|
|
|
| محمود المصري |
نسأل الله عزوجل أن يبارك فى كل بلاد المسلمين اللهم آمين قلنا فى الدرس اللى فات كلام جميل للإمام ابن القيم النهاردة الدرس رقم 6 لابد للسالك السالك الذي يسلك طريقه إلى جنة الرحمن سبحانه أصل الأصل يا جماعة إن احنا طلاب جنة إذا أراد الله بعبده خيرا فجر فى قلبه عينين عينا يرى بها الجنة وعينا يرى بها النار طيب إيه فايدة العينين دول إن انت تحدق بالقلب يعنى إيه تحدق يعنى القلب يبقى ليه حدقة زى العين يبقى القلب شايف جنة ونار خد بالك وده اللى قاله سيدنا حنظلة ودى ليها فايدة عظيمة على فكرة تخيل حضرتك لو انت قاعد كدا تخيل المنظر كدا وحالا واحنا قاعدين دلوقتى فجأة اتفتحت السماوات وشفنا دلوقتى حالا على الهواء مباشرة الجنة والنار طيب بالله عليك قوللى عبادتك هيبقى شكلها إيه فكر كده قدامك جنة أهى وانت شايف نعيم الجنة وشايف قصرك فى الجنة تخيل ما هى دى المسألة من ضمن صفات المتقين فى أول سورة البقرة الذين يؤمنون بالغيب الجنة غيب والنار غيب لكن مصدق ليه لأن ربنا اللى أخبر إن فى جنة وفى نار والنبى صلى الله عليه وسلم أخبر إن فى جنة وفى نار تخيل حضرتك كدا وانت قاعد وبتصلى الله أكبر وشايف قدامك جنة وشايف هنا النار شايف الاتنين فى وقت واحد طيب بالله عليك العبادة هيبقى شكلها إيه هتفرق كتير جدا عن واحد واقف بيصلى ما هو شايف غير الأرض والحصير أو الموكيت صح وللا لأ هى دى بقا المسألة اللى بيتكلم عنها الإمام ابن القيم إذا أحب الله عبدا فجر فى قلبه عينين عينا يرى بها الجنة وعينا يرى بها النار فإذا ما عمل عملا أو تكلم كلمة أو فعل شيئا عرضه على الجنة والنار العمل ده يودى الجنة نعمله يودى النار لأ بلاش منه الكلمة دى تودى فين الفردوس أعملها أقولها الكلمة دى تودى فين لأ دي سقر لأ بلاش منها يتظبط حالك قال أحد السلف والله ما تكلمت كلمة منذ أربعين سنة إلا وأعددت لها جوابا بين يدي الله سبحانه وتعالى الله أكبر ما يلفظ من قول إلا لديه رقيب عتيد ملكين بيكتبوا عليك بيكتبوا إما لك وإما عليك فالشاهد فى الموضوع إن الإنسان لو شايف جنة ونار هيتظبط حاله ودا اللى قاله سيدنا حنظلة نكون عند رسول الله صلى الله عليه وسلم فيكلمنا خد بالك النبى صلى الله عليه وسلم كان بيكتر أوى أوى من الكلام عن الجنة والنار ليه أصل القلوب لا تنصلح أصلا إلا بذكر الآخرة تخيل كدا لو احنا فاكرين إن مفيش آخرة خلاص بقا اللى يظلم يظلم واللى يسرق يسرق واللى يعق والديه يعقهم واللى بيظلم زوجته واللى يبهدل عياله خلاص بقا ما هو مفيش آخرة إنما إيه أفنجعل المسلمين كالمجرمين ما لكم كيف تحكمون دا يوم القيامة هنقف فيه بين يدى المولى عزوجل ونتسأل عن كل حاجة ( ونضع الموازين القسط ليوم القيامة فلا تظلم نفس شيئا وإن كان مثقال حبة من خردل أتينا بها وكفى بنا حاسبين )
فالشاهد فى الموضوع إن فى يوم هنقف بين يدى الله هنتسأل عن كل صغيرة وكبيرة فسيدنا حنظلة بيقول نكون عند رسول الله فيكلمنا عن الجنة والنار فكأنا رأى عين كأنا رأى عين هو فكر إن المسألة يعنى لابد إن احنا نكون فى عبادة صلاة وصيام 24 ساعة مش فاكر إن فى أمور مباحة ممكن لو احتسبنا النية إن ممكن تكون فى ميزان حسناتنا آه أنا ممكن آخد زوجتى أفسحها فى مكان مفيهوش مخالفات ولا معاصى ولا بتاع ويبقى كل ده فى ميزان حسناتى ويتحسبلى عبادة إن أنا بدخل الفرحة على زوجتى بدخل الفرحة على أولادى بدخل الفرحة على أبويا وأمى فاهم إزاى آه فالنبى صلى الله عليه وسلم وضح له قال لو أنكم تظلون على الحالة اللى تكونون بها عندي لصافحتكم الملائكة على فرشكم وفي الطرقات ولكن يا حنظلة ساعة وساعة ، ساعة يكون فيها الإيمان عالى جدا فبكتر الطاعات وكدا وساعة بيكون الإيمان منخفض بفعل المعاصى أو الغفلة والمعنى التانى ساعة فيها عبادة وما شاء الله إقبال على الله تعالى وساعة تكون فيها شئ من المباحات اللى بتعينك على الطاعات بتمشى شوية بتفسح شوية بقعد بلعب مع أولادى شوية مع زوجتى شوية الساعة اللى بتفرحنى دى أو الساعة اللى برفه بها عن نفسى بتعينى على إن أنا لما أقف أصلى أبقى فريش كدا وسعيد ومبسوط الحمد لله غذيت قلبك ونفسك وجسدك فى وقت واحد هو ده المسلم ( وكذلك جعلناكم أمة وسطا )
إحنا أمة وسط يا جماعة لا إفراط ولا تفريط ولا تكشيرة بقا وضارب ال 111 وقافل الدنيا وكاره الدنيا واللى فيها ولا فاتحها 24 ساعة على البحري يعنى الموضوع يبقى وسط يعني فاهم إزاى فسبحان الله فيبقى لابد للسالك من همة تسيره وترقيه ومن علم يبصره ويهديه كلمة تانية جميلة أوى للإمام ابن القيم كلمة خطيرة بيقول إيه كمال الإنسان احنا بنتكلم عن إيه علو الهمة أنا عايزك تبقى إنسان مثالي أنا عايزك تبقى ماشى فى كليتك الناس تقول ما شاء الله دا أكتر واحد مميز فى الجامعة كلها مش بالشهرة بالقدوة إن انت تعرف الناس أنا بقيت كدا عشان اتبعت النبي أنا بقيت كدا عشان مشيت على المنهج الوسط على منهج الإسلام تمام آه سبحان الملك كمال الإنسان مداره على أصلين عايز تبقى إنسان يعنى من الناس الكمل زى ما بيقولوا والنبى صلى الله عليه وسلم قال ولم ينف الكمال عن أحد قال كمل من الرجال كثير ولم يكمل من النساء إلا آسية امرأة فرعون ومريم ابنة عمران وفضل عائشة على سائر النساء كفضل الثريد على سائر الطعام خد بالك بقا كمال الإنسان مداره على أصلين إيه هما الأصلين هقولهملك بس بعد ما تصلى على حبيبك صلى الله عليه وسلم مداره على أصلين إيه هما معرفة الحق من الباطل مش كفاية الأصل التانى وإيثار الحق على الباطل آه دا الموضوع كبير أوي يا جماعة الموضوع كبير بجد إوعى تكون موضوع الكلام عن علو الهمة يكون معقد أنا بحاول أبسطه يعنى بكل الطريق عشان أوصلك يعنى إيه همة ويعنى إيه يبقى عندنا علو همة وإزاى نسلك الطريق بتاع أهل الهمم كمال الإنسان مداره مدار كمال الإنسان ده على حاجتين أول حاجة معرفة الحق من الباطل إنك تميز دا الصح ودا الغلط لأن فى ناس عندها الصح غلط وناس عندها الغلط صح آه فيه كدا فى واحد ممكن تكلمه تقوله الالتزام والدين والمش عارف إيه يقولك يعنى عايزنى أبقى إنسان مش كويس دا اللى بيعمل كدا إنسان مش سوي دا إنسان معقد نفسيا هو شايف الحق إيه باطل وممكن واحد تانى يكون شايف الباطل إيه حق واحدة مثلا تكون بترقص تقولك العمل عبادة وأنا برقص فأنا بعمل يبقى أنا كدا بعبد ربنا فشايفة الباطل حق واخد بالك لأ قالك مدار كمال الإنسان على حاجتين معرفة الحق من الباطل أبقى عارف إن ده إيه أبيض أيوه مفيش مشكلة دا كله خير وده أسود خلاص يبقى عرفت الأبيض من الأسود عرفت الحق من الباطل عرفت الخير من الشر جميل أوي دى نقطة دا نص المشوار والمشوار التانى وإيثار الحق على الباطل عارف إن السجاير حرام عارف سمعت طيب بتعمل إيه بشربها يبقى انت عرفت الحق والباطل ولم تؤثر الحق على الباطل عارفة إن المشي مع البوي فرند وانت عارف إن المشي مع الجيرل فرند حلال وللا حرام آه طبعا حرام لا إله إلا الله أمال إيه طيب ماشى مع البنت ليه أصل بقا نفس بقا وضعف بقا وانت عارف إن احنا شباب بقا ولسه واخد بالك يبقى انت عرفت الحق من الباطل ولم تؤثر الحق على الباطل عارفة إن التبرج حلال وللا حرام طبعا حرام دا ربنا أمر بالحجاب بس الحجاب حجاب القلب طيب واخد بالك آه سبحان الله طيب أسأل بقا اللى مش محجبة سؤال صغير لو ركبتى طيارة ولو لقيتى انتى عارفة في بداية طلوع الطيارة تلاقى كدا إيه بيشغلوا فيلم تسجيلى عن الاجراءات الوقائية فى الطيارة ولو الطيارة وقعت فى المحيط تعملى إيه وهتلاقى السلم تطلعى عليه وبعدين لو الهوا انقطع من الطيارة هتلاقى حاجة نزلالك من فوق وتحطيها على الأنف وتستنشقى الهواء ولو حصل مش عارف إيه إجراءات أمنية وقبل ما نطلع لابد من ربط الأحزمة بتنفذي وللا مبتنفذيش طبعا طيب بتنفذى ليه أصل قائد الطيارة طبعا أدرى بمصلحتي طبعا عارف فلازم أنفذ الأوامر دي كلها حفاظا على حياتي ولما بتروحي لدكتورة وتقولك الدكتورة انت عندك كذا خدي بالك الدواء دا هتاخديه تلات مرات فى اليوم والدواء دا قبل الأكل وبعد الأكل والتانى ده حقنة بالليل والرابع ده مش عارف إيه بتمشى على العلاج وللا لأ طبعا دا أنا بكتبه عندي فى رشتة وبعمل جدول للدواء ده بمشي عليه باليوم طيب بتمشي على الدوا ليه أصل الدكتورة أدرى بمصلحتى سبحان الملك ولله المثل الأعلى الدكتورة أدرى بمصلحتك والطيار أدرى بمصلحتك والخالق جل جلاله لما أمرك بالحجاب مكنش أدرى بمصلحتك سبحان الملك يعني أنا أذكر بس مثل بسيط جدا واحنا فى أمريكا كان شاب يهودي أسلم الشاب اليهودي أسلم وجاء لأحد مشايخنا فقاله انت كانت ديانتك إيه قاله كنت يهودي قاله وأسلمت قاله آه الحمد لله قاله طيب أبوك وأمك يهود ومتعصبين جدا لليهودية قاله طيب مزعلوش إنك أسلمت قاله بالعكس دا أنا أمى فرحانة جدا جدا بإسلامي فاستغرب قاله ما تجيبلنا أمك وأبوك يمكن ربنا يكرمنا ويسلموا هما كمان فقاله والدي مسافر بكرا أجيبلك والدتى بكرا فجت أمه يهودية فجت تانى يوم لابسة حجاب لابسة مغطية راسها تماما لابسة إيشارب كبير جدا ولابسة لبس فضفاض يعنى وجاية فالشيخ أول ما شافها جاية فسأل الشاب ده قاله هى أمك أسلمت قاله لأ ما أسلمتش قاله أمال لابسة كدا ليه قاله أصلها عرفت إنها عيب إنها تقف قدام الشيخ وهي معريا راسها سبحان الله دي هدية نبعتها لكل أخت مسلمة إن واحدة يهودية بتقول عيب إن أنا أقف قدام شيخ وأنا معريا راسي وانتى مش مكسوفة إنك تقفى قدام ربنا وانتي كاشفة جسمك كله .
نفسكوا تخشوا الجنة يقينا آه طب مبنعملش للجنة ليه انت عرفت الحق من الباطل عرفت الخير من الشر عرفت الجنة من النار أمال بتجري ورا النار ليه بتهرب من الجنة ليه فى حد فى الدنيا يهرب من الجنة محدش بيهرب من الجنة ومين قالك إنى بهرب من الجنة دا أنا نفسي أخش الجنة طيب ما تعمل اجرى امشى فى الطريق وكتير من الشباب بننصحهم لله والله العظيم وبنقولهم بكل حب يا شباب العمر مش حقل تجارب كتير من الشباب يقول معلش انتوا عشتوا حياتكو ما تسيبنى أعيش حياتي ولما أعرف إن الطريق دا غلط هرجع أقوله طيب وليه تضيع وقتك انت مسافر اسكندرية وانا سافرت اسكندرية قبل منك مثلا فجيت وانا ماشى فغلطت ودخلت فى طريق غلط فبقولك خد بالك احنا واقفين أهوه لو دخلت من الطريق ده الطريق دا غلط مش هيوصلك اسكندرية دا هيوصلك أى حتة تانية إنما لو مشيت في الطريق دا مستقيم علطول هتوصل اسكندرية فانت بدل ما تاخد الطريق الغلط لحد آخره وعايز تبتدي صح فتضطر ترجع الطريق الغلط ده لحد النقطة اللى بدأت منها وبعد كدا تبتدي تمشي فى الطريق الصح وليه تتعب نفسك وليه تضيع عمرك ما تبدأ صح زي ما الناس قالتلك زى ما ربنا أمرك وزى ما النبي صلى الله عليه وسلم أمرك وزي ما علماء الأمة ودعاة الأمة دلوك على الخير ابدأ صح غيرك واللى سبق منك وقبل منك مشى فى طريق غلط وقالك الطريق دا غلط فانت الحق نفسك وامشي فى الطريق الصح عشان ربنا يكرمك وتعيش صح خدت بالك المهم هدفك زي ما قلنا ان انت زي السهم تنطلق إلى الهدف ده انت داخل سباق 100 متر عشان توصل إلى جنة عرضها السماوات والأرض هتتعب شوية طبعا دا لازم دا انت النهاردة لو هتروح تتعين فى وظيفة ووظيفة تعبانة يعنى هتاخد كام 500 جنيه فى الشهر مثلا بيقولك شهادتك إيه خبراتك إيه معاك لغة وللا ممعاكش معاك كمبيوتر بتعترف تستعمل إنترنت بتعمل كذا كذا كل ده وفى النهاية ممكن متتقبلش أمال لما تخش الجنة بقا جنة يا أخي عارف يعني إيه جنة جنة عرضها السماوات والأرض حتى واحد يهودي مرة بيسأل النبى عليه الصلاة والسلام وبيستغرب يعنى عايز بيقوله جنة عرضها السماوات والأرض فأين الله ؟ فقال سبحان الله وأين الليل إذا كان النهار المسألة مبتتقاسش كدا خالص دا الاتنين بيبقوا فى قبر واحد والقبر نفسه يبقى روضه من رياض الجنة لواحد منهم وحفرة من حفر النار للتانى سبحان الملك وأمر القبر وأمر الآخرة أعظم من أن يقارن بأمر الدنيا دا حتى فى أمر الدنيا اتنين نايمين جنب بعض على سرير واحد يقول أعوذ بالله كابوس شافه شاف نفسه ناس بتقتله وناس بتجري وراه وتعبان بينهشه فقام مفزوع التانى الله رؤيا جميلة يا سلام شفت نفسى وأنا داخل الجنة بقا وباكل من ثمارها والحور العين بقا وحاجة والاتنين نايمين جنب بعض فأمر الآخرة أعظم من كدا بكتير بفضل الله سبحانه وتعالى قال الإمام ابن القيم وقد أجمع عقلاء كل أمة أن النعيم لا يدرك بالنعيم وأن من آثر الراحة فاتته الراحة وأنه بحسب ركوب الأهوال واحتمال المشاق تكون الفرح واللذة نترجم نترجم بعد ما تصلى على حبيبك بيقول إيه وأجمع عقلاء إيه مقالش المؤمنين لأ حتى العقلاء خدها بالعقل أجمع عقلاء كل أمة مش أمة الإسلام بس أن النعيم اللى فى الجنة لا يدرك بالنعيم مش معقول أقول إيه خلاص نام وارتاح يأتيك النجاح لأ ييجي منين إلا إذا كنت هتغش والغش حرام من غشنا فليس منا لأ انت قوم واشتغل وابذل جهد ومن طلب العلا سهر الليالى أمال اللى هيدخل الجنة يعمل إيه مينامش بقا فاهم إزاى فاطلب واجتهد وقوم وابذل الجهد سبحان الله علماء التابعين وعلماء السلف الصالح كانوا بيبذلوا جهود لا تتخيلها حتى إن واحد منهم وهو بيموت فى بداية السكرات دخل عليه تلميذ من تلاميذه فقال له الشيخ ماذا تقول فى المسألة الفلانية فقال التلميذ سبحان الله يا شيخ يعنى عايز يقول انت بتموت يعنى عايز يقوله هو ده وقته فقال له الشيخ لعلي أن أعيش فأستفيد أنا وأنت ولعلي أن أموت فيستفيد المسلمون من بعدي شوف الهمة عاملة إيه لحد آخر لحظة فى حياته الإمام أحمد بن حنبل بيقول إيه مع المحبرة إلى المقبرة هفضل أطلب العلم إلى آخر لحظة فى حياتي يبقى أجمع عقلاء كل أمة أن النعيم لا يدرك بالنعيم وأن من آثر الراحة فاتته الراحة وأنه على حسب احتمال المشاق والمتاعب تكون اللذة والفرحة يوم القيامة علو همة يبقى الإنسان بيبذل عشان يوصل بيبذل عشان ينطلق بيبذل عشان يوصل لأعلى درجات الجنة احنا مش بنكتفى يا جماعة إننا عايزين ندخل الجنة وبس احنا نرتقى فى أعلى درجات الجنة ربنا يرزقنى وإياكم أنا هديلك فى هذه الحلقة حديث الحديث دا أنا عايزك تعيش معاه لحد آخر لحظة فى عمرك حديث رواه أبو نعيم بسند صحيح بروايتين والروايتين صحاح وبص عليهم فى صحيح الجامع قال صلى الله عليه وسلم لكل قرن سابق لكل قرن واحد فى كل 100 سنة هو ده الذى يجدد للأمة أمر دينها خد بالك كل 100 سنة وفى رواية تانية لكل قرن من أمتى سابقون طيب له هنا سابق وهنا سابقون قالك ممكن يكون كل واحد سابق فى مجاله يعني ممكن يكون واحد سابق فى علم الحديث يبقى دا إمام القرن فى علم الحديث زي الشيخ الألباني رحمه الله رحمة واسعة ممكن يكون واحد سابق فى علم أصول الفقه يبقى هو ده السابق بتاع أصول الفقه فى القرن ده كله واحد تالت سابق فى علم التفسير الرابع سابق فى علم الفقه وهكذا لكل قرن من أمتى سابقون انت وللا انت مين فيكو قولى بقا الشيخ هيتريق لا والله مبتريقش إوعى تحتقر نفسك إوعى تقول أنا شأنى عند الله أحقر من ذلك لا مش ممكن يكون أنا طيب ليه ميكونش انت طب والله ممكن يكون انت وممكن يكون انتى هو انتو يعنى شوية فى البلد يعنى سبحان الله دا الإنسان مجرد بس ما يستعين بالله ربنا يكرمه ممكن يكون أفضل إنسان فى الدنيا إيه المشكلة يعنى هو هديك بس 3 أمثلة بس تصلى على حبيبك صلى الله عليه وسلم سيدنا عمير بن الحمام والحديث رواه مسلم لما كانت غزوة بدر ودا أول لقاء بين معسكر الموحدين وبين معسكر المشركين النبى واقف صلى الله عليه وسلم بالبلدى كدا الكلمات بقا اللى بتحفز المعنويات وبتشد الجهود وتعلى الهمة عشان يدخلوا يجاهدوا فى سبيل الله سبحانه وتعالى والجهاد كان يعنى على أيامهم مكنش حاجة سهلة يعنى مش واحد واقف بقا على جبل وبيضرب رصاصة على واحد تانى دا سيوف وعينى عينك وقدامى وقدامك ونخش وبيقطعوا فى بعض خد بالك المسألة صعبة جدا انت النهاردة لو تخيلت واحد داخل عليك بحتة مطوة صغيرة أو بسكينة صغيرة متهيألى ممكن يغم عليك فتخيل بقا دا سيف سيف يعنى طولى كدا وواحد شايلة ومعاه درع وسهام وحراب ودنيا داخلة عليك فالنبى حب يحفزهم عشان يجاهدوا فى سبيل الله فقال والذي نفسى بيده لا يقاتلهم اليوم رجل منكم فيقتل صابرا محتسبا مقبلا غير مدبر إلا أدخله الله الجنة يللا مش بقا أقولك منصب بقا تبقى أمير مكة وللا أمير المدينة المنورة وللا تبقى زعيم الجزيرة العربية الجنة إلا أدخل الله الجنة الصحابة دى أول مرة يخرجوا عشان يجاهدوا فى سبيل الله فالموضوع بالنسبة لهم يعنى برضه إيه جنة معقولة كمان مش مصدقين نفسهم طبعا هما مصدقين النبي عليه الصلاة والسلام بس مش مستوعبين الموضوع لسه مفيش بيني وبين الجنة إلا إن أنا أخش فاتقتل واستشهد فأكون من أهل الجنة آه فالنبي لما حس بكدا فراح قايلهم الجملة التانية قال قوموا إلى جنة عرضها السماوات والأرض وصلت بقا المعنى ده وصلت الكلمة وخلاص حسوها بقا فمين اللى واقف جنب النبى عليه الصلاة والسلام واحد من الشباب يا شباب اسمه عمير بن الحمام عمير واقف جنب النبى عليه الصلاة والسلام فقاعد يكلم نفسه بس بصوت عالى شوية فالنبى سمعه فقال عمير بخ بخ جنة عرضها السماوات والأرض ياه إيه ده إيه الأملة دى كلها بقا جنة عرضها السماوات والأرض مجرد ما أخش بس واتضرب ضربة خلاص فقال النبى صلى الله عليه وسلم لعمير ياعمير ما حملك على قولك بخ بخ ؟ قال لا شئ يا رسول الله سوى أنى آدى الهمة بقا مقالش مين أنا عشان أخش الجنة وللا ياعم الجنة ليها أهلها مش أي حد بيخش يعنى شوف الهمة العالية عنده قال لا شئ يا رسول الله إلا أني أرجو أن أكون من أهلها لسه بيقول إلا أني أرجو أن أكون من أهلها شوف بقا التواصل بين السماء والأرض فى ساعتها لسه بيقول إلا أني أرجو أن أكون من أهلها قبل الهه والألف دى ما تنطق كان جبريل عليه السلام نزل من سبع سماوات قاله يا محمد يا رسول الله قوله انت من أهلها فقال الرسول صلى الله عليه وسلم فأنت من أهلها أنا عايزك تتخيل نفسك مكان عمير والله العظيم الواحد لو مكان يموت وهو واقف من الفرحة طبعا مش مصدق نفسه فأنت من أهله خلاص عرف إنه من أهل الجنة فعمير قام مطلع كام تمراية وبدأ ياكل عشان يتقوى على الجهاد فى سبيل الله شوف بتمرات بسيطة فأكل تمراية أو تمرتين ونظر إلى التمر فى يده وقال جنة عرضها السماوات والأرض ؟
والله لئن أنا حييت حتى آكل تلك التمرات إنها لحياة طويلة يا نهار أبيض هو انا لسه هستنى لحد ما آكل شوية التمر اللى في إيدي لأ دا دنيا تانية دا عمر تاني فرمى التمر ودخل فجاهد فى سبيل الله فقاتل فقتل فكان من أهل الجنة عمير بن الحمام احتقر نفسه ؟ أبدا آدى المثال الطيب اللي احنا قلناه فى كام حلقة فاتت سيدنا عكاشة بن محصن رضى الله عنه وأرضاه اللى النبى صلى الله عليه وسلم قال إن فى سبعين ألف من أمتى سيدخلون الجنة بغير حساب ولا عذاب محتقرش نفسه مع إن عكاشة إنسان بسيط جدا قال ادع الله أن يجعلنى منهم قال انت منهم خلاص تخيل محتقرش نفسه مقالش أنا اللى هكون من السبعين ألف دا يعنى فى الصحابة اللى قبل منى واللى سبقونى مقالش كدا طيب والمثال التالت سيدنا ربيعة بن مالك سيدنا ربيعة بن مالك دا إنسان فقير جدا شاب عنده 17 سنة عايزك تتخيل الشكل الاجتماعي اللى عايش فيه انسان ملوش حد خالص في الدنيا 17 سنة ومن أهل الصفة وفقير جدا ومش لاقى حاجة خالص بالمرة ونفسه يتجوز وميملكش من الدنيا أى شئ وكان كل اللى بيعمله عشان كدا النبى صلى الله عليه وسلم بيقولك لا تحقرن من المعروف شئ أى عمل ولو بسيط اعمله وإن شاء الله ربنا هيكرمك بيه كل اللى كان بيعمله ربيعة إنه كان بيحضر مية الوضوء للنبى صلى الله عليه وسلم فى الخمس صلوات فى كل صلاة يروح يملا الميه ويجيبها للنبي صلى الله عليه وسلم بس مفيش غير كدا عمل حاجة غير كدا مع أداء الفرائض والكلام دا كله فالنبى صلى الله عليه وسلم حب يكافئه النبى عليه الصلاة والسلام مكانش يسيب حد يعمل معاه أي معروف إلا لما لازم يكافأه يعنى حتى النبى عليه الصلاة والسلام قال ذلك قبل أن يموت بخمسة أيام قال ما لأحد له يد عندنا إلا وقد كافأناه بها ما خلا آل بكر فإن له عندنا يد يكافئه الله بها يوم القيامة فسيدنا النبى عليه الصلاة والسلام قال سلنى شيئا يا ربيعة قال أسألك مرافقتك فى الجنة يا رسول الله لو واحد غيره كان قال أنا من أهل الصفة وغلبان ومش لاقى آكل وعايز أتجوز عايز أتجوز يا رسول الله أدينى أى حاجة بيت وشقة وعروسة واخد بالك فقال أسألك مرافقتك فى الجنة يا رسول الله فالنبى عليه الصلاة والسلام حب يراجعه فى المسأله شايفه فقير جدا ومعندوش ومتجوزش قال أوغير ذلك قال هو ذاك قال فأغني على نفسك بكثرة السجود لله فإنك لا تسجد سجدة لله إلا رفعك الله بها درجة فى الجنة وزى ما بقولك دايما تنزل تحت تطلع فوق أقرب ما يكون العبد من ربه وهو ساجد ليه لأن أعز وأعمق جسد فى جسد الإنسان القلب والجبهة تنزل فى التراب ليه ذل نفسك لله وكل ما تذل نفسك لله كل ما تكون عزيز كما قال جل وعلا فى الحديث القدسي من تواضع لي هكذا رفعته هكذا هي دي المسألة وما تواضع عبد الله إلا رفعه الله عزوجل كل ما تتواضع وكل ما تنزل تحت كل ما ربنا يرفع قدرك ويرفع فوق بفضل الله سبحانه وتعالى عشان كدا بقولك خلى همتك عالية إوعى تحتقر نفسك ابدأ ومن كانت له بداية محرقة كانت له نهاية مشرقة ولابد للسالك من همة تسيره وترقيه ومن علم يبصره ويهديه وكمال مدار الإنسان على الأعمال معرفة الحق من الباطل مش كفاية وإيثار الحق على الباطل انت فى سباق 100 متر الحق وسابق وان شاء الله توصل وتكون الأول وأنا أو المسلمين كما فى الآية .
أسأل الله عزوجل أن يجعلنا جميعا من السابقين ومن أهل الهمم ومن أهل القمم سبحانك الله وبحمدك أشهد ألا إله إلا أنت أستغفرك وأتوب إليك وصلى الله على نبينا محمد وعلى آله وصحبه وسلم والسلام عليكم ورحمة الله وبركاته .
المصدر: http://www.alresalah.net/morenews.htm?id=282_0_2_0