيم بسم الله الرحمن الرحيم.. أَمْ حَسِبْتَ أَنَّ أَصْحَابَ الْكَهْفِ وَالرَّقِيمِ كَانُوا مِنْ آيَاتِنَا عَجَباً{9} إِذْ أَوَى الْفِتْيَةُ إِلَى الْكَهْفِ فَقَالُوا رَبَّنَا آتِنَا مِن لَّدُنكَ رَحْمَةً وَهَيِّئْ لَنَا مِنْ أَمْرِنَا رَشَداً{10} فَضَرَبْنَا عَلَى آذَانِهِمْ فِي الْكَهْفِ سِنِينَ عَدَداً{11} ثُمَّ بَعَثْنَاهُمْ لِنَعْلَمَ أَيُّ الْحِزْبَيْنِ أَحْصَى لِمَا لَبِثُوا أَمَداً{12} نَحْنُ نَقُصُّ عَلَيْكَ نَبَأَهُم بِالْحَقِّ إِنَّهُمْ فِتْيَةٌ آمَنُوا بِرَبِّهِمْ وَزِدْنَاهُمْ هُدًى{13} وَرَبَطْنَا عَلَى قُلُوبِهِمْ إِذْ قَامُوا فَقَالُوا رَبُّنَا رَبُّ السَّمَاوَاتِ وَالْأَرْضِ لَن نَّدْعُوَ مِن دُونِهِ إِلَهاً لَقَدْ قُلْنَا إِذاً شَطَطاً}
إحنا كدة وصلنا للآخر، ومش قادرين نسيب الكهف.. أنا شاعر بالسكينة، والهدوء النفسي، والأنس بالله، والرحمة اللي الواحد حس أن هي متنزلة في هذا المكان.. تعالوا نختم حلقتنا، وندعي ونحن جوة الكهف، وإحنا جوة معجزة من معجزات ربنا، وآية من آيات ربنا.. وسط ناس عاشوا لله، وعاشوا يصلحوا في الدنيا.. إني داع فأمنوا.
يا أرحم الراحمين.. يا أرحم الراحمين.. يا أكرم الأكرمين.. يا أجود الأجودين.. الحمد لله.. الحمد لله.. اللهم صلِّ على سيدنا محمد.
الحمد لله الذي خلقنا فسوانا، وأنعم علينا إذا هدانا.. يا رحيم يا رحيم.. يا من رحمتك وسعت السماوات يا من رحمتك وسعت كل شيء.. يا من قلت كتب ربكم على نفسه الرحمة.. يا من نشرت لأهل الكهف الرحمة.. يا من قلت فأووا إلى الكهف ينشر لكم ربكم من رحمته.. اللهم إنا في مكان تنزلت فيه رحمتك عليهم.. يا رحيم يا رحيم يا رحمن.. يا مالك الملك.. يا رب نستغيث بك.. ارحمنا يا مغيث.. أغثنا يا رب.. انصر أمة حبيبك محمد أعنا.. أعنا انصرنا.. أيقظنا.. اضبط شبابنا كما أيقظت شباب أهل الكهف يا رب نستغيث بك لشباب المسلمين.. يا رب أرنا أية في رمضان في هداية شباب المسلمين.. اللهم إنك تقول عن أهل الكهف وزدناهم هدى.. شبابنا يا رب شباب المسلمين أدعوك من هذا المكان.. مكان هؤلاء الفتية.. أدعوك لفتية المسلمين.. أدعوك لشباب المسلمين.. أدعوك يا رب أرنا آية في رمضان في هداية شاب المسلمين.. أرنا أية أن يقوم الشباب بإصلاح بلادهم.. يارب العالمين.. يا رب اجعل همة، وهدف الشباب في بلدنا إصلاح بلادهم.. انصرنا يا رب العالمين.
اهدي الشباب.. اهدي الشباب.. حببهم في الإيمان.. حببهم في صلاة الفجر حببهم في قيام الليل.. حببهم في الطاعة.. حببهم في النهضة.. حببهم في الإصلاح.. حببهم في الخير.. حببهم في أنهم يخدوا بأيد الناس.. يا رب أصلح بقصة أهل الكهف أمة حبيبك محمد.. أصلح بهذه القصة، وبهذا المكان، وبما فعلناه اليوم.. أصلح به شباب الأمة يا رب وبنات الأمة يا رب أجعل هؤلاء السبعة الفتية هداية لشباب.
اللهم اجعنا نقرأ سورة الكهف فيضاء لنا نور بين السماء والأرض.. أصلح بنا الأرض اغفر لنا.. ارض عنا.. سامحنا اعتقنا.. اعتقنا هذه الليلة يا رب. اعتقنا هذه الليلة.. استرنا كما سترتهم انصرنا كما نصرتهم.. ارحمنا كنا رحمتهم.. تول أمرنا كما توليت أمرهم.. نصرك يا رب.. هدايتك يارب رضاك يا رب أقبلنا راضي عنا.. يا رب سامحنا الليلة.. يا رب يا رب يا رب آمين.. آمين.
وصلّ وسلم وبارك على سيدنا محمد، ونشوفكم بكرة إن شاء الله، وقصة جديدة.. والسلام عليكم ورحمة الله.
المصدر: http://www.alresalah.net/morenews.htm?id=1962_0_2_0