|
|
|
| عمرو خالد |
فاكرين اسم المجموعة.. المجموعة اللي احنا فيها؟ إحنا عدينا على كام مجموعة للسعادة الآن؟ أول مجموعة ارسم خطك للجنة.. ابدأ بداية صحيحة، واتكلمنا عن الإخلاص وعن كن طموحا وعن النفس المطمئنة.. ها.. وقولنا في استقصاء علىwww.amrkhaled.net اطبعه واعمله (Download) وحطه على مكتبك.. ها.. ومين بيحط علامة صح ومين مكمل معانا؟ والله جرب معانا وحتعيش سعيد.. والله جرب وحتكون في منتهى السعادة بس اطلع معانا الرحلة بتاعتنا.
وبعدين المجموعة التانية قولنا إيه؟ مين فاكر؟ المجموعة التانية إسعد من حولك وصورنا في وسط المزارع.. اللون الأخضر لون النماء والزرع. وبعدين رحنا على المجموعة التالتة اللون الأحمر موانع السعادة.. علامة الخطر.. وقلنا ها إوعى من القلق وإوعى من الغضب والحقد والحسد والكراهية. مين مكمكل معانا؟ ومين كل يوم بيقول على الأقل لو مش عارف أطبق بقيت ماسك في إديه إية اللي بيسعد وإيه اللي مابيسعدش.. بقيت أعرف.. الناس بتقولك هو إيه اللي بيسعد أنا مش عارف إزاي أبقى سعيد.. أظن معانا يوم بيوم انت بدأت تعرف إيه اللي بيسعد.
المجموعة اللي إحنا فيها حاليا إسمها قلب كبير.. قلب كبير صافي نقي.. عشان كده حتلاقو حلاقاتها كلها في البحر..سما صافية.. وبحر صافي. يااه انت قلبك كده؟ أنا عايزك بقه كل ماتشوف لون السما الصافية الخالية من السحب زي يومنا انهارده.. وكل ماتشوف كده هدوء البحر تسأل نفسك: طب هو أنا قلبي كبير؟ قلب كبير يعني إيه. قولنا يرضى رضا.... فاكرين مركب الصيد الصغيرة؟ ودلوقتي بنقول يعفو ويسامح.. حلقة انهاردة العفو.
مسامح الناس؟ مالها ومال السعادة؟! يووووووو دا انت شايل أثقال على قلبك إسمها الغل والثأر. شوف الحديث دا (كنا جلوسا مع رسول الله صلى الله عليه وسلم فقال : يطلع الآن عليكم رجل من أهل الجنة) تخيل لما النبي يقول كده.. حتشوفوا دلوقتي واحد داخل من أهل الجنة.. متخيل بأه الصمت وكل العيون تعلقت بالباب.. فإذا برجل داخل.. دخل الراجل.. كله بيبص على الراجل اللي داخل.. راجل عادي، عبد الله بن عمرو تبعه وقاله ممكن تضيفني ثلالث أيام.. فبعد التلات أيام مش لاقي حاجة فسأله النبي قال عليك انت من أهل الجنة.. يعني أنا شايف أدامي واحد دلوقتي دا من أهل الجنة.. انت بتعمل إيه زيادة؟ فقال له أنا مابعملش حاجة زيادة غير حاجة واحدة بس.. (لا أجد في نفسي لأحد من المسلمين غشا ولا أحسد أحدا على خير أعطاه الله إياه) المنذري.
يااه من أهل الجنة! انت بتنام كده؟ يعني لو دي طريقة حياتك يبأى النبي زي ما شاور على الراجل ده ممكن يكون كان بيشاور عليك. انتي كدة؟.. في ستات كده على فكرة.. أبيت وليس في قلبي شيء.. قلب كبير.. قلب نقي.. قلب صافي زي السما الصافية زي البحر البساط.. تبأى روحك كده.. تبأى نفسك كده.. تبات وانت مش زعلان من أي حد من الناس كلها. سامح.. يعني بالله عليكو يا جماعة إحنا في رمضان.. والحلقة دي بتقولك اعفو وسامح.. سامح اللي ظلمك.. سامح االي أذوك.. سامحي اللي اتكلمو عليكي.. معلش.. سامح سامح.
على فكرة.. في فرق بين إن واحد ظالمني دلوقتي ولازم آخد حقي.. طبعا تآخد حقك.. والإسلام أمرك بكده.. وإنك تسكت على الظلم غلط.. إوعى تفتكر إن أنا بقولك كده.. لكن باتكلم لو قدرت.. تعرف تسامح؟ وبقولك حاجة تانية.. الي حصل في الماضي ولسه شايله
لغايت دلوقتي ماخلص.. خلص والموضوع انتهى. يعني.. يعني هي اتكلمت على بنتِك وخلااص وزعلتي وبنتك اتجوزت خلاص.. واتكلمت على بنتك وبوزت جوازت بنتك والدنيا لفت.. وبنتك اتجوزت خلاص.. سامحي بأه. سامح اللي ظلموك.. سامح الماضي.. سامح على الماضي.
حقك دلوقتي خده، إوعى تفتكر إن أنا بخدرك عن حقك.. لأه.. لكن لو قدرت اعف، لو قدرت عليه إعف، والحاجة التانية: الماضي.. إعف.. سامح.. سامح شريكك اللي فات شريكك في الشغل، كل واحد راح في حاله وربنا فتح عليه.. سامح. سامحي جوزك.. غلطة وعدت والدنيا لفت وانت لسه شايلة؟ سامحي. لو طلقت سامح وانت بتطلق.. سامح.. سامح، إذا ماكونتوش عرفتو تنجحو في جوازكو انجحوا في طلاقكو.. [... فَإِمْسَاكٌ بِمَعْرُوفٍ أَوْ تَسْرِيحٌ بِإِحْسَانٍ...] {البقرة:229}.. سامح وانت بطلق عشان ولادك. سامح اللي ماتو.. حرام لسه شايل لغايت دلوقتي؟ لسه جوه قلبك غل من اللي ماتو؟ ما ماتو خلاص..سامح.. سامح وانسى دول ماتو.. ماتو.. مهما أساءوا إليك.. ماتفضلش شايل كده.. بلاش الغل يبقى ماليك كده.. ماتو يا عم ماتو اطلب لهم الرحمة.. ماتو. سامح ولادك.. يا عم د وانت صغير عملت زيهم واكتر.. دا ابنك دا اللي انت بهدلته انت وانت أده عملت زيه.. سامح.
سامح.. سامح مين؟ سامح بنتك لو غلطت زمان.. هي يمكن إتجوزت وانت ماكنتش راضي عن الجوازه، والأيام عدت وخلفت.. خلاص كانت غلطانه.. بس ده بأى ماضي.. ممكن تسامحها؟ حرام عليك تحرم نفسك من حضن أحفادك اللي همه أحلى حاجة في الدنيا، وحرام عليك تفضل آسي عليها رغم إنها غلطت.. هي مالهاش إلا حضنك.. لو أزاها هو في حاجة مالهاش إلا انت.. سامح. سامحو يا جماعة سامحو. سامحو.. الفكرة دي جميلة قوي.. (يطلع الآن عليكم رجل من أهل الجنة).. (لا أجد في نفسي لأحد من المسلمين غشا ولا أحسد أحدا على خير أعطاه الله إياه).
سامح.. سامح مراتك عشان أحلى الجوازات اللي قايمة على التسامح وان كل واحد بيفوت وبيسامح التاني، كلمة بيفوت دي كلمة مش وحشة دي كلمة جميلة.. جميلة فيها عفو وفيها تسامح. انت كده بأى؟ انت قلبك كده؟ انت ممكن تسامح أصناف الناس اللي أنا قولتهم بالطريقة دين؟ سامح أبوك وأمك لو كبروا في السن وبقوا عصبيين أوي وبيغلطو في حقك كتير أوي.. سامح.. ده هم عشان كبرو في السن ربنا بيقول (إما يبلغن ...فلا تقل لهما أف) بص كلمة الكبر وإيه علاقة لا تقل لهما أف بـ إما يبلغن عندك الكبر؟ عارف العلاقة إيه؟ لما بيكبروا بيغلطوا.. سامح وإوعى تقول حتى أف، تلاقي ستتات بتقولك أنا عصبية على أمي عشان هي لما كبرت بئت بتغلط.. دا هو ربنا في الوقت دا بالذات لما يبلغوا الكبر.. سامح.
عايز تعرف قيمة التسامح إيه.. قيمة العفو إيه؟ عايز تعرف لو عفيت عن الناس.. أولا قلنا الجنة، ثانيا بص الآية الجميلة دي [... فَمَنْ عَفَا وَأَصْلَحَ فَأَجْرُهُ عَلَى اللهِ... ] {الشُّورى:40}.
يعني إيه أجره على الله؟ يعني خلاص راح؟! لاا مافيش حاجة اسمها عفيت واترمت في البحر [... فَأَجْرُهُ عَلَى اللهِ... ] حيديك أجرك.. حيرجعلك حقك وزيادة، لو قدرت وعفيت، أو لو حاجة في الماضي وعفيت. انتو عارفين [... فَأَجْرُهُ عَلَى اللهِ... ] دين.. دي كبيرة أوي يا جماعة، يعني ضمن لك حقك.. حقك عندي.. تخيل لما واحد كبير يقولك خلاص سيبه وحقك عندي.. فتقول خلاص طالما حقي عند فلان يبقى خدته فما بالك رب العالمين بيقولك: [... فَمَنْ عَفَا وَأَصْلَحَ فَأَجْرُهُ عَلَى اللهِ... ] حقك عندي مش اترمى.. الناس فاهماها غلط.
أقولك على حاجة تانية جميلة قوي الفرق بين اللي بيعفو ومابيعفوش إيه؟ في نفوس كبيرة تعفو وتسامح وفي نفوس صغيرة شايلة الغل والثأر مش قادرة تنسى.. مش قادر يسامح فات عشرين سنة.. إتخانق مع أخوه على ميراث أبوهم اللي سابهم إخوة ومات الراجل في تربته وهمه اتخانقو ودخلوا في محاكم وقضايا وفات عشرين سنة ولغاية انهاردة مانع ولاده يزورو ولاد أخوه مانعهم من صلة الرحم علشان ثأر عشرين سنة! إيه النفس الصغيرة دي.
انت نفس كبيرة ولا نفس صغيرة.. نفسك كبيرة ولا نفس صغيرة شايلة الثأر. عايز تعرف الفرق بين النفس الكبيرة والنفوس الصغيرة.. النفوس اللي شايلة الحمل بتاع الثأر والغل من عشرين وتلاتين سنة؟ عارف عاملة زي إيه؟ تخيل إن في حاجة إسمها.. تخيل.. حقيبة الذكريات المؤلمة.. حقيبة.. شنطة مليانة ثأر وغل.. تخيل تقيلة أد إيه؟ تخيل انت ماشي شايلها طول عمرك! والله تقيلة.. تخيل! انت ماشي بيها طول عمرك شايلها على كتفك ومتقلاك. عرفت إيه علاقة الموضوع ده بالسعادة؟ انت شايل حمل تقيل.. انت مش عارف تمشي. افتح الحقيبة وارمي اللي فيها.. اعفو.. سامح عشان تستريح.. والله حتستريح.. والله تعيش شعيد.. تخيل!
حقيبة الذكريات المؤلمة تخيل حنلاقي فيها إيه؟ تخيل كده.. حطلع من الحقيبة دي إيه.. تخيل حجر تقيل جدل.. تخيل إن انت جواك دلوقتي في قلبك شايل حمل غل عشرين سنة أتقل منه.. والله تقيل.. تيجي نخلص منه.. تعفو دلوقتي.. تيجي ننوي.. والله بالله عليك اعفي عن جارتك دلوقتي.. اعفي عن اللي ظلمتك واتكلمت عليكي.. ياللا نرمي الحجر ونحمل حقيبة نقية.. ياللا بسم الله.. معلش بيوجع شوية.. بس تخيل الحقيبة بقت عاملة إزاي.. بئت خفيفة.. تخيل.. نرمي الحجر التاني؟ نرمي التاني.. الحجر التاني بقى أتقل.. ليه؟! دا قرايبي دا عيلتي.. دا انت مخاصم عيلتك.. دا بنتي دا قرايبي.. تيجي نرميه ونخلص منه... تيجي نمشي في الدنيا خفاف؟ تيجي نمشي في الدنيا مش شايلين أثقال الغضب من الناس.
سيدنا يونس لما غضب من قومه المركب كانت تقيلة، كان لازم حد يترمي لأنه كان شايل من قومه كلهم، ومهما كانو يرمو لسة تقيلة.. فاكر قصة سيدنا يونس؟ روح خفيف لربنا.. اعفي عشان ربنا يعفو عنك.. عشان ليلة القدر ليلة عفو.
ها.. مين عفا؟ مين عفا عن حد؟ مين سامح؟ إحنا في رمضان يا اخونا.. يوم عفوك يوم شفاءك.. والله شفاءك.. شفاءك من أمراض القلوب. خلي بالك انت أحيانا مابتعفوش عن الناس مش عشان همه وحشين قوي لكن عشان في غل أو حقد أو حسد.. يعني في مرض من أمراض القلوب يدخل نار.. اعفو.. اعفو عشان قلبك يشفى.. اعفو عشان تخش الجنة.. اعفو علشان قرارك بعدم العفو قرار باستمرار المعاناة وشيل حقيبة الذكريات التقيلة.. اعفو عشان ليلة القدر قربت.. انت داخل على ليلة القدر ليلة العفو. السيدة عائشة بتسأل النبي أقول إيه ليلة القدر: (يا رسول الله أرأيت إن وافقت ليلة القدر ما أدعو قال تقولين اللهم إنك عفو تحب العفو فاعف عني) الألباني. عشان ربنا يعفو عنك اعفو عن الناس، اعفو عن الناس وقوله يا عفو أنا العبد الفقير عفيت عن أخويه.. عفيت عن جاري.. عفيت عن عمي.. عفيت عن صاحبي..اعفو انتو.. عفيت عن شريكي.. اعفو يا رب. تخيل انك تروح لمالك الملك رب العالمين وانت بتقوله أنا الفقير عفيت يعفو عنك ولا لأ؟ اعف عشان تدرك ليلة القدر.. نفسك تجيبها.. اعف.
شفت أد إيه؟ شفت الثواب أد إيه؟ شفت حتاخد إيه؟ تاخد جنة وتاخد عفو ربنا، عارف عفو ربنا يعني إيه؟ يمسح كل اللي فات.. العفو يعني إزالة الآثار، عفت الريح الآثار يعني أزالتها، تعرف تعفو كده؟ إيه رأيك تجيب ورقة وقلم دلوقتي وتكتب أسامي أكتر خمسة ظلموك ومضايقينك في حياتك في الماضي.. لو لازم تاخد حقك دلوقتي خد حقك، ولو قدرت اعفو، لكن تعالى نتكلم عن الماضي.. ممكن تجيب خمس أسامي.. هـ؟ أنا مرة عملت الحكاية دي، والله عملت الواجب ده، جبت ورقة وقلم وكتبت أكتر خمس أسامي ظلموني في حياتي، وقعدت أسأل نفسي.. تسامح؟ وجيت على الأولاني.. ها ماتسألوش يوم القيامة خلاص حتسامح أدام ربنا انتهى الموضوع ومش عايز منه حاجة.. مش حقولكم جبت كام من خمسة بس حاولت.. حاولت وعرفت أجيب كزا واحد وانبسط من نفسي أوي.. ممكن تسامح؟ ممكن تعفو؟ ومش حقولك إن أنا عرفت أعملها كلها يعني مش شاطر قوي بس تحاول.. ورقة وقلم وتحاول دلوقتي.
على فكرة النبي صلى الله عليه وسلم بيقول لواحد من الصحابة أقولك على أحلى خلق في الدنيا والآخرة.. تصدق إن دي أحلى الأخلاق.. (ألا أدلك على أكرم أخلاق الدنيا والآخرة؟ أن تصل من قطعك وأن تعطي من حرمك وأن تعفو عمن ظلمك) الألباني.. تعفو.. تسامح.. إيه رأيك؟.
أنا عايز أكمل معاك الحلقة دين بحاجتين: الشيطان بيقولك إيه عشان ماتسامحش.. لأنه خلق يرضى عنه الله.. يحبه الله [... وَالكَاظِمِينَ الغَيْظَ وَالعَافِينَ عَنِ النَّاسِ وَاللهُ يُحِبُّ المُحْسِنِينَ] {آل عمران:134}.. انت حبيب الله، انت يوم ما بتاخد في قلبك قرار عفيت عن فلان.. با فلان يا ابن عمي يا اخويا خلاص اللي فات مات أنا سامحت.. مافيش حاجة.. أول ما بتعمل التليفون ده.. أول ما بتقفل السكة.. انت حبيب الله.
ها مين حيعملها؟ مين نفسه الحلقة تخلص عشان بسرعة حتاخد التليفون: يا فلانة انتي اتكلمتي عليه وقلتي كزا كزا.. مش حتقعدي بقى تأطميها وتقوليلها فاكرة! لا لا لا.. يا فلانة أنا سامحت.. مافيش حاجة.. اللي فات مات ومن غير ماا.. يعني.. تواضع وانت بتعفو.. خليها حلوة.. خليها لله. في اللحظة اللي انت عملت التليفون ده [... وَاللهُ يُحِبُّ المُحْسِنِينَ] [... وَالكَاظِمِينَ الغَيْظَ وَالعَافِينَ عَنِ النَّاسِ وَاللهُ يُحِبُّ المُحْسِنِينَ] انت حبيب الله. إيه رأيك؟ تعملها ولا ما تعملهاش؟ عارف الشيطان بيجي يقولك إيه عشان ماتعفوش لأنك حتبقى حبيب الله، لأنك ممكن تجيب ليلة القدر السنادي، عارف بييجي يقولك ليه.. إوعى تبأة غبي.. بيقولك كدة.. انت عبيط؟! تسامحه بعد االي عمله؟! إوعى مايستاهلش.. دا كده حيركبك.. دا حيعملها تاني ويكررها ميت مره.. دا انت كدة حتبقى ملطشة.. حيقولك كده.. ماتصدقوش.. قلد النبي صلى الله عليه وسلم.. خليك نفس كبيرة.. ماتبقاش نفس صغيرة.. ارم الثأر والغل عشان تعيش سعيد العمر قصير.. العمر قصير مش مستحمل تعيش شايل أثقال كفاية الأثقال بتاعتك وذنوبك وأخطاءك.. تشيل كمان ثأر وغل! فاكر الطوبة اللي اتخلصنا منها.
أديك أمثلة لناس سامحت وعفت.. النبي صلى الله عليه وسلم.. النبي صلى الله عليه وسلم وموقف عجيب.. في واحد اسمه عبد الله بن أبي بن سلول.. دا رأس المنافقين.. دا اللي اتكلم في عرض النبي يعني اتكلم على السيدة عائشة.. دا اللي طلع الإشاعة إن السيدة عائشة عملت وعملت واتهمها بالزنا..هو دا. دا تكرهو أد إيه اللي عمل فيك كده؟ هو عبد الله بن أبي بن سلول اللي في غزوة أحد رجع بتلت الجيش وكان المسلمين طالعين ألف واحد قام راجع بتلتمية.. قال لأ عصاني واتبع الولدان.. هو هو عبد الله بن أبي بن سلول اللي قال: إن مثلنا ومثل محمد كالمثل الذي يقول: سمن كلبك ليأكلك.. تخيل بيقول كدة! شوفت.. يتعمل فيه إيه دا؟!! لكن تخيل ابنه جاي للنبي بيقوله حتعمل في أبي إيه يا رسول الله ققاله بل نعفو ونترفق به مادام بيننا.. يااه! ابنه بيسأله.. ابنه كان مؤمن.. حتعمل في أبويا إيه؟ أبوه كان رأس المنافقين قاله بل نعفو ونترفق. طب ولما تيجي يوم وفاته.. جت يوم وفاته.. فأقام النبي ليصلي عليه.. حتصلي عليه يا رسول الله!! فجاء عمر بن الخطاب قال: (يا رسول الله أتصلي على عدو الله ابن أبي بن سلول، وقد قال يوم كذا كذا وكذا!؟ أعدد عليه قوله..) ومسك سيدنا عمر النبي من هدومه إن ماتصليش عليه يا رسول الله.. حتسويه بينا كده! فقال: (أخر عني يا عمر.. فلما أكثرت عليه قال : إني خيرت فاخترت، قد قيل لي: [اسْتَغْفِرْ لَهُمْ أَوْ لَا تَسْتَغْفِرْ لَهُمْ إِنْ تَسْتَغْفِرْ لَهُمْ سَبْعِينَ مَرَّةً فَلَنْ يَغْفِرَ اللهُ لَهُمْ... ] لو أعلم أني إن زدت على السبعين غفر له لزدت عليها) الألباني {التوبة:80}.. ثم خلع النبي رداءه علشان يتكفن عبد الله بن أبي بن سلول فيه، فسيدنا عمر غضب لكن النبي صلى الله عليه وسلم قاله وما ينفعه استغفاري وما ينفعه ردائي إن كان الله لم يعف عنه ولكني أألف قومه.. أنا بكسب قومه كلهم.. أنا حاخد إيه من الثأر.. حاخد إيه من الغل عليه وهو بيموت.. أنا بعفو عنه علشان بقيت عيلته، عشان بقيت قبيلته بألف قلوبهم.
يااه.. صلى الله على محمد صلى الله عليه وسلم.. ممكن تكون نفسك واسعة كده؟ انت قلب كبير؟ انت زي السما الصافية دي وزي البحر البساط دون؟ انت نقي ولا انت مش كدة؟ هل انت قلب كبير ولا انت مش قلب كبير؟.
شوفوا مثل تاني.. شوفوا سيدنا علي بن أبي طالب.. بيحارب واحد وسيدنا علي قوي وانتصر عليه وحط السيف على رقبته في معركة ضد الإسلام.. حرب عادلة.. وبيحط السيف حيموتو خلاص قام الراجل باصق على وجه سيدنا علي فقام قايم وشايل سيفه وسايبه.. فالراجل قاله انت كنت حتموتني سبتني ليه؟ قاله انا كنت حموتك لله ولما بصقت على وشي بقيت حموتك لنفسي فعفيت.. لأ نفسي لأ.. مش عايز أموتك لنفسي.. يااه!.
شوف عفو واحد زي زين العابدين بن الحسين بن لما كان عنده جارية والجارية دين شايلة مية مغلية فالمية المغلية وقعت على ابنه.. تخيل لما تقع على ابنه.. تعمل فيها إيه الجارية دي؟ في حديث للنبي بيقوله (جاء رجل إلى النبي صلى الله عليه وسلم فقال يا رسول الله كم أعفو عن الخادم قال كل يوم سبعين مرة) المنذري.. عشان الخدم دول أكثر ناس ممكن تشوف منهم غلطات فتؤزيهم.. فزين العابدين لقى المية المغلية وقعت على ابنه.. ابنه مات.. فالجارية بتترعش.. حيعمل فيها.. فنظرت إليه وقالت له: [... وَالكَاظِمِينَ الغَيْظَ... َ] قال: كظمت غيظي.. قالت: [...وَالعَافِينَ عَنِ النَّاسِ... ] قال: عفوت عنك.. قالت: [... وَاللهُ يُحِبُّ المُحْسِنِينَ] قال: اذهبي انت حرة. صعبة أنا عارف إنها صعبة قوي.. صعبة قوي بس عفا.. ما خلاص ما الولد مات.
تقدر تعفو؟ انت نفس كبيرة؟ انت زي أبو بكر الصديق لما اتكلموا على بنته السيدة عائشة وفي وسط ما همه بيتكلمو مين اللي بيتكلم؟ ابن خالتها اللي أبو بكر بيصرف عليه فتنزل الآية [... وَلْيَعْفُوا... ] شوف ربنا بيخاطبك [... وَلْيَعْفُوا وَلْيَصْفَحُوا أَلَا تُحِبُّونَ أَنْ يَغْفِرَ اللهُ لَكُمْ... ] {النور:22} فقال: بلى أحب أن يغفر الله لي.. وقام مرجعله العطاء ولا كإن في حاجة.
ها.. مين حصله أكتر من كدة؟ مين حيعفو الليلة دي.. دي ليلة عفو.. ليلة القدر داخلة.. العشرة الأواخر.. اعفو عشان ربنا يعفو.. اعفو.
اعمل زي أبو حنيفة.. عمل إيه أبو حنيفة؟ واحد شتمه بأمه فقال: الله يعلم أن أمي ليست كما تقول.. فالراجل قام رادد عليه –لسه سفيه- فقام رادد عليه الراجل وقاله: يا فاسق يا زنديق.. أبوحنيفة!! يعني ده نصيب دايما أي حد بيجي يجدد بيحصله كده.. يا فاسق يا زنديق! فرد عليه قاله –بص الدعوة-: اللهم إن كنت كما يقول فاغفر لي، وإن لم أكن كما يقول فاغفر له. تعرف تكون النفسية دي.. اعف.
اعف زي سيدنا يوسف لما عفا.. فين يوسف.. فين يوسف هذا الزمان اللي قالهم [... لَا تَثْرِيبَ عَلَيْكُمُ اليَوْمَ يَغْفِرُ اللهُ لَكُمْ... ] {يوسف:92} بعد ما رموه في البير واتسببوا إن هو يتغرب عن أبوه سنين طويلة.
أنا خلصت يا جماعة.. بس التسامح مش مرة ولا اتنين.. التسامح طريقة حياة.. التسامح طريقة عيشة.. تعرف تعيش كدة؟ تعرف تعيش (لا أجد في نفسي لأحد من المسلمين غشا ولا أحسد أحدا على خير أعطاه الله إياه)؟.
أنا وصلت للآخر.. مين مستعد يعفو كدة؟ الليلة دي يا جماعة.. تليفون أول ما نخلص بالله عليك.. والله.. حتطلع خفيف بعد التليفون.. وربنا راضي وتكون حبيب الله [... يُحِبُّ المُحْسِنِينَ].
تتطبق انهارده قلب كبير؟ دي مجموعة حلوة أوي.. مجموعة صافية.. صافية.. كفاية بأه.. انس الماضي وارميه وحتسعد إن شاء الله.
شوفتو رحلة للسعادة.. إن شاء الله جرب معانا بس وشوف حتسعد أد إيه، وشوف إن شاء الله حياتك حتتنقل.
Daraltarjama.com© جميع حقوق النشر محفوظة
يمكن نشر ونسخ هذه المقالة بلا أي قيود إذا كانت للاستخدام الشخصي وطالما تم ذكر المصدر الأصلي لها أما في حالة أي أغراض أخرى فيجب أن يتم الحصول على موافقة كتابية مسبقة من إدارة الموقع
للاستعلام: management@daraltarjama.com
http://amrkhaled.net/newsite/articles1.php?articleID=NTkwMg==&id=5902