|
|
|
| عمرو خالد |
عايشين مع رمضان يوم ورا يوم، يعني كل الناس مستمتعة، والحقيقة عايز أقول إن إحنا وإحنا بنسجل الحلقات دي إحنا بنسجل وقاعد قدامي دلوقتي جمهور من أهلنا وحبايبنا وأخواتنا، إحنا بنصور السنة دي مع الجاليات الإسلامية في أوربا، صورنا من مكة والمدينة، وصورنا من القاهرة رمضان من الرمضانات كتير في مصر، وصورنا في لبنان رمضانين، والسنة دي قلنا نصور مع الجاليات المسلمة في أوربا، نقوي ونشد الهمة، وقدامي دلوقتي عشر جنسيات، حاجة رائعة حاضرين معانا، ومنهم ناس من أهل التشيك من مسلمات التشيك، ومن مسلمات تشسلوفاكيا، ومنهم بقى من فلسطين ومصر والعراق، وكله ما شاء الله لا حول ولا قوة إلا بالله، وسلامهم لأهليهم في كل بلادهم.
الحاجة التانية اللي عايز أقولها: أخباركم إيه؟ في رمضان الشدة عاملة إيه؟ الهمة، و و، اعبدوا يا جماعة اعبدوا كتير، صلوا كتير، اسجدوا كتير، اقنتوا لربنا، القنوت والقيام، اقفوا كتير بالليل، انهلوا من القرب من ربنا. رمضان ده فرصة، حد عارف هيعيش السنة اللي جاية ولا لأ؟ حد عارف هيقبض في أي ليلة؟
حلقة النهاردة قصة غالية أوي أوي، وحبيبة أوي أوي، السيدة مريم. حلقة النهاردة بتركز علي البنات والستات، وبتكلم بالذات البنات من سن 15 لـ23، والفترة دي بتكلمهم أوي أوي، وبتكلم الأمهات، وبتكلم الآباء، وبتكلم كل واحد عايز يعبد ربنا، أصلها مريم العابدة، بطلة القصة فتاة، عشان كده بقول من 15 لـ 23. أصل الأحداث الكبرى في حياة مريم وهي فتاة، مريم العابدة وهي 16 سنة، مريم القائمة بالليل 16 17 سنة، مريم اللي كثيرة التأمل والتفكر في خلق الله 16 17 سنة، مريم وهي تحمل المسيح المعجزة، خلي بالكم مريم من الشخصيات القليلة في العالم اللي الكل يجمع عليها أيًا كانت جنسياتهم أو ديانتهم، الكل بيحبها، محبوبة جدًا، وأجمل ما ذكرت مريم ذكرت في سورة مريم في القرآن، أنا معرفش حد اتكلم علي مريم ويخليك تحبها أد سورة مريم في القرآن، وهي السورة اللي هنعيش معاها النهاردة، إحنا كل يوم بنعيش مع القرآن، إمبارح كنا مع سورة البروج، وقبل كده مع قصة بني آدم سورة المائدة، وقبل كده مع سورة القلم أصحاب الجنة، والنهاردة مع سورة مريم، شوف الحلقات، أنتم واخدين بالكم قصص القرآن بتعمل إيه؟ ده كله شايف نفسه النهاردة، بنكلم البنات، إمبارح كنا بنكلم الشباب، صلح في بلدك، قبلها كنا بنكمل في قابيل وهابيل العراق ولبنان ودارفور، قبلها بنكلم الأغنية والشباب اللي هيبرّوا آبائهم.
هي دي قصص القرآن، كله متشاف، صلح، شفتوا بقى. فاكرين أول حلقة قلت هنصلح بالقرآن، وحنحب إن شاء الله القرآن من خلال القصص، القصة مريم بنت عمران، وعايز تعرف منزلة مريم، هي منزلة مريم إيه؟ هي مقامها عند ربنا إيه؟ أول كلمة: سيدة نساء العالمين، وده مش كلامنا، ده كلام ربنا سبحانه وتعالى: {وَإِذْ قَالَتِ الْمَلاَئِكَةُ يَا مَرْيَمُ إِنَّ اللّهَ اصْطَفَاكِ وَطَهَّرَكِ وَاصْطَفَاكِ عَلَى نِسَاء الْعَالَمِينَ} [آل عمران : 42] .
عايز تعرف منزلة مريم؟ المرأة الوحيدة اللي ذكرت باسمها في القرآن، يعني بقية النساء في القرآن، يقول لك :أم موسي، "وَأَوْحَيْنَا إِلَى أُمِّ مُوسَى" [القصص : 7] ، يقول لك: امرأة فرعون، لكنها الوحيدة المذكورة باسمها في القرآن، ومذكورة كام مرة؟ 33 مرة، بعدد سجدات اليوم، مش إحنا بنسجد في اليوم 33 مرة، أصلها كثيرة السجود، وبعدين خلي بالك هي ذكرت كده أكتر من بعض الأنبياء في القرآن،لا وسورة باسمها، وبعدين النبي يقول لك إيه؟:"أفضل نساء أهل الجنة أربعة: خديجة بنت خويلد، ومريم بنت عمران، وآسيا امرأة فرعون، وفاطمة بنت محمد" اتنين ستات كبار، واتنين بنات؛ مريم فتاة، وفاطمة بنت محمد كانت في سنها 18 19 سنة، يا! ، ويقول لك: "لم يكمل من النساء أحد مثل مريم وآسيا" من الناس اللي اكتملت كامرأة في علقها ورحمتها وصبرها وجلدها وحنيتها، واخدة كل حاجة.
ليه مريم فضلت؟ عايز أشرح لك فكرة، الأول: كل شريحة سنية لها صفات مميزة لها تغلب عليها، يعني الشيخ في سنة الأربعين إيه أكتر صفة؟ رجاحة العقل والحكمة، طب الطفل اللي عنده سبع سنين إيه أكتر صفة؟ اللعب والمرح والهزار والفكاهة، طب البنت من 15 لـ 22 إيه أكتر صفة بتميزها؟ في أم بتقول: العند، لا والله، أنا عرفت الطفل، وعرفت الراجل الكبير، طب البنات في السن ده، مهي مريم كانت فتاة في السن ده، إيه أكتر صفة بتميزها؟ كتلة عاطفة، كتلة حنان لا نهائي، عاطفة، حب عندها حب، جينات الحب، هي طبيعة السن ده كده.
يعني لو أنا وأنتم الناس اللي قاعدة كده، لو قلنا إن الحب له وحدات، أو العاطفة لها وحدات، كل واحد عنده 100 وحدة عاطفة، فالبنت في السن ده ألف وحدة عاطفة. سؤال: الواحدات دي حتروح فين؟ أه الوحدات دي لازم تتصرف، لازم تخرج، وما تقوليش لا، أصل في أمهات تقول لا ده أنا بنتي هادية قاعدة ما بتعملش حاجة، يعني إزاي؟ عايزة تقنعيني إن طفل عنده سبع سنين مبيلعبش في حاجة، غلط مش ممكن، طب البنت في السن ده هتودي العاطفة فين؟
هنا تظهر مريم، ليه؟ مريم فتاة، وعندها عاطفة، هتودي العاطفة فين يا مريم؟ هيبدأ أول ملمح إن مريم سيدة نساء العالمين، أنا عندي عاطفة، وأنا لسه ما اتجوزتش ومعنديش عيال، عشان أطلع العاطفة دي في سكتها، أنا هفتح سكة للعاطفة، دي عملت حاجتين: حب شديد لربنا، حطلع العاطفة دي في عبادة، ده أنا هصلي كتير، أنا هعبده، أنا هقوم بين إيديه.
يا بنات أول حتة أهه: اعبدي كتير، طلعي العاطفة فين؟ هحب ربنا، ما تقولي ليش أنت كده تطلع العاطفة؟ دي أحلي حاجة تطلع فيها العاطفة، جربي في رمضان، ورمضان فرصة، صلي كتير، اسجدي بين إيديه، ابكي له، ادعيه، أطلبي أمنياتك، جوزني واحد أحبه، جوزني واحد يسعدني، عايزة كذا، كلميه، قربي منه، طلعي الحب عنده، قربي قربي. دي أول حاجة عملتها مريم.
تاني حاجة عملتها مريم طلعت فيها العاطفة: العمل الخيري، العمل التطوعي، أيتام، وملاجئ، وضعفاء، وأرامل، بس هي العمل الخيري كان عندها إيه؟ العمل الخيري كان عندها بيت المقدس، أنا هخدم بيت المقدس، وهساعد الناس، وهبقي خادمة العباد، وهساعد أي حد يجي يعبد ربنا، وأعين في بيت المقدس. شفت طلعت العاطفة فين؟
يعني أنا عايز إيه من البنات؟ طب أنا بشرح ليه للبنات؟ عايز منك حاجتين: كوني مريمية، كوني زي مريم، حاجتين: سكتين: أنتي عندك ألف وحدة عاطفة، أنا خايف عليها، أنا خايف يروحوا في سكة غلط، أنا خايف الموضوع يتحول لولد يضيع العاطفة بتاعتك ويضيعك، أنا خايف عليكي، خلي بالك لو اتجرحت مرة من ولد، أنت ألف وحدة، أنت كتلة عاطفة، لو اتجرحت مرة هتتوجعي أوي، فتتجرحي من واحد تاني فتتوجعي أوي، فتتجرحي من واحد تالت فتبوظ العاطفة، وبعد الجواز تبقي خلاص فقدتي العاطفة، ليه؟ أنت بوظتيها، مهو في واحدة اسمها مريم، اسمها سيدة نساء العالمين، وفي سورة باسمها ما تفتحي متمشي في سكتها، روحي في سكة مريم، حبي ربنا، طلعيها في عبادة، صلي لله رمضان، فرصة جربي، طب قلدي مريم في رمضان، جربي في رمضان، يا بنات قلدوا مريم في رمضان، طب العمل الخيري شوفي لك عمل خيري، شوفي لك ملجأ أيتام، شوفي لك فقراء، شوفي لك أيتام تحضنيهم، طلعي، اصرفي من الألف وحدة، لازم يطلعوا، ما ينفعش يتكبتوا يا بنات، إوعي الصحوبية، إوعي ولد يضحك عليكي، إوعي ولد ياخد الوحدات بتاعتك، خلي بالك هيضيعك، وخلي بالك ربنا بيقول: {وَلاَ مُتَّخِذَاتِ أَخْدَانٍ} [النساء : 25]، ما تصاحبيش، روحي اتجوزي، لكن ما تصاحبيش، طب أنا لسه ما أتجوزتش، أعمل إيه؟ واتأخر الجواز، طلعيهم في فقراء وغلابة، دوري علي حتة تطلعي فيها، طلعيهم في عبادة، طلعيهم في صلاة، وقيام، ودعاء، حبي ربنا، ابكي من خشيته، هطلعي كده شوية وحدات، دي مريم.
شفتوا مريم، أول ملمح إيه؟ وأنتم يا شباب حرام عليك بنت، حرام عليك تضيع بنت وتستغل من عندها وحدات عاطفة زيادة، حرام عليك ما تغدرش ببنت ولا تضحك علي أبوها وأمها، حرام عليك، سألته أنت بتحترمها أد إيه؟ يقول لك بحبها، لكن لو هي جربي كده.
أنا دايما بقول للبنات الحكاية دي: وأنت راكبة معاه كده، قولي له: الحق ده أختك في العربية اللي قدامنا، هيعمل فيكي إيه؟ يا هيسيبك ويجري جري يلحق أخته، فتعرفي هو شايفك إزاي، لا هيقول لك لا مفيش مشكلة، معنديش مشاكل، فتعرفي إن هو عامل إزاي.
وكلمة للآباء والأمهات: أرجوكي وجهي بنتك للعمل الخيري، أنا بزعل أوي لما ألاقي بنت من صناع الحياة تقول لي أمي منعاني أشتغل في العمل الخيري، يا ست الحقي بنتك ساعتها، هتندمي أكتر لو قعدت لك في البيت، أنا بخاف من الفراغ، أنا بخاف من بنت قاعدة ما بتعملش حاجة، هطلع الوحدات فين؟ وتقولي لا أنا مطمنة عليها كده، انسي لازم تتصرف الوحدات.
شفت أول حتة في مريم؟ خطيرة قصة مريم خطيرة، طيب أول حاجة في مريم، تيجوا نشوف أول حاجة في مريم، مريم العابدة: {وَاذْكُرْ فِي الْكِتَابِ مَرْيَمَ إِذِ انتَبَذَتْ مِنْ أَهْلِهَا مَكَاناً شَرْقِيّاً} [مريم : 16] إيه شرقيًا ده؟ اختارت إن أوضتها تكون بتبص علي مشرق الشمس، عشان دايمًا تبقي شايفة شروق الشمس، دي بداية مريم مع العبادة؛ التفكر في خلق الله، دي بتحب، انتوا عارفين البنات الرومانسيات اللي بتروح تحب، تروح تقعد علي البحر تتفرج علي البحر، بس هي بتتفرج علي البحر ليه؟ عشان تعيش في الرومانسية.
مريم كده، بس بتطلعها في حب ربنا، بتطلعها في التفكر في خلق الله، يعني كأني بقول للبنات: شوفي مريم عندها كمان نفس العاطفة، بس بتطلع إزاي، يا سلام علي الخالق العظيم، حلوة أوي وأنت بتقولي حلوة أوي، بس أنت بتقولي حلوة وتقفي، هي بتقول حلوة أوي والحمد لله ولا إله إلا الله، فتطلع وحدات عاطفة في سكة صحيحة، {وَاذْكُرْ فِي الْكِتَابِ مَرْيَمَ إِذِ انتَبَذَتْ مِنْ أَهْلِهَا مَكَاناً شَرْقِيّاً}[مريم:16] ساعات بتاخد نفسها من أهلها، مش قاعدة في وسط أصحابها وعمالة تلعب على طول لا، ساعات أنا وربي، "إِذِ انتَبَذَتْ مِنْ أَهْلِهَا مَكَاناً شَرْقِيّاً".
عبادة التفكر عبادة إحنا محرومين منها، عبادة اندثرت يا خسارة، عبادة اندثرت، تخيل عبادة بها النبي بقي نبي، لما كان يتعبد في غار حراء يتفكر، عبادة بها إبراهيم عليه السلام بقي نبي، و{َكَذَلِكَ نُرِي إِبْرَاهِيمَ مَلَكُوتَ السَّمَاوَاتِ وَالأَرْضِ}[الأنعام:75] "تفكر ساعة خير من قيام سنة". واحد من الصحابة يقول: شاهدت واحد ولا اثنين ولا ثلاثة ولا أربعة يقولون: إن نور الإيمان التفكر. مريم بتعمل إيه كمان؟ {يَا مَرْيَمُ اقْنُتِي لِرَبِّكِ وَاسْجُدِي وَارْكَعِي مَعَ الرَّاكِعِينَ } [آل عمران:43] اسجدي يا مريم وادعي وأنت ساجدة، واركعي مع الراكعين، الله علي عبادتك يا مريم! يبقى فيها تفكر، وعبادتك فيها قيام، وعبادتك فيها سجود، لا مش مرة واثنين {كُلَّمَا دَخَلَ عَلَيْهَا زَكَرِيَّا الْمِحْرَابَ} [آل عمران:37] كل ما يخش يلاقيها بتصلى، كل ما يخش يلاقيها عابدة، ها يا بنات مين ناوية تعبد في رمضان زي السيدة مريم وتستعد؟ هي بقت سيدة نساء العالمين، يا ترى ربنا هيعليكي أد إيه؟
يعني إيه مريم باللغة بتاعتهم، مريم يعني العابدة، ومريم يعني خادمة العباد، فهي اسمها فيه العمل التطوعي، واسمها فيه العبادة، أنتم فاهمين أمها كانت مجهزاها لكده، الله علي مريم جميلة أوي، أنا علي فكرة محبتش السيدة مريم أد ما بدأت أحضر للحلقة دي، حبتها أوي، ونفسي أجيلها يوم القيامة زي أمي دي.
وبعدين خلي بالك، لما بدأت تعبد كده بدأ يحصل لها سلسة من الكرامات من الله، أصلها قربت أوي، طويلة العبادة، تروايح كتير، وبالليل تصلي، الناس نامت وهي تدخل أوضتها، بدل ما البنات تقعد مستنية تليفون، طول الليل قلبها بيدق علشان التليفون، هي قلبها بيدق وهي بتصلى لربنا: اللهم إني أسألك حبك، وحب من أحبك، وحب عمل يقربني إلي حبك، خليني أحبك عشان ملخبطش، ارزقني حبك عشان ملخبطش، يا بنات شفتوا مريم، فبدأت تحصل لها كرامات، إيه الكرامات؟ {كُلَّمَا دَخَلَ عَلَيْهَا زَكَرِيَّا الْمِحْرَابَ وَجَدَ عِندَهَا رِزْقاً} [آل عمران:37]،هي قاعدة بتصلي، كل ما يخش عليها يلاقي رزق، يعني إيه "رزقًا": العلماء يقول لك لما تفتح التفاسير تلاقي عنب في عز الشتا، أو يلاقي هي مخرجتش والأكل موجود كتير، بركة من ربنا، وحاجة تانية: أنتم ليه فكرتوا إن الرزق لازم يكون أكل، ممكن يكون الرزق روحي، "كلَّمَا دَخَلَ عَلَيْهَا زَكَرِيَّا الْمِحْرَابَ وَجَدَ عِندَهَا رِزْقاً" خشوع لله، الناس مبتعرفش تخشع كتير كده، وهي عندها ألف وحدة، كلما دخل عليها زكريا المحراب وجد دموع من خشية الله، كلما دخل عليها زكريا المحراب وجد قرب في الدعاء، كلما دخل عليها زكريا المحراب وجد عندها حالة إيمانية عالية، كل دي أرزاق، أنتم ليه بتفكروا إن الرزق مادي، الله يا مريم! يا سلام! ويا سلام علي القرآن العظيم وهو بيوصف أم نبي آخر بالعظمة دي وبالحب ده.
وعلي فكرة يا جماعة لا تفتكروا إن مريم حياتها سهلة، مريم حياتها صعبة أوي، يا ستات خلي بالكم مريم حياتها صعبة، إزاي؟ مريم يتيمة يعني أبوها مات وهي طفلة، وأمها كبيرة في السن، مش هم خلفوها علي كبر، مش مكنتش بتخلف زوجة عمران، فلما خلفت الأب مات، مريم يتيمة عشان البنات ما تقولش عشان أنا ظروفي صعبة، مش أصعب من مريم، مريم القدوة، فمريم يتيمة، أمها كبيرة مش قادرة تربيها، كبرت في السن، طب مين يكفلها؟ محتاجين حد يكفلها، كفلها مين زوج أختها زكريا، ومتفتكروش إن هو كفلها بسهولة، ده كان في خناقة بين العباد في بيت المقدس، أصل أبو مريم علمهم كلهم، أصل الأب الصالح ربنا بيخلي حد ياخد باله من عياله لو مات، {وَكَانَ أَبُوهُمَا صَالِحاً} [الكهف : 82] فلما مات، خناقة بين العبّاد، كله بيقول: لا أنا اللي أكفلها، لا أنا عايز أقوم بالدور، أنا عايز أكفلها {وَمَا كُنتَ لَدَيْهِمْ إِذْ يُلْقُون أَقْلاَمَهُمْ أَيُّهُمْ يَكْفُلُ مَرْيَمَ وَمَا كُنتَ لَدَيْهِمْ إِذْ يَخْتَصِمُونَ} [آل عمران:44].
مين بيتخانق علي الأيتام دلوقتي؟ مين بيتخانق ويقول أنا هربي الأيتام؟ مين؟ "وَمَا كُنتَ لَدَيْهِمْ إِذْ يَخْتَصِمُونَ" مش دلوقتي يختصمون، أه ابن أخويا مات ولا أعرفه، أخويا التاني اللي يربيه. لما مات جعفر بن أبي طالب ثلاثة من الصحابة بقوا بيتخانقوا، النبي بيقول: من يكفل أبناء جعفر؟ أنا يا رسول الله، أنا يا رسول الله، أنا يا رسول الله، يقول الراوي: والثلاثة أفقر من بعضهم البعض.
طب عملوا إيه؟ {وَمَا كُنتَ لَدَيْهِمْ إِذْ يُلْقُون أَقْلاَمَهُمْ أَيُّهُمْ يَكْفُلُ مَرْيَمَ} مين اللي يكفل مريم؟ فقالوا: نقف عند مجرى النهر، وكل واحد يرمي القلم بتاعه،إشمعني الأقلام؟ أصل أبوها كان بيعلمهم بالقلم، فوفاء له اختاروا الأقلام، شوفوا الوفاء، دي الطريقة اللي نختار بيها، نرمي الأقلام في مجرى النهر، آخر قلم تيار المجري يجرفه هو اللي يكفلها، فاهمين الفكرة يلا نرمي، كل الأقلام تجري وقلم زكريا مش يجي آخر واحد، يقف مكانه، طب نعيد تاني، كله يرمي كل الأقلام، التيار يجرفها وقلم زكريا يقف مكانه، ثالث مرة وكفلها زكريا، بس شوف زكريا عظيم أوي، كلما دخل عليها زكريا المحراب، بص تعهد زكريا مش كفالة أعطاها فلوس، كفالة حنان، كفالة رحمة، كفالة عاطفة، {وَإِذْ قَالَتِ الْمَلاَئِكَةُ يَا مَرْيَمُ إِنَّ اللّهَ اصْطَفَاكِ وَطَهَّرَكِ وَاصْطَفَاكِ عَلَى نِسَاء الْعَالَمِينَ} [آل عمران:42] واخد بالك في اصطفائين، خلي بالكم، ربنا لا يصطفي حد إلا لخصلة حلوة فيه، ممكن تقولي لي ربنا يصطفيكي ليه؟ عملت إيه عشان يصطفيك؟ يعني أعطيني حاجة أقول لك مبروك، إن شاء الله شكلك كده الله سيصطفيك، عارفة يعني إيه؟ يصطفيك يختارك، يصطفيك أن يعتقك الليلة دي.
نفسك تعتقي الليلة دي؟ طب قولي لي حاجة يصطفيكي بيها، لا يصطفيك إلا لخصلة خير فيك. طب هي عملت كل ده، ممكن تروحي لربنا بتوبة النهاردة من ذنب معين أنتي عارفاه محدش يعرفه عشان يصطفيكي ،الليلة دي من النار أعتقني، الليلة من أهل الجنة اكتبني من عتقائك من النار، خلي الملائكة تكتبني الليلة دي، يا بنات اعبدوا، روحوا لربنا.
بس خلي بالك، إوعي تفتكري ان معني إن هو يصطفيك إن أنت ما تدبهدليش في الدنيا أو متبتليش، مريم ابتليت كتير، يعني إيه ابتليت؟ مليانة آلام، طبعًا الأب مات، وبعد شوية الأم ماتت، وبعد شوية اللي كان يكفلها وبيربيها وحبته أوي أوي، زكريا نشر بالمناشير، مش سيدنا زكريا قتل، وبعدين اتهمت في عرضها، وبعدين عيسي ترحال، مش سيدنا عيسي سمي عيسي لأنه سمي المسيح، لأنه يسيح في الأرض، مريم لم تستقر، لفت مع عيسي وبعدين؟ حرمت الحياة الزوجية المستقرة؟ مريم معشتش حياة زوجية زي ستات كتير بعد ما أطلقت، ما عاشتش حياة زوجية مستقرة، مع أنها بنت جميلة أوي وحنينة وحلوة، متزعليش وتقولي أنا ليه بختي كده، السيدة مريم حصل لها كده، مريم تعبت أوي في حياتها.
يا ستات يا اللي اتعذبتوا في حياتكم، خلي مريم قدوتك ومتقوليش هو مبيحبنيش ولا إيه؟ حتكوني أكتر من مريم، وبعدين رفع المسيح، مريم كانت عايشة رفع المسيح ابنها، يعني هي عاشت عشانه وكمان فقدته في الآخر، مريم تعبت كتير مش معني إنه اصطفاك اصطفاها ، مش معنى كده إن أنت متبتلاش، يا بنات ويا ستات، يا اللي حياتكم مليانة عذاب لا روحي لربنا برضو، هتشوفي حنان منه، مش كفاية إنها سيدة نساء العالمين؟ مش كفاية عليها إنها أم عيسي وصاحبة المعجزة اللي دلت علي الخالق سبحانه وتعالى؟
تعالوا نطلع فاصل، بس وإحنا بنطلع فاصل هنرجع بعد كده نقول معجزة مريم، وليه ربنا خلى المعجزة دي تحصل؟ إيه الحكمة؟ تعالوا نكمل بعد الفاصل .
..فاصـــــــــــــــــــــــــــــــل..
بسم الله الرحمن الرحيم الحمد لله رب العالمين،
نكمل مع قصة السيدة الحبيبة مريم، وبدأ ربنا سبحانه وتعالى تجهيز مريم للمعجزة الكبرى، خلي بالكم المرأة الوحيدة في العالم اللي هتحمل وتلد وهي عذارء، وهتحمل معجزة تدل علي اسم الله الخالق، على فكرة أنتم مش واخدين بالكم من المعني ده، هو الله الخالق البارئ المصور، مريم من الدلائل علي الأسماء الثلاثة، دول طيب خلونا نقول إزاي، تمهيد ربنا سبحانه وتعالى رحيم، المعجزة دي حاجة نادرة في البشر، لو جه الموضوع فجأة صعب عليها، فكان لابد من تمهيد، إيه هو التمهيد؟ بدأت الملائكة تخاطب مريم، ده اصطفاء جديد، دي مرحلة تانية، ولذلك قلت لكم في اصطفائين، إحنا في الاصطفاء الأول يا بنات، ده أصطفاء خاص، واصطفاك وطهرك واصطفاك، ده بقه اصطفاء تاني.
بدأت الملائكة تخاطبها {إِذْ قَالَتِ الْمَلآئِكَةُ يَا مَرْيَمُ إِنَّ اللّهَ يُبَشِّرُكِ} [آل عمران:45] {يَا مَرْيَمُ اقْنُتِي لِرَبِّكِ وَاسْجُدِي} [آل عمران:43] بدأ يحصل خطاب مع الملائكة، وبدأت مريم تتكلم مع الملائكة، وتعتاد وتقابل وتشوف سيدنا جبريل وتتكلم معه، دي منزلة عالية جدًا ومنزلة خاصة جدًا، لكن عايز أقول حاجة: أنت فين من الملائكة، يعني إيه أنت فين من الملائكة؟ أنت حاسس بالملائكة؟ لا، خلي بالك ده الملائكة الركن التاني من أركان الإيمان، الإيمان إيه؟ هو أن تؤمن بالله وملائكته وكتبه ورسله واليوم الآخر، كلنا مؤمنين بالله، وحاسين وبالرسل، وبنحبهم، وبالكتاب وماسكينه وحسينه، واليوم الآخر بنتكلم عليه كتير، لكن مين حاسس بالملائكة مع أنها الركن رقم 2 ،خلي بالك ده ملك اليمين هنا وملك الشمال هنا، يعني عمرك كده تيجي تعمل حسنة تقول له اكتب، في علاقة، يعني إيه علاقة؟ تيجي تعمل سيئات تقوله هتوب أهه، ده أنت في الصلاة: السلام عليكم ورحمة الله، السلام عليكم ورحمة الله، فين العلاقة؟ دول موجوين معانا هنا، وفي البيوت، اللي قاعدة بتسمعنا دلوقتي، مش إذا ذكرت الله اجتمعت الملائكة، مش إذا ذكر الله اجتمعت الملائكة، مش "إن لله ملائكة يطوفون في الطرق يلتمسون أهل الذكر فإذا وجدوا قوماً يذكرون الله تنادوا هلموا إلى حاجتكم، فيحفونهم بأجنحتهم إلى السماء الدنيا"والله كل واحد قدامي في الاستديو والناس اللي قاعدة قدام التلفزيون، لأن ده حديث للنبي حديث صحيح في البخاري ومسلم، في فوقيه ملك دلوقتي بيظلله بجناحه يطوف بيكي اللهم اغفر لها اللهم ارحمها، أنت إيه علاقتك بالملائكة، يا أخي ده أنت لو ليك جار لما بتيجي تعمل غلطة بتوطي صوتك، تقول لحسن جارنا يسمعنا، دول معاك دول معاك، حاسس بالملائكة؟
خلونا نكمل ونرجع للسيدة مريم، هي الآن جهزت لليوم العظيم، لمعجرة البشرية الكبرى، من أعظم المعجزات اللي ربنا سبحانه وتعالى عملها في البشرية، يعني عصا موسي وشق البحر دي معجزة، أنا بعتقد إن معجزة عيسي عليه السلام أقوى؛ لأن التانية حصلت في دقايق، ولكن عيسي عاش سنين وبقي نبي معجزة، مستمرة موجودة بين الناس، مؤثرة في الناس إلي اليوم، حديث الناس إلي اليوم، معجزة غير عادية أنتي الآن مؤهلة يا مريم، وتبدأ آيات سورة مريم: {وَاذْكُرْ فِي الْكِتَابِ مَرْيَمَ إِذِ انتَبَذَتْ مِنْ أَهْلِهَا مَكَاناً شَرْقِيّاً(16) فَاتَّخَذَتْ مِن دُونِهِمْ حِجَاباً فَأَرْسَلْنَا إِلَيْهَا رُوحَنَا فَتَمَثَّلَ لَهَا بَشَراً سَوِيّاً(17)} [مريم :16،17] جالها في صورة بشر مش في صورة ملك، {قَالَتْ إِنِّي أَعُوذُ بِالرَّحْمَن مِنكَ إِن كُنتَ تَقِيّاً} [مريم:18]، مش متعودة بشر رجل يخش عليها، مش قلت لكم رمز العفة، "قَالَتْ إِنِّي أَعُوذُ بِالرَّحْمَن مِنكَ إِن كُنتَ تَقِيّاً" لو بتتقي ربنا جاي هنا ليه؟ فرد عليها فقال:{قَالَ إِنَّمَا أَنَا رَسُولُ رَبِّكِ لِأَهَبَ لَكِ غُلَاماً زَكِيّاً} [مريم:19] متخافيش أنا مبعوث من ربنا لأهب لك غلاما زكيًا.
تخيل المفاجأة بنت 19 20 سنة جايلها المفاجأة دي، {قَالَتْ أَنَّى يَكُونُ لِي غُلَامٌ وَلَمْ يَمْسَسْنِي بَشَرٌ وَلَمْ أَكُ بَغِيّاً} [مريم : 20] شوف أدب السيدة مريم، ما قالتش أنا ممسنيش رجل.. تقصد كده، ولم يمسسني بشر ولم أك بغيًا {قَالَ كَذَلِكَ قَالَ رَبُّكَ هُوَ عَلَيَّ هَيِّنٌ} [مريم:9] الموضوع بسيط عند ربنا، ببساطة إ{ِنَّمَا أَمْرُهُ إِذَا أَرَادَ شَيْئاً أَنْ يَقُولَ لَهُ كُنْ فَيَكُونُ} [يس:82] هو عليه هين، ولنجعله آية للناس، آية تدل علي اسم الله الخالق، {وَرَحْمَةً مِّنَّا وَكَانَ أَمْراً مَّقْضِيّاً} [مريم : 21] وحملت مريم، شوف الحديث: {وَالَّتِي أَحْصَنَتْ فَرْجَهَا فَنَفَخْنَا فِيهَا مِن رُّوحِنَا} [الأنبياء : 91] لاتسأل كيف؟ دع الكيف لله، لكن مهو آدم ربنا نفخ فيه، {فَإِذَا سَوَّيْتُهُ وَنَفَخْتُ فِيهِ مِن رُّوحِي} [الحجر : 29] فبقى فيه لحم وعظم وإيدين ورجلين وعنين، ومريم إذا في أحشائها يتحرك جنين، سبحان الخالق، نفخة بدأ بيها الكون في آدم، ونفخة في مريم طلع منها عيسي المعجزة، ونفخة في يوم القيامة يسقط بها الكون، أمره نفخة، هو عليّ هين، لا إله إلا الله، سبحان الخالق العظيم، أنت كنت إيه؟ نفخة فيرسل إليه، مش كل واحد فينا وهو في بطن أمه ثم يرسل إليه ملك فينفخ فيه الروح؟ ليه مستعجبين من نفخة عيسى؟
فحملته، أنا عايزك تتخيل مشاعر مريم في هذه اللحظة، مريم العفيفة الطاهرة، مريم اللي الناس كلها بتقول عليها دي رمز العفة، العابدة، دي بنت عمران، دي بنت زوجة عمران، مريم حامل، محدش يعرف، ومعدش لها حد، أصل الأم ماتت والأب، مريم وحيدة دلوقتي، فحملته 9 أشهر زي النساء، لكن هي مش قادرة تواجه الناس، ومش عارفة تعمل إيه؟ تخيل مشاعر الخوف والقلق، في كرامة وفي رضا من ربنا، بس أنا هعمل إيه. أنا وحيدة، أنا ضعيفة.
فحملته وحدها، فانتبذت به، أنا مش قادرة أواجه، يا بنات أنتم أكتر ناس تقدروا تحسوا بمشاعر مريم دلوقتي، يا بنت يا اللي عندك 20 21 ، {فَحَمَلَتْهُ فَانتَبَذَتْ بِهِ مَكَاناً قَصِيّاً}[مريم:22] طلعت بره بيت المقدس، رايحة فين؟ مليش حد، لا ليكي ربنا يا مريم، الأب راح، والأم راحت، والكفيل راح. يا بنات، يا ستات: لو الدنيا كلها راحت وتخلت عنك متزعليش، اعرفي إنه بيقول لك: ها ليكي حد تاني غيري؟ ملكيش إلا أنا، روحي له بقى.
{فَحَمَلَتْهُ فَانتَبَذَتْ بِهِ مَكَاناً قَصِيّاً}[مريم:22]، وصلت خلاص الحمل، {فَأَجَاءهَا الْمَخَاضُ إِلَى جِذْعِ النَّخْلَةِ}[مريم : 23] هتولد، مش لاقية حد، ملهاش حد تروح له، فملقتش غير جذع النخلة، نخلة يابسة مفيش فيها تمر، وأرض صحراء جرداء {فَحَمَلَتْهُ فَانتَبَذَتْ بِهِ مَكَاناً قَصِيّاً،فَأَجَاءهَا الْمَخَاضُ إِلَى جِذْعِ النَّخْلَةِ..}[مريم :22،23] بصي حالتها، ربنا بيصور لك حالتها، {..قَالَتْ يَا لَيْتَنِي مِتُّ قَبْلَ هَذَا وَكُنتُ نَسْياً مَّنسِيّاً}[مريم : 23] يا ريتني ما تولدت، حاسة بآلامها ووحدتها، لا يا مريم معاكي ربنا يا مريم، شوفوا الحنان اللي جاي، اسم الله الوكيل، بصوا اسم الله الودود الحنان المنان،{ فَنَادَاهَا مِن تَحْتِهَا..} [مريم : 24] ما ولدت عيسي سمعت صوته بيكلمها، نطق في المهد، الولاد أول ما بيتولدوا أول كلمة بيقولها واء واء، أول كلمة بيقول لها {فَنَادَاهَا مِن تَحْتِهَا أَلَّا تَحْزَنِي..}[مريم : 24] .
تخيل أول كلمة نطق بها متزعليش يا أمي، يا على حنان ربنا، أهو ده حنان من ربنا، هو عيسى نطق بأمره فناداها من تحتها، إيه الحنان ده يا رب؟ يا مريم لو الناس كلهم ماتوا باقي لك ربنا، يا مريم، يا ست، ويا بنات: لو الدنيا كلها تخلت عنك، لو الزوج أذاكي، ولو الأب مات، ولو العيلة سابتك، ملكيش حد، روحي لربنا، خليكي عابدة في الرخاء يعرفك في الشدة، "فَنَادَاهَا مِن تَحْتِهَا أَلَّا تَحْزَنِي.." متزعليش يا أمي، تخيل المفاجأة ابني، وتخيل عاطفتها ناحيته، {أَلَّا تَحْزَنِي قَدْ جَعَلَ رَبُّكِ تَحْتَكِ سَرِيّاً} [مريم : 24] بصي تحتك، الأرض الجرداء طلع منها عين ماء، قد جعل ربك عين ماء تسري، {..قَدْ جَعَلَ رَبُّكِ تَحْتَكِ سَرِيّاً، وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَباً جَنِيّاً [مريم :24،25] بصي فوقك النخل، بقى فيها تمر من تحت ومن فوق، {وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَباً جَنِيّاً، فَكُلِي وَاشْرَبِي وَقَرِّي عَيْناً..} [مريم :25،26] كلي، وامسحي وشك، واشربي ماء، إيه الحنان ده يا رب؟ يا بنات، والله ما هيسبوكوا.
فكلي واشربي وقري عينًا،أنا معاكي الودود ولا مش الودود {فَإِمَّا تَرَيِنَّ مِنَ الْبَشَرِ أَحَداً فَقُولِي إِنِّي نَذَرْتُ لِلرَّحْمَنِ صَوْماً فَلَنْ أُكَلِّمَ الْيَوْمَ إِنسِيّاً}[مريم : 26] خلي بالكم، الآن مريم تجسدت معاها فكرة أنا بدل على اسم ربنا، شافت المعجزات دي؛ مية طالعة من تحت، ورطب جاية من فوق، وابنها بيتكلم، فازدادت قوة، أنا حاملة لرسالة إلى الله، أنا عايز أسألك سؤال: هو ليه ربنا عمل كل ده؟ أنا عارف إن جواك السؤال ده، طب إيه حكمة إن عيسى يتولد من غير أب؟ يعني ليه القصة دي كلها؟ بصوا يا جماعة، معجزة عيسى دي زي ما بقول لكم من أعظم معجزات الكون، طب برضه ليه ليه ربنا عمل المعجزة دي؟ الناس والبشر ما شفوش هما اتخلقوا إزاي، صح؟ ما حدش شاف آدم اتخلق إزاي، مع إنها أعظم حاجة في الدنيا، بقه الكون كله قام على الحكاية دي؟ إحنا ما شوفناش إحنا اتخلقنا إزاي، وشاء ربنا إن بعد آدم كله جه من علاقة رجل بامرأة، سنة الكون زوجين يتجوزو بعض، فالناس افتكرت إن هي اللي بتخلف، وإن هي اللي تولده، فحب ربنا يبعت لهم آية: مين الخالق؟ أنتو ما شوفتوش خلقتكم الأولانية.
تعالوا أوريكم حاجة تعرفكم باسم الله الخالق، كل ما المادية تقرب من البشرية كان لازم آية، افتكروا الخالق البارئ المصور، واختار رمزالطهر والعفة هي اللي تدل عليه، أنتي اللي هتدلي على اسمي يا مريم الخالق، تخيلوا مريم الدالة على اسم الله الخالق، آه، لو واحدة منكم يا بنات عشان أنتي طايعة ليه يستخدمك ويشغلك عنده ويخليكي تدلي على حاجة، واحد يصلح في الأرض، واحد يدل الناس على الخير، شوف أنتي هيستخدمك في إيه بقه، هو استخدمها تدل على اسم من أسمائه الحسنى الخالق البارئ المصور، عشان البشرية كانت محتاجة تشوف {إِنَّ مَثَلَ عِيسَى عِندَ اللّهِ كَمَثَلِ آدَمَ خَلَقَهُ}[آل عمران:59] طب إيشمعنا؟ ما هو زي آدم، كأن ربنا بيقول لنا أنتوا نسيتوا، أنتوا فاكرين إن أنتم اللي بتخلقوا؟ أنت فاكر إن ابنك ده أنت اللي أوجدته؟ لا، طب بص على عيسى بأه، الله سبحان الحكيم.
بص الآية بتقول إيه: { فَأَتَتْ بِهِ قَوْمَهَا تَحْمِلُهُ ..} [مريم:27]، هي من شوية بتقول: يا ليتني مت، وانتبذت به مكانًا قصيا، لو واحدة بنت مكانها كانت هربت، لا { فَأَتَتْ بِهِ قَوْمَهَا تَحْمِلُهُ ..} [مريم:27]، بدأت تحس أنا صاحبة رسالة، أنا بدل على اسم من أسماء الله الحسنى، أنا بدل على اسم الله الخالق، حد عرف بأه ليه مريم سيدة نساء العالمين؟ حد حبها بأه؟ تعلقت بيها؟ حبتها؟ عايزة تبقي مريمية روحي بأه اعبدي، تفكري، واعملي عمل تطوعي.
{ فَأَتَتْ بِهِ قَوْمَهَا تَحْمِلُهُ ..} [مريم:27]، بدأ بأه الكلام، وبعدين شوف وقتها تحمله، مش مكسوفة، شافت آيات من ربنا، لو ربنا بعت لكم آيات اجمدوا بأه وتوكلوا عليه، وكل واحد فينا له في حياته آيات، لسه خايف، شفت مريم سريّ من تحت نهر، ورطب من فوق، فأتت به قومها تحمله، وبدأ بأه الكلام الصعب قَالُوا يَا مَرْيَمُ لَقَدْ جِئْتِ شَيْئاً فَرِيّاً، يَا أُخْتَ هَارُونَ مَا كَانَ أَبُوكِ امْرَأَ سَوْءٍ وَمَا كَانَتْ أُمُّكِ بَغِيّاً} [مريم:27-28] أبوكي كان راجل محترم، كان يرمز بيه للعبادة، وأمك كانت ست شريفة، { فَأَشَارَتْ إِلَيْهِ..} [مريم:29] ، منتهى القوة، مش أنا اللي هتكلم، هو اللي هيرد، خلي بالكم، حاجة جميلة جدًا، أحيانًا الرد على الاتهامات يكون غلط، الرد يكون عملي، حد تاني يرد، حد تاني يدافع عنك، أحيانًا الواحد يكتشف هتلاقي ميت شتيمة وشتيمة فيه هنا وهنا، خلي الرد عملي، خلي الرد أفعال مفيدة، الخير ما بيروحش، الخير بيبني، والناس بتفهم بعد شوية، حتى لو كان فيه علامات استفهام مش عاجبة الناس.
مريم ما ردتش، وهو اللي قال لها ما ترديش، والناس تقولك ما بيردش ليه؟ مريم ما ردتش، مش دائمًا الرد صح ، ساعات بيبقى مطلوب واحد يدافع عنك، وهنا في حتة حلوة، التدريب العملي؛ العالم العربي لا يؤمن بالتدريب العملي، إيه اللي أنت بتقوله؟ كان لازم يكلمها الأول لوحدها عشان لما تقف قدام الناس، لما يتكلم، تاني فاهمين الفكرة، ما تتخضش لأ هي شافته الأول، زي عصا موسى، الأول رماها لوحده، وبعد كده قدام فرعون، كان اتدرب، التدريب حاجة، القرآن عظيم { فَأَشَارَتْ إِلَيْهِ..} [مريم:29]، هما فهموا من الإشارة إن هي بتقول أنا مش هتكلم، هو اللي هيرد، فتجننوا أكتر { قَالُوا كَيْفَ نُكَلِّمُ مَن كَانَ فِي الْمَهْدِ صَبِيّاً } [مريم:29]، فإذا به: لأ أنا اللي هدافع عن أمي، يا سلام على حب ربنا ليكي، آه يا بنات لوحبك، آه لو حبك يدافع عنك، ويقف جنبكو، لو حد اتهمك يجيب لك براءتك، ولو حد اتكلم عليكي يعلي شأنك، بس كوني مريمية {فَأَشَارَتْ إِلَيْهِ قَالُوا كَيْفَ نُكَلِّمُ مَن كَانَ فِي الْمَهْدِ صَبِيّاً قَالَ إِنِّي عَبْدُ اللَّهِ..} [مريم:29،30] خلي بالكم الكلمات اللي هيقولها دي كلمات خالدة، هتسجل في الكتب السماوية، كل كلمة خطيرة، أول كلمة إيه؟ " قَالَ إِنِّي عَبْدُ اللَّهِ.." بهذا الوضوح، بهذا الحسم، قال أنا مش ابن الله، أنا عبد الله، "قَالَ إِنِّي عَبْدُ اللَّهِ.."، طبعًا فاجأتهم، ومن المفاجأة ما حدش قدر يرد عليه، طفل بيتكلم في المهد، بيقول كلام حكيم عظيم، "قَالَ إِنِّي عَبْدُ اللَّهِ..".
بص بقى كل الآيات اللي جاية، كأنه بيكلمهم، لا مش بيكلمهم، بيكلمها هي، هو بيكلمهم، بس والله وأنا بقراها، كأنه بيكلم أمه، بص بيقول إيه؟ أصل الأم فيه حاجات بتبقى خايفة عليه قبل ما تولده، مستقبله إيه؟ ورزقه إيه؟ وهيبقى بار بيها ولا لأ؟ وهيبقى رزقه واسع وهيعيش في سلام ولا لأ؟
بص الآيات بقى، وشوفوا حب ربنا لما يحب عبد من عباده {قَالَ إِنِّي عَبْدُ اللَّهِ آتَانِيَ الْكِتَابَ وَجَعَلَنِي نَبِيّاً، وَجَعَلَنِي مُبَارَكاً أَيْنَ مَا كُنتُ وَأَوْصَانِي بِالصَّلَاةِ وَالزَّكَاةِ مَا دُمْتُ حَيّاً، وَبَرّاً بِوَالِدَتِي وَلَمْ يَجْعَلْنِي جَبَّاراً شَقِيّاً، وَالسَّلَامُ عَلَيَّ يَوْمَ وُلِدتُّ وَيَوْمَ أَمُوتُ وَيَوْمَ أُبْعَثُ حَيّاً ذَلِكَ، عِيسَى ابْنُ مَرْيَمَ ..}[مريم :30- 34] إيه سورة مريم، وإيه الجمال ده؟ وإيه الكلمات العظيمة دي؟ خلي بالكم والله كأن ربنا بيقول لها اطمني يا مريم، معلش، أنتي تعبتي قوي، أنت حياتك قاسية قوي.
بص أوريكم اطمني ليه؟ حاجات جميلة قوي، هي أي أم يهمها إيه؟ يهمها مستقبل ابنها، مش كده؟ "آتَانِيَ الْكِتَابَ وَجَعَلَنِي نَبِيّاً"، طب ويهمها رزقه عامل إيه؟ "وَجَعَلَنِي مُبَارَكاً أَيْنَ مَا كُنتُ"، ويهمها هيطلع عابد زيها "وَأَوْصَانِي بِالصَّلَاةِ وَالزَّكَاةِ مَا دُمْتُ حَيّاً"، طب وهيصدق إن هما بيقولوا عليّ إني عملت كذا؟ أبدًا، مش هتهمك يا أمي، "وَبَرّاً بِوَالِدَتِي وَلَمْ يَجْعَلْنِي جَبَّاراً شَقِيّاً" كل عاق لأمه جبار وشقي في الدنيا والآخرة، ويا ترى نهاية حياته إيه؟ ربنا هيحفظه "وَالسَّلَامُ عَلَيَّ يَوْمَ وُلِدتُّ وَيَوْمَ أَمُوتُ وَيَوْمَ أُبْعَثُ حَيّاً، ذَلِكَ عِيسَى ابْنُ مَرْيَمَ .. " كان ممكن عشان متهمة بالزنا أنا وأنتي نتقتل، مش هيتقلوني يا أمي، ربنا هيرفعني.
خلي بالكم، دائمًا عيسى يتقال ابن مريم؛ عشان تفتكر الخالق، عشان يربط بفكرة الخالق جه إزاي؟ قصة مريم آه لو حبك يا بنات يدافع عنك ويبقى ودود ليكي.
شفتوا اسم الله الودود شفتوا اسم الله الحنان، شفتوا اسم الله الوكيل، لو الناس كلها سابتك يا مريم ربنا معاكي، دي قصة مريم، مريم عاشت ملازمة لعيسى، تعبت معاه، ولفت معاه، وساحت في الأرض معاه، أنا ما بحكيش النهاردة قصة عيسى، دي يمكن في الجزء التاني السنة الجاية إن شاء الله، لكن أنا بحكي قصة مريم، تعبت مريم قوي، والله تعبت، ما فيش بيت مستقرة فيه، فين بيتك يا مريم؟ أنا بلف مع ابني، فين الاستقرار الزوجي؟ لأ أنا عايشة مع عيسى، فين الحياة الهانئة؟ ما فيش، فين العيلة؟ أغلبهم ماتوا وشفتهم وهما بيموتوا، ياه كمان لحظة رفع عيسى، أنا عايزك تتخيل مريم لحظة رفع سيدنا عيسى، صعبة مش سهلة، يعني مؤلمة، هتقولي ياه قاسية قوي، بس هي يا بختها، ما هي خدت حاجات عظيمة، إذا كان الآلام شديدة والمعاناة وعدم الاستقرار، أما يكفيها أنها سيدة نساء العالمين؟ أما يكفيها أنها من سيدات نساء أهل الجنة العظام؟ أما يكفيها إن هي أم عيسى؟ أما يكفيها إنها دلت البشرية مش دلت واحد واتنين دلت البشرية إلى يوم القيامة على اسم الله الخالق؟ .
أحلى حاجة يوم ما ربنا يشغلك عنده، بتبقي دالة على ربنا، تعرفي الناس بربنا، هو فيه أحلى من كده إيه؟ أما يكفيها إن ابنها هيرجع في آخر الزمان فيصلح الأرض ويقيم الحق؟ ياه يا سيدة مريم، إذا كان فيه معاناة في الدنيا، ويا ستات لوتعبتي في الدنيا كوني مريم، علشان خاطري يا بنات خلي الليلة دي ليلة عبادة وذكر وقيام طويل، قلدي مريم عشان خاطري، وطلعي الوحدات في طاعة ربنا.
سمعتوا سورة مريم، حسيتوا بيها، ممكن النهاردة تقروا سورة مريم بأه، شفتوا القرآن حلو إزاي، ممكن الليلة دي، ممكن العيلة، ممكن البنات يعيشوا مع سورة مريم النهاردة؟ كل اللي احنا حكيناه النهاردة موجود صوت وصورة على عمرو خالد دوت نت، مترجم للغات أخرى، اللي عايز يعرف الغير وغير المسلمين بالسيدة مريم إحنا هنا مع المسلمين في أوروبا، خدوا الكلام ده.
تعالوا نختم بالدعاء، إني داع فأمنوا:
يا رب يا ذا الجلال والإكرام، يا حنان يا منان، يا مجيب الدعاء، يا رب ليس لنا سواك، الحمد لله الذي عرفنا بالقرآن، الحمد لله على نعمة رمضان، الحمد لله الكريم العظيم، الحمد لله.
اللهم صلِّ على حبيبنا محمد في الأولين، صلِّ على من نزل عليه الكتاب العظيم، اللهم لك الحمد لنعمة القرآن، لك الحمد بهذا الكتاب العظيم، يا رب ارضَ عنا يا رب، يا رب بناتنا يا رب، يا رب في هذه الليلة اللهم اجعل كل من سمعت هذه الحلقة الليلة يا رب اهدها بها، يا رب اجعلها مريمية، اجعلها على خطى مريم، يا ذا الجلال والإكرام ارزقنا حبك، يا رب الليلة دي ارزقنا حبك، وحب من أحبك، وحب عمل يقربنا لحبك، اجعل حبك أحب إلينا من الدنيا وما عليها، حببنا في صلاة الفجر، حببنا في قيام الليل، حببا في السجود، حببنا في الدعاء، حببنا في القيام، يا رب إذا كنا سمعناه الليلة آية فاستجب دعائنا الليلة، في هذه اللحظات في رمضان في جوف الليل أجب دعائنا، يا رب إحنا غلابة فقراء ما لناش سواك، لو راحوا الأحباب وماتوا، ولو راحوا الآباء، ولو راحوا اللي واقفين جنبنا يا رب أنت الوكيل لا تتركنا، إن أخطأنا سامحنا، وإن أخطأنا اعف عنا، وخد بإيدينا، واجبر كسرنا، اجبرنا، بنغلط يا رب سامحنا، سامح بناتنا، اجعلها ليلة توبة يا رب، يا رب أعتقنا الليلة دي، أعنا على ذكرك وشكرك وحسن عبادتك، نسأل الليلة دي حبك، املأ قلوبنا بحبك، يا من تتنزل كل ليلة تنادي من يدعوني فأستجيب له، يا من تبسط يدك بالليل ليتوب مسيئ النهار، وتبسط يدك بالنهار ليتوب مسيء الليل، يامن إذا تقربنا إليك شبرًا تقربت إلينا ذراعًا، وإذا أتيناك نمشي أتيتنا هرولة، يا ودود، يا حنان يا منان، يا أرحم الراحمين، يا حي يا قيوم برحمتك نستغيث، يا خالق، يا بارئ، يا مصور، اجعلنا ندل عليك الناس، اجعلنا ندل على الخير الناس، استخدمنا، شغلنا عندك، ارضَ عنا، سامحنا يا رب، اجعلها ليلة توبة، أعتقنا الليلة دي، اجمعنا بمريم في الجنة، يا رب اسقنا من يد حبيبنا محمد شربة لا نظمأ بعدها أبدًا، يا رب اكتب كل من يسمعنا الليلة رفيق النبي في الجنة، اشتقنا لمريم فكيف بحبيبنا محمد، اجعلنا رفقاء النبي في الجنة، آمين آمين، وصلِّ اللهم وبارك على سيدنا محمد، والسلام عليكم ورحمة الله وبركاته.
المصدر: http://alresalah.ws/programs2/index.jsp?inc=36&id=1508&lang=ar&cat=74&type=1