|
|
|
| عمرو خالد |
النهاردة مع قصة جديدة، أنتم واخدين بالكم قصص القرآن ثري أد إيه، واسعة جدًا، عايز تصلح نفسك من أي جهة؟ فاكرين قابيل وهابيل، وأصحاب الجنة، بدأنا نحفظ أسماء القصص دلوقتي، أصحاب الأخدود، مريم، يا وكل مرة الواحد يحس إن القصة يفتكر إن القصص ماشية في ناحية واحدة، كل مرة قصة في اتجاه مختلف، فاكرين لما قلت لكم في بداية الحلقة أي حاجة ربنا جمع فيها تاريخ البشر فيها ملايين القصص ملايين، أنا حياتي وحياتك فيها عشرات ومئات القصص، ربنا انتقى من ملايين القصص اللي في حياة البشر ثلاثين أربعين قصة، هم دول اللي في القرآن، بس مش قصص الأنبياء، قصص القرآن 30، 40 قصة يبقوا فيهم ،دول يبقي سرهم ،كل احتياجتكم ليوم القيامة موجودة في القصص دي.
قصة النهاردة قصة جديدة بمعني جديد، إحنا محتاجينه ومحتاجين نفكر فيه، القصة أنا عايز أقدم لها أقول إيه؟ أعقد حاجة في الدنيا النفس البشرية، أصعب حاجة النفوس، والنفوس أنواع؛ نفس شجاعة ونفس جبانة، نفس قوية الإرادة ونفس ضعيفة الإرادة، نفس منضبطة في مواعيدها في حركتها في لبسها راجل منضبط جاد يتحمل المسئولية، وناس مترهلة فوضوية، نفس مختلفة، نفس أنانية ونفس مخلصة عايزة تعمل الخير بصرف النظر مكانها فين؛ قائد ولا مش قائد، أنا عايز أعمل الخير أنا ملخص .
ممكن أسألك سؤال الأربعة اللي أنا قلتهم دول، ركز فيهم عشان الحلقة كلها قائمة علي الأربعة دول، أنت أنهو نفسه في الأربعة ؟ أنت شجاع ولا جبان ؟ أنت منضبط ولا متسيب فوضوي ؟ أنت قوي الإرادة ولا ضعيف الإرادة ؟ الرابعة أنت أناني ولا مخلص ؟ إحنا النهاردة محتاجين ورقة وقلم عشان هنشتغل بورقة وقلم، عشان في استقصاء هنعلمه مع بعض ، ها تاني أنهو نفس من الأربعة أنت؟ وعامل إيه في الأربعة دول؟ خلي بالكم يا جماعة {وَنَفْسٍ وَمَا سَوَّاهَا فَأَلْهَمَهَا فُجُورَهَا وَتَقْوَاهَا} [الشمس :7،8] التركيبة كلها بتاعت كل اللي أنا قلته موجودة في نفسك ، فيها الجبن وفيها الشجاعة، بس بنسب ، فيها الانضباط، وفيها التسيب في الإرادة، وفيها ضعف الإرادة ، فيها الأنانية، وفيها الإخلاص، فيها كله، بس ينفع تتصلح؟ طبعًا، وعشان كده بنقول الحلقة دي تتصلح إزاي؟ بالتدريب.
والنهاردة في كل واحدة هنقول لك تتدرب عليها إزاي، عشان كده بقول لك هات ورقة وقلم، تنفع بالتدريب، ولذلك بقية الآية: {قَدْ أَفْلَحَ مَن زَكَّاهَا وَقَدْ خَابَ مَن دَسَّاهَا} [الشمس:10:9] .الموضوع في إيدك، صحيح تركيبتك فيها، لكن في إيدك إنك تصلحها.
حلقة النهاردة حلقة النفوس القوية والنفوس الضعيفة، أنت أنهو فيهم؟ حلقة لو عندكم جيل عنده الأربع صفات دول؛ شجاع، منضبط، عنده إرادة، خلي بالك أنا لسة ما اتكلمتش في التعليم، الكلام ده بعد كده، أنا بتكلم في الأول إرادة، لو عندكم الأربعة دول طمنوني، عندكم إن شاء الله، في نهضة في بلادكم، العبرة أنت نفس شكلها إيه.
في قاعدة هدية، يا ريت تكتبوا الجملة دي، جملة لطيفة أوي، بيقول لك إيه؟ كن رجل بألف رجل، كويس؟ فإن لم تستطع، فكن رجل. لو مش عارف تبقى بألف، طب امسك نفسك، فكن رجل ولا تكن نصف رجل، في نصاص، وفي أرباع، وفي أصفار، وفي واحد بألف. النبي بيقول لو وضع إيمان أبي بكر في كفة، وإيمان الأمة في كفة لرجح إيمان أبو بكر. إزاي يعني؟ يقوم قايل لك: ما سبقكم أبو بكر بكثير صلاة وصيام، ولكن سبقكم بشيء وقر في نفسه، هو ده اللي أنا بتكلم عليه النهاردة، واحد يوزن ألف، مش بالعضلات، نفسه عاملة إزاي؟ يقول لك عمرو بن العاص يقول لعمر بن الخطاب ابعت لي مدد عشان أقدر أفتح مصر 4 آلاف، فيبعت له أربع أنفار، يعني أمير المؤمنين إحنا في معركة، هنموت فيقول له، أنا مبهزرش أرسلت إليك رجل بألف، والله لصوت القعقاع في المعركة خير من ألف، النفس دي لو موجودة تصلح، العبرة مش عددكم كام، العبرة النفوس.قصة النفوس القوية والضعيفة من الآخر يا جماعة.
قصة النهاردة تحكي قصة أمة كانت منهارة زينا كده، منهارة، طلع جيل شباب وستات، ادعي إن هو عايز يرجع العزة والكرامة والنصر والنجاح والنهضة، ادعوا مئات الآلاف، قالوا مستعدين بمنتهي الحماسة عايزين كفاية بقى، لكن مكنوش مستكملين الصفات الأربعة، فربنا غربلهم وصفاهم أربع تصفيات، كل تصفية توقع صفة من الصفات، ها الجبان برة، برة، بس العدد قل، مش مشكلة، كانوا بمئات الألف، اللي معندوش إرادة مخوخ برة، اللي بيشتغل لنفسه برة، المتسيب برة، فرسيوا على كام مئات الآلاف؟ 313، يا نهار أبيض! بس يمتلكوا الصفات الأربعة.
يا شباب عايز تنجح في حياتك، بتحب الأمة؟ بتحب الإسلام؟ بتحب بلدك؟ بتحب مصر؟ بتحب الجزائر؟ اديني الأربع صفات دول، يلا بقى، طلع ورقة وقلم واكتب الصفات الأربعة، تخيلوا القرآن بيربي صفات نفسية، علم نفس اللي إحنا بنقوله النهاردة، شفتوا القرآن أخدنا منين؟ إمبارح كنا في مريم والعبادة، النهاردة فين؟ أول امبارح كنا فين؟ أصحاب الأخدود، قماشة واسعة القرآن للأجيال كلها، يوم القيامة كل احتياجات النفس البشرية هنا، بس إحنا مبنقرؤش بجد، اقرؤوه بجد، يلا افتح سورة البقرة، هنبدأ، بس هات ورقة وقلم، القصة طبعًا عرفتوها، القصة قصة طالوت وجالوت.
قصة طالوت وجالوت؛ سورة البقرة، الآية كام في سورة البقرة؟ حقول لك حالاً، عشان لو عايز تفتح معايا المصحف الآية 246 سورة البقرة، ربع كامل في آخر سورة البقرة، ربع كامل بيتكلم على الموضوع ده، ده تشريح نفسي، ده إصلاح نفسي، يلا صلحوا الأربعة دول عشان تنجحوا في حياتكم، عشانكم أنتم، عشان بلدكم، ها يلا طلع القصة وهات ورقة وقلم، واعمل معايا الاستقصاء الحالي وادي لنفسك درجة من عشرة في كل نقطة.
هسألك أربع اسئلة وحط لنفسك درجة من عشرة، يا إما تحطها دلوقتي أو كل شوية تعدل فيها، ما أنت ممكن بعد ما أتكلم شوية تحط تسعة، وبعد ما اتكلم شوية يا نهار أبيض 3 !
1 ـ هل أنت شجاع مبادر ؟
شوف عايز تحط لنفسك كام من عشرة .
2ـ هل أنت أناني فردي أم مخلص؟
بس خلينا بالإيجابي كله، يعني الأول: هل أنت شجاع؟ هتحط كام من عشرة، السؤال الثاني: هل أنت مخلص؟ متجرد أم أناني فردي؟
3 ـ السؤال الثالث: هل أنت منضبط أم متسيب في حياتك وعشتيك ومهرجل؟
والشباب مش عايز أقول أصفار، لا إن شاء الله نسمع حاجات حلوة.
4 ـ هل أنت قوي الإرادة أم ضعيف الإرادة؟
أربع اسئلة، جاوب يا بطل، محدش شايفك، أنت والورقة، لوحدك أنت وربنا، وأنت الكسبان في الآخر، هتنجح في حياتك ولا هتفشل؟ يلا نبدأ، وهقولك كل شوية إزاي تصلحها.
يلا نبدأ، قصة طالوت وجالوت ببساطة إن سيدنا موسي بعد ما ربنا نجاه هو وبني إسرائيل من فرعون، ولسة ناجين من ماء البحر، رجليهم مبلولة، تخيل معجزة انفلاق البحر، شافوا إيه؟ عظمة ربنا، في قوة أكتر من كده؟،{ادْخُلُوا الأَرْضَ المُقَدَّسَةَ الَّتِي كَتَبَ اللّهُ لَكُمْ} [المائدة:21] يلا خشوا بقى، {قَالُوا يَا مُوسَى إِنَّ فِيهَا قَوْماً جَبَّارِينَ وَإِنَّا لَن نَّدْخُلَهَا حَتَّىَ يَخْرُجُواْ مِنْهَا فَإِن يَخْرُجُواْ مِنْهَا فَإِنَّا دَاخِلُونَ} أدي اول صفة: الجبن، {قَالَ رَجُلاَنِ مِنَ الَّذِينَ يَخَافُونَ أَنْعَمَ اللّهُ عَلَيْهِمَا ادْخُلُواْ عَلَيْهِمُ الْبَابَ فَإِذَا دَخَلْتُمُوهُ فَإِنَّكُمْ غَالِبُونَ} [المائدة : 23] عندهم شجاعة، وعندهم إرادة، فإذا دخلتموه فإنكم غالبون، ناس منضبطة، عندهم الصفات، بس رجلين، إحنا محتاجين جيل، {قَالُواْ يَا مُوسَى إِنَّا لَن نَّدْخُلَهَا أَبَداً مَّا دَامُواْ فِيهَا} [المائدة:24] منتهى ضعف الإرادة والجبن، {فَاذْهَبْ أَنتَ وَرَبُّكَ فَقَاتِلا إِنَّا هَاهُنَا قَاعِدُونَ} [المائدة : 24] منتهى عدم الانضباط، هيسبوه، روح قاتل، مفيش انضباط، ومنتهى الأنانية، روح أنت قاتل لوحدك، {قَالَ رَبِّ إِنِّي لا أَمْلِكُ إِلاَّ نَفْسِي وَأَخِي} [المائدة:25]، معيش جيل، مينفعش يبقي في نهضة، مينفعش ننتصر، معندناش الصفات الأربعة،{قَالَ فَإِنَّهَا مُحَرَّمَةٌ عَلَيْهِمْ أَرْبَعِينَ سَنَةً يَتِيهُونَ فِي الأَرْضِ}[المائدة:26] ، ليه؟ لما يتغير الجيل، 40 سنة يتغير الجيل، دول ما ينفعوش، دول مخوخين، السوس منخور فيهم، مينفعوش ، يا موسي ابدأ ربي جيل جديد، جه جيل جديد، ومات موسي عليه السلام ، فجه يوشع بن نون تلميذ موسي دخل بيهم فلسطين، انتصر، مات يوشع بن نون، رجعوا زي ما كانوا، فقدوا الأربع صفات تاني، فتسلط عليهم قوم اسمهم العماليق بهدلوهم، خلي بالك الكيرف بيطلع وينزل مع الصفات الأربع، واخد بالك أنت فاهم؟ يعني معاكم الصفات الأربعة تنتصروا، معكمش تنهزموا، وأنت كمان في حياتك الشخصية كرفك هيطلع وينزل بالصفات الأربعة، قوة إرادتك أد إيه؟ تقدر تستحمل لغاية فين؟ ولا بتتعب بسرعة؟ مش قادر، لا صعب عليّ، لا أنا مش أد دي، ولا مستعد تنخر في الحديد، ها بتخاف ولا مبادر، لا نجرب ونحاول، جمد قلبك، مش معاك الحق؟ مش بتقول الحق؟ متخافش اجمد، ولا جبان بتكش ويتبخ فيك تتبخ؟، أنت إيه بالظبط؟، مش متهور؟ شجاع؟ أنت مين ؟ منضبط؟
خلي بالكم، أقول لكم حاجة: المنضبط أهم واحدة في الأربعة، إحنا مش منضبطين في بلادنا يا جماعة، إحنا عايشين في تسيب، فوضى، مواعيدنا عاملة إزاي؟ حركتنا عاملة إزاي؟ عهودنا عاملة إزاي؟ إحنا مش منضبطين، خلي بالكم: أهم صفة الانضباط، ولذلك طول ما أنتم ماشين في القصة وهم بيتغربلوا، مهو هيتغربلوا أربع مرات، عشان كل واحدة توقع صفة، وهم بيتغربلوا في الأربعة اللي بيقع دايمًا اللي ماشي علي طول مع الأربعة الانضباط، خلي بالكم المتسيب اللي مش منضبط أناني؛ لأن مفيش حاجة هماه في الدنيا، أنا وبس، والمنضبط شجاع، خلي بالكم الصفات مرتبطة بالانضباط، طول ما بلادنا مش منضبطة طول ما شعوبنا مش منضبطة، طول ما شبابنا مش منضبط، متسيب، فوضى، مفيش فايدة، الشارع عامل إزاي؟ الناس في الشارع عاملة إزاي؟ المرور عامل إزاي؟ الكلكسات عاملة إزاي؟ الناس بتفتح شبابيك العربيات وترمي الورق؟ مهو كل ده انضباط، طب الحكومة تعمل إيه؟ حتلم إيه؟ هتنزل تلم ورا الناس زبالة؟ فمسألة أنت منضبط ولا لأ؟.
اتسلط عليهم العماليق، القصة دي في زمن سيطرة العماليق، قائد العماليق اسمه جالوت، العماليق بهدلوهم، العماليق عملوا إيه؟ طردوهم من أرضهم، خدوا فلوسهم، خدوا ولادهم عبيد، سبوا نساءهم، سرقوا وخدوا مقدساتهم، فاضل لهم إيه عشان يفوقوا؟ طب وإحنا فاضل لنا إيه؟ مستغرب منهم أوي، طب وإحنا فاضل إيه؟ ليه مستغرب؟ فاضل لهم إيه؟
بص علي نفسك، خدوا مقدساتهم لدرجة إن هم خدوا التابوت، إيه التابوت ده؟ التابوت ده صندوق كان بني إسرائيل لما يجوا يحاربوا معركة قدام عدوهم يقدموا التابوت ده، عارفين الراية اللي بتجمد، هما بالنسبة لهم التابوت ده كان بيجمدهم زي الراية، لما يشوفوه يجمدوا، ليه التابوت ده؟ فيه إيه؟ فيه عصا موسي، وبقية مما ترك آل موسى، هنشوف الآيات دلوقتي، وآل هارون، فيه بعض ملابس موسى، بعض ما ترك موسى، وبعض ما ترك هارون أخو موسى، اتاخد منهم عند جالوت، وبني إسرائيل عايشين في الجبن، عايشين يقولوا أساطير علي جالوت؛ ده الواحد من جيش جالوت يموت ألف لوحده، ده مبيموتوش، أنتم عارفين الأساطير والوهم ده؟ مهو الضعيف دايمًا لأنه ضعيف مش عارف يشوف نفسه قوي، فلازم يبني أسطورة على الآخر، عشان يبرر إن هو مش ضعيف.
هقول لك نكتة، بيقول لك إن في قصة رمزية، إن كان في عملاقين في بلدين، زي الفتوات كده في بلدين، فواحد منهم شتم التاني، قال: ده لا عملاق ولا حاجة، ده أنا أكسره، فالتاني غضب، قام رايح له بلده، فاللي شتم خاف، فراح يستخبى، فمراته كانت نفسها قوية، قالت له: أنت خايف؟ خش في السرير واتغطي، فجه العملاق التاني الغضبان، هو شتمني، فقالت له هو الحقيقة مش موجود في البيت، قصة رمزية، هو مش موجود في البيت، بس ابنه نايم في السرير، بص عليه فبص علي ابنه لقي حاجة رهيبة، ورجلية طالعة برة اللحاف، وحاجة ضخمة جدًا، قال لها ده ابنه، أمال هو شكله إيه؟ قام واخد بعضه ومروح.
الأسطورة إحنا اللي بنعملها، وإحنا اللي بنصدقها، وإحنا اللي نبخاف منها، عشان مش عايزين نقول لنفسنا أصل أنا ضعيف، وصلت؟ هي القصة تاني، أنت أنهو من الأربعة؟ عايز تحط لنفسك درجات؟ لاقي نفسك ولا لسة؟ مش لاقي نفسك؟
العماليق خدوا بني إسرائيل علي كل ضعفهم، دول لسه فيهم شوية ناس كويسين، منهم واحد اسمه طالوت، واحد من الشعب، واحد بسيط مهواش من قادة العشائر، لأن في بني إسرائيل حاجة اسمها الملأ، قادة العشائر دول مختلفين مع بعض قادة العشائر دول، وكل واحد فيهم منتهى الأنانية، يا عم دا أنتم متبهدلين مختلفين على بعض، في إيه؟ بتحاربوا بعض على إيه؟ شوفوا حالنا، شوف حال العالم العربي، مش مخلتفين وبس، ده ممكن أي حد فيهم ملك علي الباقيين، يعني يقدر يوحد ويبقي ملك، بس كل واحد فيهم خايف، ليه لحسن جالوت هياخد دماغ اللي يبقى القائد الكبير، فمختلفين، محدش يبقى ملك، وفي نفس الوقت محدش عايز يبقى ملك، حاجة تمخول، يعني داخلة فيها المآسي كلها، نفس الأربع صفات، بس فيهم ناس كويسين، فيهم واحد اسمه طالوت مش من الملأ، مش من قادة العشائر، بس راجل كويس، وفيهم شاب عنده 16 سنة راعي غنم بسيط، بس هيمشي معانا طول القصة، طول ما الناس تتغربل وتقع، في الأربع غربلات ما بيقعش، ثابت.
هم الآن وصلوا للقاع، فبدأ يقولوا خلاص بقى مش قادرين، كفاية بقى، هنفضل في ذل لغاية إمتي؟ لازم نتغير، لازم نقوم، وإحنا بنقول كده، بس يا ترى إحنا عندنا الصفات الأربعة، بص الآيات:{أَلَمْ تَرَ إِلَى الْمَلإِ مِن بَنِي إِسْرَائِيلَ مِن بَعْدِ مُوسَى إِذْ قَالُواْ لِنَبِيٍّ لَّهُمُ }[البقرة:246] مش مهم اسم النبي؛ لأن ده مش موضوعنا، إحنا موضوعنا النفوس، {إِذْ قَالُواْ لِنَبِيٍّ لَّهُمُ ابْعَثْ لَنَا مَلِكاً نُّقَاتِلْ فِي سَبِيلِ اللّهِ} يا سلام على الانتفاضة، على القوة، على الحماس العظيم، لكن واخد بالك من كلمة "ابْعَثْ لَنَا"، كأن المشكلة مش مشكلتهم، ربنا يبعت لنا حد إحنا قاعدين مكانّا، طب متتحركوا أنتم، طب ما تتفقوا أنتم، "ابْعَثْ لَنَا مَلِكاً" طب ما إحنا بنقول نفس الكلام، إحنا مستنين المهدي المنتظر ،أين صلاح الدين؟ ..
نفس الأجواء، نفس طبيعة النفسية، خلي بالكم ده عدم انضباط {..ابْعَثْ لَنَا مَلِكاً نُّقَاتِلْ فِي سَبِيلِ اللّهِ قَالَ هَلْ عَسَيْتُمْ إِن كُتِبَ عَلَيْكُمُ الْقِتَالُ أَلاَّ تُقَاتِلُواْ } [البقرة:246] أنا عارف نفسيتكم، أنا عارف وضعكم، زعلوا، {قَالُواْ وَمَا لَنَا أَلاَّ نُقَاتِلَ فِي سَبِيلِ اللّهِ وَقَدْ أُخْرِجْنَا مِن دِيَارِنَا وَأَبْنَآئِنَا} شايف الحماسة، ولادنا اتخدوا عبيد، وأرضنا اتخدت، {وَمَا لَنَا أَلاَّ نُقَاتِلَ فِي سَبِيلِ اللّهِ}إزاي يا نبينا تقول كده؟ ملكش حق إنك تقول كده هذا الكلام، أنت زعلتنا إن أنت تقول لنا كده، هيحصل إيه بعد ما قالوا هذا الكلام؟
هم جاهزين، والحماسة على الآخر، إحنا خسرنا كل حاجة، معدش لنا حاجة يا نبينا نستنى، معدش لنا لا كرامة ولا احترام في العالم، ولا عاد لينا علم ولا عاد لينا تعليم، ولا عاد لنا احترام، إزاي تقول كده؟ لا إحنا فعلاً جادين، إحنا بنتكلم بجد، لكن مكنش عندهم الأربعة، فهنبدأ نشوف بعد الفاصل إزاي هيتصفوا أربع مرات.
يقال كان عددهم 800 ألف، الرقم مش مهم، بس في الحدود دي، خلينا نتفق علي رقم زي كده، لأن هم كانوا ألوف، قول 800 ألف، رسيوا علي 313 ، في الأربع غربلات، طب جبت منين الرقم 313؟ حديث للنبي صلى الله عليه وسلم في البخاري، يقول البراء: "كنا نعد أصحاب طالوت يوم التقى مع جالوت، كأصحاب النبي يوم بدر" أصحاب النبي يوم بدر313 ، فأنت متخيل كام وقع؟ حد يعد بسرعة 800 ألف لـ 313 كام وقع؟ متخيل 313، يا عم الموضوع مش عدد، الموضوع نفوس قوية ونفوس ضعيفة، كن رجل بألف رجل، فإن لم تستطع فكن رجل، ولا تكن نصف رجل.
كأن القصة عايزة: طلعوا لي شوية رجالة، طلعوا لي شوية جدعان يصلحوا، مش مهم الألف، المهم شوية رجالة، يا شباب أطلع منهم؟ اللي شايف نفسه يقدر يدي في الأربع أسئلة اللي سألناهم أكتر من 60 % يقول لي، ويبعت لي علي عمر خالد دوت نت، وإن شاء الله ربنا يفتح وتبقي النهضة.
أنا عارف إنك أنت زعلان، دي حاجة محبطة جدًا،900 ألف وقعوا! لا متبصلها من الجانب الإيجابي 313 ثبتوا، بص علي الـ 313 ،علي فكرة؛ فيهم الولد اللي عنده 16 سنة، مين ده؟ مش ها قول لك دلوقتي. طب بص علي الـ 313، تخيل 313 كل شوية، يلاقي 100 ألف وقعوا سابوهم وروحوا، طب الـ 313 دول موقعوش؟ هي دي النفوس القوية، دي إرادة، دي نفوس حديد، دول ينزل عليهم نصر، دول يعملوا نهضة، هاتوا لي دول.
هنطلع فاصل، أنا طالب منك واجب في الفاصل، اكتب الأربعة، اقعد مع نفسك لغاية ما نرجع لك، من فضلك ركز قوي، وطي التلفزيون، متشوش علي نفسك، وأعطِ لنفسك درجات من الأربعة، وشوف أنت تستحق إنك تقابل النبي بأه يوم القيامة تقول له يا رسول الله أنا عملت حاجة كبيرة لأمتك، أنا علي الأقل إذا مكنتش قادر أعمل حاجة جهزت نفسي في الأربعة اللي هم نواة أي نهضة، وقول لنفسك: أنت تستحق تصنع حياة للأمة ولا لأ؟ وقول لنفسك أنا شكلي هنجح في حياتي ولا لأ، جاوب علي نفسك، وتعالوا نكمل بعد الفاصل .
.. فاصــــــــــــــــــــــــــــــــــــــــل..
بسم الله الرحمن الرحيم، الحمد لله رب العالمين،
تعالوا نكمل مع طالوت وجالوت، القصة في سورة البقرة، هنبدأ بقه، الأربع تصفيات في الجزء اللي باقي؛ تصفية تصفية، ونشوف مين الناس اللي هتقع، واسأل نفسك بقه: يا ترى أنا لو كنت موجود كنت هقع ولا كنت من اللي هيكملوا؟
التصفية الأولى: صفة الجبن، الجبناء بره، السلبيين، اللي مش مبادرين بره، إيه اللي حصل؟ الآية بتقول: { .. فَلَمَّا كُتِبَ عَلَيْهِمُ الْقِتَالُ تَوَلَّوْاْ إِلاَّ قَلِيلاً مِّنْهُمْ.. } [البقرة :246] هما لسه كانوا بيقولوا إيه {..ابْعَثْ لَنَا مَلِكاً نُّقَاتِلْ فِي سَبِيلِ اللّهِ قَالَ هَلْ عَسَيْتُمْ إِن كُتِبَ عَلَيْكُمُ الْقِتَالُ أَلاَّ تُقَاتِلُواْ قَالُواْ وَمَا لَنَا أَلاَّ نُقَاتِلَ فِي سَبِيلِ اللّهِ وَقَدْ أُخْرِجْنَا مِن دِيَارِنَا وَأَبْنَآئِنَا } ، فربنا أمر بالقتال، وأوحى إلى نبيهم: كتب عليهم القتال { .. فَلَمَّا كُتِبَ عَلَيْهِمُ الْقِتَالُ تَوَلَّوْاْ إِلاَّ قَلِيلاً مِّنْهُمْ.. } قليل في اللغة العربية يعني ما يزدش عن عشرة في المية، يعني لو هما 800 ألف يبقوا بقو كام؟ 80 ألف، و 720 ألف بره، ده إيه؟ مجرد هتحاربوا جالوت، من الاسم بس، شايف الجبن بالاسم ..
أيَّ يَوْمَيَّ من الموت أفرّ؟ يـوم لا قُدِّر أو يـوم قُدِرْ؟
فاهمين إنه يوم اللي أخاف فيه، اللي ربنا كتب إن هيحصل لي فيه مشكلة، ولا اللي ربنا كتب إن مش هيحصل لي فيه مشكلة؟ أي يوميّ من الموت أفر؟ أبقى جبان ليه؟ هخاف من إنه يوم اتكتب عليّ أموت فيه؟ ولا يوم ما اتكتبش، يقوم قايل إيه بعديها؟:
يوم لا قُدِّر لا أرهبـهُ ومن المقدور لا ينجو الحَذِرْ
حد جابها؟ جامدة جدًا، من المقدور ما هو حاجة من الاتنين؛ يا اتكتب إنك هتحصل لك مشكلة النهاردة، يا ما اتكتبش، لو اتكتب كويس، لو ما اتكتبش طب خايف من إيه يا ابني ما هو ما اتكتبش، ولو اتكتب لو أنت عامل إيه هيحصل يا جماعة، خليك شجاع، الأساطير زي العملاق اللي أنا حكيتها لك، بتخوف النفوس الضعيفة، خليك شجاع، خلي نفسك قوية، سئل الجبل مما علوك؟ قال من دنو الوادي، الوادي هو اللي واطي، لما بتطاطي، الجبل بيعلى، بس أنت اللي عليته، مما علوك يا جبل؟ من دنو الوادي.
ربنا من أسمائه العزيز، هل أنت عبد العزيز يا أخي؟ اسمه العزيز، إوعى تكون مش عبد العزيز، إوعى تطاطي، إوعى تهين نفسك، إوعى ما تبقاش نفس شجاعة، مدرس في الفصل: مين اللي عمل كده؟ وأنت بترتجف، أنا غلطت، أنا عملت كده، كن شجاع، حتى لما تغلط ما تعالجش غلط بغلط.
كانوا كام؟ 800 ، نزلوا على كام؟ 80 ، لمجرد اسم جالوت، ها طب عايزين بقه ناخد الحلول، اكتب بقه معايا، كيف أكون شجاعًا مبادرًا؟ إزاي أقوي الشجاعة عشان أعلي من اللي واخد أربع درجات، ما هو كل واحد شايف نفسه، ما تحطش رقم أنت مش قده، ها مين عايز يعلي لسبعة أو لتمانية؟
أول حاجة العبادة، الإيمان، شفت بقه، الإيمان هيقوي النفس؟ طبعًا؛ أمال الإيمان يقوي إيه لما مش هيقوي النفس؟ قيام الليل، رمضان فرصة، هتقولي إيه العلاقة؟ الإيمان بربنا أنا مع الله، أنا مع العظيم، أنا مع العزيز، أنا مع القوي، أنا قوي بالله. الإيمان والعبادة تعلمك التوكل على الله، أنا مضيت له، توكلت على الله، زي اللي بيروح الشهر العقاري يمضي توكلت على الله، خلاص، هخاف من إيه؟ أنا قوي بالله { الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُواْ لَكُمْ فَاخْشَوْهُمْ فَزَادَهُمْ إِيمَاناً وَقَالُواْ حَسْبُنَا اللّهُ وَنِعْمَ الْوَكِيلُ فَانقَلَبُواْ بِنِعْمَةٍ مِّنَ اللّهِ وَفَضْلٍ لَّمْ يَمْسَسْهُمْ سُوءٌ } [آل عمران:173: 174].
يبقى أول حاجة: العبادة، تاني حاجة: عايز تبقى شجاع مبادر: التدريب على المبادرة، الأسبوع الجاي شوف أربع حاجات روح اعملهم، اعمل معايا جدول، أنت شجاع مبادر حط الدرجة بتاعتك وبعدين حط خانة جديدة: كيف أكون شجاع مبادر؟
1ـ العبادة: رمضان فرصة العبادة، طاقة، روح جديدة، روح فوق روحك، اقرا قرآن {وَكَذَلِكَ أَوْحَيْنَا إِلَيْكَ رُوحاً مِّنْ أَمْرِنَا}[الشورى:52] والله يا جماعة اليوم اللي بقرا فيه قرآن أنا قوي والله العظيم، واسألوا الناس اللي بتقرا القرآن كويس، بس تقرا وتحس، وقصص القرآن بيساعدك.
2ـ عايز تبقى شجاع مبادر؟ تعمل إيه؟ تدريب على المبادرة؛ مرة صلة رحم مقطوعة، مرة تقدمه لمديرك في الشغل، وما تتكسفش، اختار لك أربع مرات في الشهر، إيه هي؟ ما أعرفش، كل واحد أدرى بنفسه. بس خلي بالك في مشكلة في الغربلة الأولانية، دول ناس مش منضبطة، إمبارح كانوا بيقولوا كلام والنهاردة بيقولوا كلام تاني، راح فين الحماس؟ اختفوا، جريوا، ده مش منضبطين.
سؤال تاني: إزاي أبقى منضبط؟ خلي بالكم الحلقة دي حلقة معالجة نفوس، تصعيد شخصيات، تنمية بشرية، إزاي أكون منضبط؟ أنا مهرجل، أنا عارف نفسي، دي أكتر حاجة حاطط فيها واحد، يعني تحت خالص، اعمل معايا الجدول ده أربع حاجات، اكتب بالعرض 30 يوم، رمضان كله، وحط لي أربع خانات؛ الخانة الأولى حافظ على صلاة الفجر، ما هو ده جزء من الانضباط، مش عارف يصلي ده منضبط ده؟ ربنا بيقول: { حَافِظُواْ عَلَى الصَّلَوَاتِ والصَّلاَةِ الْوُسْطَى } [البقرة : 238]، مش عارف يصلي، ويجيني ناس، والله بزعل قوي، يقولي أنا مش عارف أصلي، أعمل إيه؟ يا عم صلي، يعني تعمل إيه؟ صلي
1ـ صلاة الفجر
2ـ رياضة يومية ساعة، أو مشي ساعة، أنا عملت نفس الجدول ده سنين يا جماعة.
3 ـ قراءة كتاب أسبوعي، كل ده انضباط.
4 ـ دور على أكتر حاجة أنت متسيب فيها واضبطها الشهر ده، لو فاتورة الموبايل، لو أوضتك المهرجلة، اختار، أنت أدرى بنفسك أربع حاجات.
طيب التصفية التانية: ها يبقى {فَلَمَّا كُتِبَ عَلَيْهِمُ الْقِتَالُ تَوَلَّوْاْ إِلاَّ قَلِيلاً مِّنْهُمْ وَاللّهُ عَلِيمٌ بِالظَّالِمِينَ..} الآية اللي بعديها:{وَقَالَ لَهُمْ نَبِيُّهُمْ إِنَّ اللّهَ قَدْ بَعَثَ لَكُمْ طَالُوتَ مَلِكاً} التصفية التانية: أنت مخلص ولا أناني؟ {قَالُوَاْ أَنَّى يَكُونُ لَهُ الْمُلْكُ عَلَيْنَا..}[البقرة:247] ده يبقى ملك علينا وقادة العشائر والناس اللي معاهم اتخانقوا، كله قال لأ مش عايزينه، ده واحد من الناس الغلابة، يبقى قائد علينا؟! {قَالُوَاْ أَنَّى يَكُونُ لَهُ الْمُلْكُ عَلَيْنَا وَنَحْنُ أَحَقُّ بِالْمُلْكِ مِنْهُ وَلَمْ يُؤْتَ سَعَةً مِّنَ الْمَالِ}[البقرة:247] ده غلبان {قَالَ إِنَّ اللّهَ اصْطَفَاهُ عَلَيْكُمْ} ده ربنا اللي اختاره، لأه{ تَوَلَّوْاْ إِلاَّ قَلِيلاً مِّنْهُمْ } ها بقوا كام؟ وصلنا 80 ألف، إيه مشكلتهم المرة دي؟ هل أنت متجرد؟ هل أنت مخلص؟ أعرف إزاي؟ لو اسمك ما اتذكرش في عمل تشتغل ولا لأ؛ عمل خيري؟ لو حد ضايقك في العمل الخيري تسيبه وتمشي؟ طب أنت ما بتشتغلش في العمل الخيري ليه؟ علشان ما فيهوش تلميع؟ طب لو كنت مسئول عن شغلانة وبتحبها وبتقول أنا بعملها لله واتشالت وجه واحد مكانك هتبطل شغل وهتتخانق ولا هتكمل؟ طب تشتغل أكتر ولا أقل لو اتشالت؟ تعرف تبقى مخلص زي خالد بن الوليد، عمر بن الخطاب عزله من الجيش، خلي بالك سيدنا عمر ده رجل حكيم، ما يعزلش حد في وسط المعركة، تخيل ده ممكن يعمل مشكلة في وسط المعركة، ده قائد يعني ممكن الجيش يتقسم نصين ويحارب بعضه، ما استدعاهوش وخلاه جنبه وبعدين أصدر القرار، لأ، وهو هناك عمر، خالد ده مخلص، وبعت له الجواب يا خالد: أنت تنزل، وتطلع أبو عبيدة بن الجراح، صعبة جدًا، فلقوه بيشتغل أكتر مما كان بيشتغل وهو قائد، فسئلوه أنت بتشتغل كده ليه؟ قال إنما أفتح الشام لله لا لعمر بن الخطاب، اعلى كده بنفسك، واسأل نفسك تاخد كام؟ فلما وصلت الكلمة لعمر، قال: يأبى خالد إلا أن يكون أميرًا، خالد ده أمير؛ نزل جندي ده قائد، دي عقلية قائد.
إزاي أبقى مخلص؟ الحل ها تاخد كام؟ تدي لنفسك كام درجة؟ لو أنت ما بتعملش عمل خيري، حط صفر، أنت أصلاً لم تختبر صفر، واحد زعل، تدي نفسك كام؟ المهم إزاي أتدرب؟
1-ادعي بإخلاص، الدعاء بإخلاص
2ـ اشتغل في عمل خيري عشان تدرب نفسك
3 ـ قبل أي عمل خد نية يا رب أنا بعملها ليك، الناس اللي حاضرة معايا أنا جاي لله مش جاي أتصور، ها خد نية، ها شفت إحنا ماشيين إزاي؟ خلي بالك هو لما نبيهم -ربنا كريم- حب يقنعهم إن ربنا اختاره، مش أنا اللي اختارته {قَالُوَاْ أَنَّى يَكُونُ لَهُ الْمُلْكُ عَلَيْنَا وَنَحْنُ أَحَقُّ بِالْمُلْكِ مِنْهُ وَلَمْ يُؤْتَ سَعَةً مِّنَ الْمَالِ قَالَ إِنَّ اللّهَ اصْطَفَاهُ عَلَيْكُمْ وَزَادَهُ بَسْطَةً فِي الْعِلْمِ وَالْجِسْمِ}[البقرة:247]أعلم منكم، والجسم يصلح إنه يواجه جالوت، الصفات الشكلية مهمة في الإسلام {وَاللّهُ يُؤْتِي مُلْكَهُ مَن يَشَاءُ وَاللّهُ وَاسِعٌ عَلِيمٌ وَقَالَ لَهُمْ نِبِيُّهُمْ إِنَّ آيَةَ مُلْكِهِ أَن يَأْتِيَكُمُ التَّابُوتُ } اللي جالوت خده { فِيهِ سَكِينَةٌ مِّن رَّبِّكُمْ} عشان يجمدكم {وَبَقِيَّةٌ مِّمَّا تَرَكَ آلُ مُوسَى وَآلُ هَارُونَ تَحْمِلُهُ الْمَلآئِكَةُ} الملائكة هتاخده، آية معجزة، هتاخده وتطير بيه في السماء، تخيل بقه واقفين شايفين حاجة سودا جاية من بعيد ما هو مش عارفين هي طايرة إزاي، الملائكة هي اللي شايلاه، جاية كده بتقرب وقامت نازلة محطوطة قدام بيت طالوت، ومع ذلك تولوا، ليه؟ المعجزة ما تنفعش النفوس الضعيفة، ما فيش فائدة، حتى لو جت المعجزة وأنت نفسك ضعيفة ما فيش فائدة، ما تقولش أصل أنا مستني المعجزة، مستني المهدي المنتظر، يا عم صلح نفسك. تعالَ نكمل قصة رهيبة، طيب التصفية؛ هما كام دلوقتي؟ بقوا كام؟ بقوا 8000 .
التصفية اللي بعديها: الإرادة { فَلَمَّا فَصَلَ طَالُوتُ بِالْجُنُودِ} [البقرة : 249] كلمة فصل دي خطيرة قوي، فصل جاية من نظم ورتب ، انتوا عارفين الكتاب لما بيتبوب، بيتبوب فصول؛ لأنها متنظمة، صح؟ دول كانوا متسيبين غير منضبطين، طالوت فصل الناس، يقولك فصل دراسي، عشان كل ناس في سن معينة مع بعضها نظام، أكتر إنجاز عمله طالوت أعاد تنظيم الناس المتسيبة، وإحنا في بلادنا محتاجين ما نبقاش متسيبين فوضويين، محتاجين نتعلم النظام، فلما فصل تعب كتير، ولذلك "فلما" خدت وقت، قعد يظبط يظبط {فَلَمَّا فَصَلَ طَالُوتُ بِالْجُنُود} إحنا عملنا غربلتين، التالتة بقه عايز يطمن على الإرادة {قَالَ إِنَّ اللّهَ مُبْتَلِيكُم بِنَهَرٍ} هما عطشانين قوي، وداخلين على نهر، هما دلوقتي بين الأدرن وفلسطين، ونهر بين الأردن وفلسطين، اللي هيعدي النهر يلاقي جالوت قدامه{إِنَّ اللّهَ مُبْتَلِيكُم بِنَهَرٍ فَمَن شَرِبَ مِنْهُ فَلَيْسَ مِنِّي} يروح ما يعديش النهر {وَمَن لَّمْ يَطْعَمْهُ فَإِنَّهُ مِنِّي} اللي مش هياخد منه يعدي معايا {إِلاَّ مَنِ اغْتَرَفَ غُرْفَةً بِيَدِهِ} أنا مش بضيق عليكم، اللي هياخد بس بإيده عشان عطشان، طبعًا شافوا المية ريقهم جري {فَشَرِبُواْ مِنْهُ إِلاَّ قَلِيلاً } قليل من قليل من قليل من قليل، نزلوا لكام؟ بقوا 800 من 80000 لـ 800، ما فيش إرادة، ما استحملوش، شافوا المية، ما وقفوش.
أنت كده أول ما بتشوف شهوة ما بتقدرش تقف؟ أول ما بتشوفي لبس ما بتقدريش، لازم تشتريه؟ أنت عامل إيه؟ كام من عشرة؟ ناس كتير من الشباب ما عندوش إرادة، يقولك أنا ما أقدرش، أنا حاولت، بس ما أقدرش، على فكرة أحيانًا كتير قرار ما أقدرش بيكون قرار غلط، لأ تقدر، وضاعف قوتك، وضاعف إرادتك.
بيقولك كان فيه مدرب قال للعيب رياضي معاه، قاله اعمل ميت ضغط، قاله إيه؟ ميت ضغط ما أقدرش، قاله اعمل، قام عمل 60، ووقع، قاله تقدر، قاله ما أقدرش، قام عامل 20 كمان ووقع، قاله تقدر، جمد نفسك، خد نية، سبح وأنت بتشتغل، قام عامل 20 كمان ووقع، قاله تقدر، وهتحاول، ويالله شد حيلك، قام جايب 20 كمان، جاب ضعفه، كان عامل 60 جاب 120 ، فقاله الفرق بين الأولانية والتانية إنك فاكر إن دي إرادتك أنت، إرادتك الضعف، وأنت مش واخد بالك، ده قرار أنت كنت واخده غلط، ياه خطيرة الحتة دي، عايز تجمد إرادتك، عايز ما تشربش من النهر، عايز تجمد، عارف أدلك الحل إيه؟ تعمل إيه؟ اكتب بقه تعمل 3 حاجات:
1ـ العبادة والقرآن روح طاقة إرادة .
2ـ حط مهام محددة الشهر ده تنجزها في شهر
3ـ الرياضة، العب رياضة، وعلّي كل أسبوع تحملك، وهيعينك على كده إنك صايم رمضان، الصيام إرادة .
سقطوا، شربوا، وقعوا، فاضل كام؟ فاضل 800 خلاص بقه، دول آخر ناس عدوا النهر، والباقي رجع، تخيل بقه الناس اللي عمالة تقع، على فكرة الشاب الصغير اللي عنده 16 سنة راعي الغنم هنقول اسمه، تخيل مكمل، مكمل، مكمل، شجاع، ياترى كنت هتكمل ولا كنت هتقع، منضبط، مخلص، عنده إرادة، ما شربش.
اختبر إرادتك، جرب نفسك في انفرادة؛ امشي لك ساعتين تلاتة، هتكمل ولا لأ، نمي الإرادة، الرياضة. أنا كده اديت لك الحلول، على فكرة دي مش محاضرة، ده تدريب تنمية بشرية، بيعلمه لنا القرآن.
عدوا وقفوا قدام جالوت، خلاص؟ لأ، لسه في تصفية؟ فيه تصفية إيه ما عدينا كله؟ {فَلَمَّا جَاوَزَهُ هُوَ وَالَّذِينَ آمَنُواْ مَعَهُ قَالُواْ لاَ طَاقَةَ لَنَا الْيَوْمَ بِجَالُوتَ وَجُنودِهِ} مش هنقدر عليهم، يا نهار أبيض! على فكرة الأخرانية دي أصعب واحدة؛ لأن المفروض الآخرانيين دول نجحوا في كل الاختبارات، حتى لو لقيت اللي أنت مش مصدق إنه يقع ووقع، ما لكش دعوة كمل، ما هو ممكن شباب يتفقوا مع بعض النهاردة هنصنع الحياة، هنعمل، لو لقيته وقع، ما لكش دعوة، كمل، ما لكش دعوة بالعدد كنا كام وبقينا كام، يا عم مش مهم العدد، الإرادة تاني { قَالُواْ لاَ طَاقَةَ لَنَا الْيَوْمَ بِجَالُوتَ وَجُنودِهِ} بص بقه النقاوة الخلاصة {قَالَ الَّذِينَ يَظُنُّونَ أَنَّهُم مُّلاَقُو اللّهِ كَم مِّن فِئَةٍ قَلِيلَةٍ غَلَبَتْ فِئَةً كَثِيرَةً بِإِذْنِ اللّهِ وَاللّهُ مَعَ الصَّابِرِينَ} [البقرة : 249].
الدرس أهو، الصابرين اللي عندهم الأربعة، ما هو الصبر ده صفة نفسية، خلي بالك الآية دي هي خلاصة الدرس، دول الخلاصة، ما عندناش في الأمة دول، أمة محمد مش عارفة تطلع دول الـ 313 دول، طب ليه ما تبقاش أنت؟ يا أخي اجمد {وَلَمَّا بَرَزُواْ لِجَالُوتَ وَجُنُودِهِ قَالُواْ رَبَّنَا أَفْرِغْ عَلَيْنَا صَبْراً وَثَبِّتْ أَقْدَامَنَا وَانصُرْنَا عَلَى الْقَوْمِ الْكَافِرِينَ}افتح علينا خزائن الصبر، أفرغ علينا صبرًا من فوقنا { وَثَبِّتْ أَقْدَامَنَا } من تحتنا { وَانصُرْنَا عَلَى الْقَوْمِ الْكَافِرِينَ فَهَزَمُوهُم بِإِذْنِ اللّهِ } [البقرة :250: 251] بسرعة كده هزموهم؟ كلمة، يعني الإعداد النفسي خد كام آية؟ ربع كامل، وهزموهم جت في آية؟ في كلمة.
الموضوع مش موضوع جالوت، موضوعكم أنتم التجهيز النفسي، خد ربع وكلمة هزموهم، يعني أنا كنت متخيل يحكي هزموهم إزاي؛ تاخد لها ربع، واستعدوا في كلمة، دا هي النفوس أهم، هزموهم بإذن الله، تنتصر الأمة وتتعز وتترفع كرامتها وتبقى جميلة وعظيمة بنفوس شباب يصنعوا { فَهَزَمُوهُم بِإِذْنِ اللّهِ وَقَتَلَ دَاوُودُ جَالُوتَ} مين داوود؟ الشاب اللي كان عنده 16 سنة سيدنا داوود ؟ آه، بس كان لسه مش نبي، هو اللي قتل جالوت ؟ هو اللي قتل جالوت، وده كان تمهيد بعد كده، إنه هيبقى قائد بني إسرائيل، وبعدين خلف سليمان، فيبقى سليمان ... النهضة ابتدت بالـ313 ، وسليمان اللي قال {هَبْ لِي مُلْكاً لَّا يَنبَغِي لِأَحَدٍ مِّنْ بَعْدِي إِنَّكَ أَنتَ الْوَهَّابُ[ص : 35] وحصل، ابتدى بـ 313 ؟ ابتدى بـ313 ، دول اللي عملوا نهضة ؟ دول اللي عملوا نهضة، يبقى مش مهم الـ 800 ألف، لأ، العبرة بالرجالة، مش بالأصفار {فَهَزَمُوهُم بِإِذْنِ اللّهِ} شوفت القرآن عظيم قد إيه؟ { وَقَتَلَ دَاوُودُ جَالُوتَ وَآتَاهُ اللّهُ الْمُلْكَ وَالْحِكْمَةَ} [البقرة:251] وبقى نبي؛ لأنه نجح في كل الاختبارات، كأنه بيقول للشباب اللي عملها، شاب عنده 16 سنة اللي عملها: مش طالوت اللي قتل، اللي قتل هو مش طالوت، اللي قتل داوود، ما تستهونش بنفسك، خليك شجاع، ومخلص، وشوف ربنا هيعليك، خليك منضبط وعندك إرادة وشوف ربنا هيعليك إزاي، كن داوود.
دي قصة داوود وطالوت، قصة جميلة قوي قوي قوي، أنا بحبها قوي، بهديها لكل اللي بيسمعونا، وتتختم السورة { وَلَوْلاَ دَفْعُ اللّهِ النَّاسَ بَعْضَهُمْ بِبَعْضٍ لَّفَسَدَتِ الأَرْضُ }
12.30 أنا موجود بالليل مع الشباب، أي حد عايز يتكلم معايا أو شات تحت أمركم على موقع عمرو خالد دوت نت، افتحوا الآيات دي النهاردة، قصة طالوت واقرأها تاني لوحدك.
أقول قولي هذا وأستغفر الله العظيم لي ولكم، تعالوا ندعي ربنا يفتح علينا وينصرنا:
اللهم يا ذا الجلال والإكرام، يا أرحم الراحمين، يا أكرم الأكرمين، يا أجود الأجودين، افتح علينا يا رب، افتح على أمة حبيبك محمد، يا أرحم الراحمين، يا أكرم الأكرمين، يا أجود الأجودين، يا قريبًا غير بعيد، يا غالبًا غير مغلوب، يا عزيز، يا قوي، يا رحمان يا رحيم، اللهم إنا نسألك عزة لهذا الشباب، اللهم ارفع شبابنا، يا رب أرنا آية في رمضان في هداية الشباب، أرنا آية في رمضان في إرادة الشباب يا ذا الجلال والإكرام، اللهم منزل الكتاب، مجري السحاب، هازم الأحزاب ارفع أمة حبيبك محمد، وارض عنا، وارفع مقتك وغضبك عنا، اللهم أعزنا، اجعلنا سلما لأوليائك حربا على أعدائك، اللهم يا ذا الجلال والإكرام نسألك نصرًا كنصر بدر، نسألك تثبيتا كتثبيت موسى، اللهم كن لنا ولا تكن علينا، آثرنا ولا تؤثر علينا، امكر لنا ولا تمكر بنا، دبر لنا فإنا لا نحسن التدبير، كن بنا رؤوفًا، وكن بنا عطوفا، ارفعنا ولا تضعنا، أكرمنا ولا تهنا، نسألك إرادة وانضباط وشجاعة وإخلاص، ارزقنا الإخلاص، يا رب الإخلاص، شبابنا يا رب ارزقهم إرادة وعزة نفس وشجاعة ومبادرة وإرادة وانضباط، وارض عنهم، اجعلهم آية في رمضان، أرنا آية في رمضان في الشباب والبنات، يا رب نستغيث بك في رمضان، يا رب استجب، إحنا في رمضان، أنت اللي منيت علينا برمضان، أعتقنا السنة دي، وسامحنا، وأعنا على الإيمان، وعلى الصلاة والقرآن لتسمو وتقوى أنفسنا، قونا بالقرآن، قوي أرواحنا بالقرآن، يا رب ولادنا وبناتنا، احفظ ولادنا يا رب، احفظهم، احفظ الأمهات في ولادها، ثبت ولادنا، احفظهم، عزهم، اجعلهم صالحين اجعلهم بارين بنا، يا رب العالمين أكرمنا في ولادنا، يا رب ارزقنا بولادنا، يا رب ارض عنا، وعن ولادنا، اجعل بيوتنا مليانة بالملائكة، اطرد الشياطين من بيوتنا، يا رب نصر من عندك، وعزة من عندك، اللهم لا يأتي العيد إلا والإسلام عزيز، آمين آمين، وصلى اللهم وسلم وبارك على سيدنا محمد، والسلام عليكم ورحمة الله وبركاته.
المصدر: http://alresalah.ws/programs2/index.jsp?inc=36&id=1509&lang=ar&cat=74&type=1